Mbela ino hala okushiiva oshili kombinga yaKalunga, kutya oye lyelye, oku hole shike nonokutya oku tonde shike? Jehova Kalunga okwe tu hololela oshili kombinga yaye mEendjovo daye, Ombibeli. Ashike hakeshe umwe ta dulu okulesha Ombibeli ndele ta udu ko oshili oyo pauyadi. Omolwashike mbela? Omolwaashi okuuda ko oshili yopamhepo ya tya ngaho oku li oufembanghenda oo inau pewa keshe umwe. Natu ka taleni kutya Jesus okwa ti shike shi na sha naasho. — Lesha Mateus 11:25.

Ovelishe 25 yaMateus etukulwa 11 oya hovela tai ti: “Opomafiku enya Jesus okwa popya ndee ta ti.” Osho a li ta ka popya otashi dulika shi na sha naasho sha li sha hangwa opo sha ningwa po. Okwa hangwa ashike opo a tangunine ovanhu vomoilando itatu yaGalilea omo a longa oilonganghono ihapu, ndele nande ongaho, kava li va hala okuninga ovahongwa vaye. (Mateus 11:20-24). Oshi na oupu u li pule kutya, ‘Ongahelipi umwe oo a mona oikumwifilonga yaJesus ta dulu okukala ina hala okutambula ko oshili oyo Jesus a honga nokuninga omushikuli waye?’ Okuhatambula ko oshili kwovanhu vopefimbo laJesus okwa etifwa koukukutu womitima davo. — Mateus 13:10-15.

Jesus oku shii kutya opo tu ude ko oshili kombinga yaKalunga oyo tai hangwa mOmbibeli, otwa pumbwa oinima ivali: Ekwafo laKalunga nosho yo oikala ya yuka yomutima. Okwa ti: “Ohandi ku hambelele, Tate, Omwene weulu nowedu, osheshi oinima ei Ove we i holeka ovanongo novanaendunge, ndele we i hololela eehanana.” Mbela ou wete kutya omolwashike okuuda ko oshili kombinga yaKalunga oyo tai hangwa mOmbibeli taku dulu okutiwa kutya oku li oufembanghenda? Jehova oku na oufemba wokuhoolola kutya olyelye ta hololele oshili, molwaashi oye “Omwene weulu nowedu.” Ashike Kalunga ke na onhondo. Oshike hashi mu linyengifa a hololele ashike ovanhu vamwe oshili yOmbibeli?

Jehova oku hole ovalininipiki, ndele hava linenepeki. (Jakob 4:6) Oshili okwe i holeka “ovanongo novanaendunge,” sha hala okutya, ovanongo vomounyuni novahongwanhu ovo ve wete inava pumbwa ekwafo laye omolwelinenepeko lavo nokukala ve lineekela muvo vene. (1 Ovakorinto 1:19-21) Ndele okwe i hololela “eehanana,” sha hala kutya, ovo have uya kuye nomutima aushe nove lininipika ngaashi ounona. (Mateus 18:1-4; 1 Ovakorinto 1:26-28) Omona waKalunga, Jesus okwa li a shakeneka ovalininipiki nosho yo ovo ve na ounhwa. Ovawiliki vomalongelokalunga vahapu ovo ve na ounhwa novahongwanhu kava li ve udite ko etumwalaka laJesus, ndele ovayuli veeshi ovalininipiki ova li ve li udite ko. (Mateus 4:18-22; 23:1-5; Oilonga 4:13) Pefimbo opo tuu opo, oipuna imwe novahongwanhu ovo va li ovalininipiki shili ova li va ninga ovashikuli vaJesus. — Lukas 19:1, 2, 8; Oilonga 22:1-3.

Paife natu shuneni kepulo olo la pulwa pehovelo: Mbela ino hala okushiiva oshili kombinga yaKalunga? Ngeenge owa hala, otashi dulika to ka hekelekwa koushili ou kutya Kalunga ke hole ovo ve litala ko ve li ovanongo vomounyuni. Mepingafano naasho, oku hole ovo va dinika kovanongo vomounyuni. Ngeenge owa konakona Eendjovo daKalunga nelininipiko, oto dulu okukala umwe womwaavo va pewa oshali ina ondilo kuJehova yokushiiva oshili kombinga yaye. Okuuda ko oshili oyo otaku ka ningifa onghalamwenyo yoye i kale i na eityo paife shi dulife nale, notaku shi ningi tashi shiiva u ka mone “omwenyo waalushe” mounyuni mupe waKalunga wouyuki oo u li pokuuya. a — 1 Timoteus 6:12, 19; 2 Petrus 3:13.