ESHI WA lesha omatumbulo oo avali, lilipi tali tu kumwe netaleko loye? Ovanhu vahapu ova mona kutya eendjovo daSaulus wokuTarsus oo a li a shiivika nawa omuyapostoli Paulus otadi hekeleke nodihokwifa. (Oilonga 17:26, 27) Ombibeli oi na yo eendjovo dikwao da yukila oko. Pashihopaenenwa, Jesus meilikano laye okwa tumbula mo kutya ovashikuli vaye otava ka shiiva Kalunga notava ka mona omanangeko noupuna. — Johannes 17:3.

Mepingafano naasho, ovafilosofi ngaashi Philo ove na omataleko a yooloka ko filufilu. Ohava ti kutya itatu dulu okushiiva Kalunga nandenande molwaashi oshidjuu filufilu oku mu uda ko. Mbela openi hatu dulu okuhanga oshili?

Ombibeli oya ti kutya ope na oinima imwe i na sha naKalunga itai dulu okuudiwa ko kovanhu. Pashihopaenenwa, ngaashi okukala po kwOmushiti, omadiladilo nounongo waye itau dulu okuyelekwa. Eendunge dovanhu oda ngabekwa ngeenge tashi uya poinima oyo. Ashike, oinima oyo itai tu imbi tu mu shiive. Okudilonga koinima oyo otashi tu kwafele tu ‘ehene popepi naKalunga.’ (Jakob 4:8) Natu ka taleni koihopaenenwa imwe oyo idjuu okuuda ko. Ngeenge otwe i konakona, otashi ke tu kwafela tu i ude ko.

OKUKALA PO KWAKALUNGA: Ombibeli otai hongo kutya Kalunga okwa kala ko “alushe fiyo alushe.” (Epsalme 90:2) Noitya imwe, ke na ehovelo ye ke na exulilo. Pataleko lopanhu, ‘omido daye odihapu neenghono itadi dulu okushiivika.’ — Job 36:26, NW.

Nghee to dulu okumona ouwa: Kalunga okwe ku udanekela omwenyo waalushe ngeenge owe mu shiiva. (Johannes 17:3) Mbela eudaneko olo otali dulu ngoo okulineekelwa ngeenge Kalunga mwene ita kala ko fiyo alushe? Onghee hano, “Ohamba yaalushe” oyo ashike tai dulu okuwanifa po eudaneko olo. — 1 Timoteus 1:17, NW.

OMADILADILO AKALUNGA: Ombibeli otai hongo kutya Kalunga ‘omunyenga okukonakonwa’ molwaashi omadiladilo aye oku dule neenghono etu. (Jesaja 40:28; 55:9) Ombibeli oya ti: “Olyelye a shiiva omadiladilo Omwene, e mu longe eendunge?” — 1 Ovakorinto 2:16.

Nghee to dulu okumona ouwa: Kalunga oha dulu okupwilikina komailikano ovanhu omamiliyona poshikando. (Epsalme 65:3) Oha didilike nokuli noshiyandja keshe tashi wile pedu. Mbela omadiladilo aKalunga oha kala mahapu e mu imbe ngeno ehe ku didilike nokuhapwilikine komailikano oye? Hasho, molwaashi omadiladilo aye inaa ngabekwa. Ashike, pataleko laye ovanhu ova fimana ve “dule oiyandja ihapu.” — Mateus 10:29, 31.

EENDJILA DAKALUNGA: Ombibeli otai hongo kutya “omunhu ita koneke oshilonga osho Kalunga ta ningi kehovelo fiyo kexulilo.” (Omuudifi 3:11) Onghee hano, itatu dulu okushiiva keshe shimwe kombinga yaKalunga. Ounongo neendjila daye kape na ou ta dulu ‘oku di shiiva.’ (Ovaroma 11:33) Kakele kaasho, Kalunga okwa halelela okuhololela eendjila daye aveshe ovo va hala oku mu hafifa. — Amos 3:7.

Nghee to dulu okumona ouwa: Ngeenge owa kala ho lesha nokukonakona Ombibeli, oto ke lihonga oinima ipe kombinga yaKalunga neendjila daye. Onghee hano, ohatu dulu okweehena popepi elela naTate yetu womeulu waalushe.

Nonande ope na oinima oyo itatu dulu okushiiva i na sha naKalunga, osho inashi hala kutya itatu dulu oku mu shiiva nandenande. Ombibeli oi na ouyelele muhapu oo tau tu kwafele tu mu shiive nawa. Tala koihopaenenwa imwe:

EDINA LAKALUNGA: Ombibeli otai hongo kutya Kalunga okwe liluka edina. Okwa ti: “Ame Jehova, olo edina lange.” Otali holoka mOmbibeli lwoikando 7 000 lwaapo, li dule omadina aeshe. — Jesaja 42:8, NW.

Nghee to dulu okumona ouwa: Jesus okwa popya meilikano laye olo li shiivike nawa a ti: “Tate yetu ou u li meulu! Edina loye nali yapulwe.” (Mateus 6:9) Mbela naave ito dulu okulongifa edina laKalunga momailikano oye? Jehova okwa halelela okuxupifa keshe oo ta fimaneke edina laye. — Ovaroma 10:13.

OLUKALWA LAKALUNGA: Ombibeli otai hongo kutya ope na eenhele mbali: eulu omo hamu kala oishitwa yopamhepo nosho yo edu oku tu li. (Johannes 8:23; 1 Ovakorinto 15:44) MOmbibeli, oshitya “meulu” otashi ulike monhele omo hamu kala oishitwa yopamhepo. Onghee hano, Omushiti oku li “meulu.” — 1 Eehamba 8:43.

Nghee to dulu okumona ouwa: Paife ou na efano laKalunga la yela momadiladilo. Omushiti ke fi eenghono odo di li apeshe ile mukeshe shimwe.  Jehova Omunhu wolelalela oo ha kala monhele yovenevene. Kakele kaasho, “kape na nande oshishitwa shimwe sha holekwa moipafi yaye.” — Ovaheberi 4:13.

OMAUKWATYA AKALUNGA: Ombibeli otai hongo kutya Jehova oku na omaukwatya mahokwifa. Oya ti: “Kalunga Oye ohole.” (1 Johannes 4:8) Iha fufya. (Titus 1:2) Ke na onhondo, omunefilonghenda, omunanghenda nomunaneni. (Exodus 34:6; Oilonga 10:34) Osha kumwifa ovanhu vahapu eshi Omushiti a hala ‘okweendafana’ ile tu tye okupanga oukaume wopofingo naavo have mu fimaneke. — Epsalme 25:14.

Nghee to dulu okumona ouwa: Oto dulu okuninga kaume kaJehova. (Jakob 2:23) Shimha wa shiiva omaukwatya aye, oto ka dula okuuda ko nawa Ombibeli.

Ombibeli oi na ouyelele wa yela u na sha naJehova Kalunga. Kashi li pandunge okudiladila kutya itatu dulu oku mu shiiva, mepingafano naasho okwa hala u mu shiive. Ombibeli oya udaneka ya ti: “Ove [ngeenge] to mu kongo, oto ke mu mona.” (1 Omafimbo 28:9) Omolwashike ito lesha Ombibeli nokudilonga kuyo opo u shiive nawa Kalunga? Ngeenge owa ningi ngaho, Kalunga ‘ota ka ehena kwoove.’ — Jakob 4:8.

Otashi dulika u lipule kutya, ‘Ongahelipi handi dulu okukala kaume kOmushiti ngeenge nghi udite ko oinima aishe kombinga yaye?’ Diladila kwaashi: Mbela kaume kopofingo kandokotola wokutanda oku na okukala e na odigili? Hasho nandenande! Kaume ka ndokotola oo otashi dulika a kale e na eifano li lili. Ashike otava dulu okupanga oukaume wopofingo. Osho sha fimana oshosho kutya kaume kandokotola oku na okukala e shii omaukwatya a ndokotola, osho e hole naasho e tonde. Sha faafana, oto dulu okulihonga mOmbibeli kutya Jehova omunhu a tya ngahelipi, opo u pange oukaume naye.

Mepingafano nomadiladilo a puka e na sha nOmushiti, mOmbibeli omu na ouyelele oo twa pumbwa opo tu shiive Jehova Kalunga. Mbela owa hala okulihonga shihapu kombinga yaye? Eendombwedi daJehova ohadi konakona Ombibeli novanhu oshali. Ohatu ku shivi u kwatafane nEendombwedi domoshitukulwa sheni ile u tale ko-Web site yetu, www.pr2711.com.