Okulipa oushima otashi dulu okukala omutengi mudjuu kufye. Ohamba David oya shanga ya ti: “Owii wange owa ninginifa omutwe wange, wa fa omutengi mudjuu, wa dula nge eenghono.” (Epsalme 38:4) Ovakriste vamwe ohava kala va wililwa po konghalo oyo inyikifa oluhodi yokulipa oushima, nohava kala va tomhwa kutya Jehova ite va dimine po nandenande. (2 Ovakorinto 2:7) Mbela oshi li ngoo mondjila okufika pexulifodiladilo la tya ngaho? Ngeenge owa nyona enyono la kwata moiti, mbela osho osha hala kutya Jehova ke na ko nasha naave noke na fiku e ku dimine po? Hasho nandenande!

Jehova iha ekeleshi ovanyoni ovo ve livela ombedi. Ponhele yaasho, ohe va kongo! Mefaneko li na sha nomumati a kanene, Jesus okwa yelekanifa Jehova naxe omunahole oo omonamati waye a fiya po oukwaneumbo ndele ta hanauna po emona laye alishe nokukala moulunde. Mokweendelako kwefimbo, omonamati okwa li a tokola a shune keumbo. Ombiibeli oya ti: “Ndele fimbo [omonamati] a li kokule, xe okwe mu mona ndele okwe mu udila onghenda, a tondoka e mu shakeneke ndele okwe mu dingatela kofingo yaye ndele okwe mu fipa komilungu.” (Lukas 15:11-20) Mbela owa hala okweehena popepi naJehova, ndele natango ou udite u “li kokule” naye? Ngaashi xe oo a popiwa mefaneko laJesus, Jehova naye oku ku uditile olune. Okwa halelela oku ku hambelela eshi to alukile kuye.

Ndele ongahelipi ngeenge ou udite kutya Jehova ite ku dimine po molwaashi omanyono oye omahapu nokwa kwata moiti? Tala eshi Jehova te ku lombwele muJesaja 1:18 eshi a ti: “Tu yeni tu ka hokololeni Omwene ta ti: ‘Omatimba eni nande naa tilyane ngaashi ohonde, otaa ka toka ngaashi outokele weemhawe.’” Heeno, nonande omanyono oye otaa monika ngaashi ohonde i li koshikutu shitoka, Jehova ota dulu oku a dima po.

Jehova ina hala u kale to mono oixuna omolweliudo tali ku nyenyetele. Ongahelipi to dulu okumona epepelelo olo hali di mokudiminwa po kuKalunga nokukala u na eliudo la koshoka? Tala keenghatu mbali odo ohamba David ya li ya katuka. Tete oya ti: “Onda hala ndi hepaululile Omwene omanyono ange.” (Epsalme 32:5) Dimbuluka kutya Jehova okwe ku lombwela nale u ye kuye okupitila meilikano nou ka ‘hokolole’ ile mu ka yukife oinima nye naye. Tambula ko elombwelo la tya ngaho. Hepaululila Jehova omanyono nomaliudo oye. Omolwoimoniwa oyo David a pita muyo, okwa li a ilikana kuJehova nelineekelo a ti: ‘Feta po etimba lange. Omutima, ou wa teyauka nowa alamekwa, oo nee Kalunga ito u dini.’ — Epsalme 51:2, 17.

Oshitivali, David okwa li a kwafelwa komuprofeti waKalunga, oo a nangekwa po, Natan. (2 Samuel 12:13) Kunena, Jehova okwa tula po ovakulunhuongalo  momaongalo va deulwa opo va kwafele ovanyoni ovo ve livela ombedi va tungulule ekwatafano lavo naye. Ngeenge owa i u ka konge ekwafo kovakulunhuongalo, otava ka longifa Omishangwa nokwiilikana pamwe naave tashi di komutima, naasho otashi ke ku kwafela opo omutima woye u lotele, u efe po omaliudo oye mai nou veluke pamhepo. — Jakob 5:14-16.

Otashi dulika u kale u udite kutya okuhepaululila Jehova omanyono oye noku ka konga ekwafo kovakulunhuongalo oshinima shidjuu neenghono. David naye okwa li e na omaliudo e li ngaho. Okwa kala i na “hepaulula” omatimba aye oule wefimbo. (Epsalme 32:3) Nokonima yaasho, okwa ka mona ouwa eshi a hepaulula omanyono aye nokulundulula eenghatu daye.

Oshinima shimwe osho David a li a mona ehafo. Okwa shanga a ti: ‘Omunelao oyoo omanyono aye a dimwa po nomatimba aye a tuvikwa.’ (Epsalme 32:1) Okwa ilikana vali a ti: “Omwene, makukifa omilungu dange, okanya ka udife efimano loye.” (Epsalme 51:15) David okwa li e linyengifwa a lombwele ovanhu kombinga yaJehova konima eshi a pepelelwa nokwa pandula eshi e mu dimina po.

Jehova okwa hala naave u kale wa pepelelwa nou kale neliudo la koshoka. Okwa hala u lombwele ovanhu nehalo liwa nonehafo kombinga yaye nosho yo omalalakano aye, ndele hanomaliudo mai. (Epsalme 65:1-4) Dimbuluka eendjovo odo tadi ti: “Nye mu lialuluke, omatimba eni opo a dimwe po, opo nee koshipala shOmwene [taku di] omafimbo omahekeleko.” — Oilonga 3:19, 20.

Osho osha li sha ningilwa Martha. Okwa ti: “Omonamati wange okwa kala nokutumina nge oifo yo-Awake! nOshungonangelo. Kanini nakanini, onda hovela vali okukala nekwatafano naJehova. Oshinima osho sha li unene shidjuu kwaame eshi nda li handi kendabala okwaalukila kuJehova oku mu pula a dimine nge po omanyono ange aeshe. Ashike xuuninwa, onda ilikana noku mu pula a dimine nge po. Oshidjuu okwiitavela kutya opa pita omido 40 inandi alukila kuJehova. Oshimoniwa shange osha ulika kutya nonande opa pita omido dihapu, omunhu ota dulu okwaalukila kuKalunga noku mu longela nokukala e mu hole natango.”