Mbela owa didilika ngoo momafano oo e li moshishangomwa eshi kutya Eendombwedi daJehova ohadi kala da djala nawa pokwoongala kwado? Omolwashike mbela hadi liwapeke nokudjala nawa?

Ohadi shi ningi opo di fimanekife Kalunga. Oshoshili kutya Kalunga iha yukifa unene elitulemo keholokepo lomunhu lokombada. (1 Samuel 16:7) Ndele ngeenge hatu i kokwoongala kwetu, ohatu kala twa hala okuulika kutya otwa fimaneka shili Kalunga oo hatu longele nosho yo ovaitaveli vakwetu. Natu tye nee ngeno ohatu ka holoka koshipala shohamba ile shomupresidende; nopehe na omalimbililo, ohatu ka ya twe liwapeka notwa djala nawa opo tu ulike kutya otwa fimaneka omunenenhu a tya ngaho. Sha faafana, ngeenge hatu i kokwoongala twa djala nokuliwapeka nawa, ohatu ulike kutya otwa fimaneka shili “ohamba yoiwana,” Jehova Kalunga, nosho yo onhele omo hatu mu longele. — Jeremia 10:7.

Otashi ulike yo kutya ohatu kala metwokumwe nomifikamhango dopaKriste. Ombibeli otai ladipike Ovakriste va kale hava djala “noshishohoni noukoshoki,” opo va ulike kutya “vo oonakutilakalunga.” (1 Timoteus 2:9, 10) Okudjala “noshishohoni” otashi ti okuhenuka okudjala oikutu yokuliulika, tai limonikila ile tai pendula okahalu komilele. Outumbulilo okudjala “noukoshoki” owa hala okutya katu na okudjala omuxwanaxwanena ile okudjala oikutu inai filwa oshisho. Ndele osho itashi tu imbi tu djale meenghedi da yoolokafana; ohatu dulu okuhoolola oikutu yomaludi e lili noku lili oyo tai wapalele Ovakriste. Onghedi omo hatu djala ile hatu liwapeke otai dulu ‘okuwapeka elongo laKalunga’ nokuningifa vamwe ve mu “hambelele.” (Titus 2:10; 1 Petrus 2:12) Osha yela kutya onghedi omo hatu djala ngeenge hatu i kokwoongala otai dulu okunwefa mo etaleko lavamwe li na sha nelongelokalunga letu.

Ndele nonande ku na oikutu iwaiwa, oto dulu ashike okuuya kokwoongala kwetu. Opo eholokepo lomunhu li kale tali wapalele ile opo a ulike kutya okwa koshoka, itashi ti kutya okwa pumbwa okukala ha djala oikutu yondilo ile youdjeko.

• Omolwashike sha fimanenena okukala hatu djala nawa ngeenge hatu i kokwoongala?

• Omafinamhango elipi tae tu kwafele tu kale hatu liwapeke nokudjala nawa?