“Onda kala nde i teelela oule womido 19!” Mbela omumwatate oo okwa kala a teelela shike? Okwa kala a teelela Ombiibeli yEtoloko lounyuni mupe lOmishangwa dopaKriste dOshigreka melaka laye loshidalelwamo, Oshibengali. Ovanhu vahapu osho have linyenge ngaho ngeenge o-New World Translation ya pitifwa momalaka avo. Ashike mbela owe lipulile ngoo nale kutya oshike sha kwatelwa mo mokutoloka nokupilinda Eembiibeli?

 Tete, ohaku hoololwa ospana yokutoloka oyo hai kala koshi yewiliko lOkomitiye yOkushanga yOlutuwiliki. Mbela ohashi pula efimbo li fike peni opo ospana i toloke Ombiibeli? Omumwatate Nicholas Ahladis, oo ha longo kOshikondo shOkutoloka koWarwick, New York, okwa popya a ti: “Ope na oinima ihapu ya kwatelwa mo, ngaashi kutya ovatoloki vangapi tava ka kufa ombinga moprojeka oyo, oudjuu welaka, eshiivo lovaleshi li na sha noinima yopaMbiibeli nosho yo ngeenge elaka ola yooloka she likolelela koitukulwa. Ohashi pula ospana oule wodula, ile nhatu lwaapo okutoloka Omishangwa dopaKriste dOshigreka nosho yo eedula nhee, ile di dulife po okutoloka Ombiibeli aishe. Ohashi pula efimbo lile oku i toloka momalaka okuudika.”

 Kakele kospana yokutoloka, opa pumbiwa yo ovanhu vamwe. Opa pumbiwa ongudu yovaleshululi ovo va dja momaputuko a yoolokafana, nomafimbo amwe tashi dulika nokuli va dje koilongo ya yoolokafana opo va leshulule osho sha tolokwa, nohave shi ningi nopehe na okufutwa. Omatyekosha avo ohaa kwafele ovatoloki va toloke Ombiibeli i li paushili, ya yela noi na eityo. Ngaashi omudeuli umwe weespana dokutoloka Ombiibeli moSouth Africa a ti, “ovatoloki ove udite ve na oshinakuwanifwa shinene kuJehova nosho yo kovaleshi vEendjovo daye.”

 Konima yokutoloka, Eembiibeli odi na okupilindwa nokutulwa kumwe. Opo osho shi ningwe, ovo hava longo koshinyanyangido ova pumbwa oinima i li omulongo lwaapo: eembapila, ohinga, oinima yokutula kumwe oshipeko, olaima, okalapi komeni loshipeko, oshipeko shokombada, oungodi, okalapi kokukwatela kumwe omapandja, omulenge woshipeko shembo, noinima yokutula kumwe omapandja. Mo 2019, okwa longifwa omamiliyona eedola daNamibia e dulife 292 opo ku landwe oilongifo yokupilindifa Eembiibeli. Ovo hava longo koshinyanyangido ova longa eevili di dulife 300 000 momukokomoko wodula oyo opo va pilinde nokutuma Eembiibeli.

 Omolwashike hatu longifa oimaliwa neevili dihapu moilonga oyo? Joel Blue, oo ha longo kOshikondo shOkupilinda shOmounyuni aushe, okwa ti: “Ombiibeli oi li oshishangomwa sha fimanenena osho hatu pilinda. Otwa hala eholokepo layo li fimanekife Kalunga oo hatu longele nosho yo etumwalaka olo hatu udifa.”

 Kakele kokutoloka nokupilinda o-New World Translation, ohatu tolokele yo ovo ve na eemhumbwe de likalekelwa. Pashihopaenenwa, o-New World Translation meendada doshipofi oi li momalaka omulongo. Ombiibeli imwe meendada doshipofi ohai pula oule weevili hetatu okutulwa kumwe, nomambo mahapu a tulwa kumwe ohaa pula onhele i fike peemeta 2,3. Ohatu pilinda yo Eembiibeli odo di na oipeko yeembapila omolwovanadolongo, molwaashi odo ashike hadi pitikilwa meedolongo.

 O-New World Translation oya kuma eenghalamwenyo dovaleshi vahapu. Diladila keongalo lelaka lOshikiluba moTombe, moDemocratic Republic of Congo. Tombe oshi li kokule neekilometa 1 700 noshilandopangelo. Eendombwedi oda li ashike di na Ombiibeli imwe oyo ya li melaka lOshikiluba shikulu. Ovamwatate ova li have li pe omalufo okulongifa Ombiibeli oyo opo ve lilongekidile oitukulwa yokwoongala. Ashike muAuguste 2018, o-New World Translation ye li xwa po oya li ya tolokwa melaka lOshikiluba olo hali popiwa kunena, nakeshe umwe oku i na meongalo.

 Omumwameme umwe Omundowishi okwa popya shi na sha no-New World Translation melaka laye a ti: “Ihandi kala vali ndi udite kutya ondi na okulesha Ombiibeli. Ponhele yaasho, ohandi lipula kutya, ‘Mbela onaini vali handi dulu okulesha shihapu?’” Omunadolongo umwe okwa shanga a ti: “Onda pewa o-New World Translation, notai lundulula onghalamwenyo yange. Paife Eendjovo daKalunga ondi di udite ko nawa konima eshi nda lesha etoloko eli. Onda hala okushiiva shihapu kombinga yEendombwedi daJehova nokuninga umwe womuvo.”

 Ovaleshi aveshe vo-New World Translation ove na olupandu linene omolwomayambidido oku i nyanyangida. Omayambidido oo oilonga yomounyuni aushe ohaa yandjwa okupitila meenghedi odo tadi hangwa ko donate.pr2711.com. Natu mu pandule unene kehalo leni liwa.