Mo 17 Juni 2024, Omundokotola Omuamerica Vivek Murthy, okwa popya moshifokundaneki sho-New York Times, a ti: “Oupyakadi wopamadiladilo ou li oupyakadi munene, oo u li unene movanyasha, nomakwatafano opaintaneta oku li shimwe shomoyeetifi youpyakadi wa tya ngaho.”

 Ongahelipi ovadali tava dulu okwaamena ovana vavo koiponga oyo hai etifwa komakwatafano opaintaneta? MOmbiibeli omu na omayele taa kwafele.

 Konakona omafinamhango taa shikula:

 “Omunaendunge oha konakona eenghatu daye adishe.” — Omayeletumbulo 14:15.

 Ino kala u udite kutya okaana koye oke li konima yefiya, ngeenge ino ka efa ka longife omakwatafano opaintaneta, molwaashi ota ka dulu okunwefwa mo nai. Ofimbo ino pitika okaana koye ka longife omakwatafano opaintaneta, shilipaleka kutya oha ka dulika komangabeko oo we ka tulila po, ha ka pange oukaume novanhu ovo ke shii nawa noha ka henuka okutala oinima oyo inai koshoka.

•   Opo u lihonge shihapu, lesha oitukulwa ei: “Should My Child Use Social Media?” nosho yo “Teaching Your Teenager Social Media Safety.”

 “Longifeni nawa efimbo.” — Ovaefeso 5:16.

 Ngeenge owa pitike okaana koye ka kale ha ka longifa omakwatafano opaintaneta, ka tulila po eemhango nghee ke na oku a longifa noku ka yelifila nghee eemhango odo tadi dulu oku ka amena. Kala okamutwevandu nokukala ho konakona ngeenge okaana koye ota ka ulike elihumbato, olo tali ulike kutya owa pumbwa oku ka tulila po omangabeko e na sha nokulongifa omakwatafano opaintaneta.

•   Longifa ouvidio vokufaneka koupelende, ngaashi Lungamena omakwatafano opaintaneta, opo u kwafele okaana koye ka ude ko kutya omolwashike ka pumbwa okutulilwa po omangabeko.

 Ombiibeli oya popya kutya otu li ‘momafimbo madjuu okukaliwa muo.’ (2 Timoteus 3:1-5) Ashike otai yandje yo omayele taa longo, oo taa dulu oku tu kwafela tu lididimike. Moshitukulwa eshi otamu hangwa omusholondodo womayele e dulife po 20 a kanghamena kOmbiibeli, oo taa dulu okukwafela ovadali nosho yo ovana vavo ve lihonge kombinga youdu wopamadiladilo movanyasha.