Жоқ. Адамның қашан өлетіні алдын ала белгіленбеген. Киелі жазбаларда адамның маңдайына тағдыры жазылып қояды деп айтылмаған. Адамдар көбінде “кездейсоқ жағдайлардың” кесірінен қайтыс болып жатады (Уағыздаушы 9:11).

Неге онда Киелі кітапта “қайтыс болатын уақыт” бар деп айтылған?

 Уағыздаушы 3:2-де “өз уақыттары бар туудың әрі қайтыс болудың, Тұқым себудің әрі тамырымен жұлудың” деген сөздер жазылғаны рас (“Жаңа өмір” баспасы). Осы сөздердің жан-жағындағы тармақтарды қарасақ, мұнда өмірде қайталана беретін құбылыстар туралы айтылғанын түсінеміз (Уағыздаушы 3:1—8). Құдай Тағала диқанның тұқым себетін күнін белгілемейтініндей, адамның да қайтыс болатын күнін белгілеп қоймаған. Бұл үзіндінің негізгі ойы — күйбең тірлікке басымызбен кіріп кетіп, Жаратушымызға жақындауға уақыт таппай қалудан сақтандыру (Уағыздаушы 3:11; 12:1, 13).

Өміріңіз ұзақ болсын десеңіз...

 Қанша өмір сүретініміз белгісіз болса да, ақылмен шешім қабылдайтын болсақ, өмірімізді ұзарта аламыз. Киелі кітапта: “Дананың тәлімі — өмірдің қайнар көзі, Ол өлімнің тұзағынан құтқарар”,— деп айтылған (Нақыл сөздер 13:14). Бұрын Мұса пайғамбар да Исраил халқына Құдайдың бұйрықтарын орындаса, “ғұмырлары ұзақ болатынын” айтқан (Мұсаның 5-жазбасы 6:2). Ал адам жамандық жасап, ақылсыз әрекет қылса, өз өмірін өзі қысқартады (Уағыздаушы 7:17).

 Бірақ қанша жерден ақылмен әрекет етіп, абай жүрсек те, өлімнен қашып құтыла алмаймыз (Римдіктерге 5:12). Бір қуаныштысы — жақында бұл да өзгереді. Себебі Құдай Сөзі “енді қайтып өлім болмайтын” заман келе жатыр деп уәде етеді (Аян 21:4).