UKIUT qulit matuma siorna aappariit Gregorio aamma Marilou 30-t sinnerlugit ukiullit Manilami ulloq naallugu sulinermik saniatigut pioneritut kiffartorput. Tamanna unamminiarnaraluartoq ingerlalluarput. Taava Marilou suliffimmini aningaaserivimmi pisortanngorpoq. Ima oqarpoq: “Atorfigissaarnitta ilorrisimaarnartumik inuuneqalersippaatigut.” Aappariit ima aningaasarsiorluartigaat allaat Manilamit kangimut 19 kilometerisut ungasitsigisumi illoqarfiup immikkoortuani pilerineqartumi pilerigisaminnik illuliortitsillutik. Sanaartugassanik suliassinneqartartoq illuliornissamik aamma ukiuni qulini qaammatit tamaasa akilersuinissaminnik isumaqatigiissuteqarput.

Marilou ima oqaluttuarpoq: “Atorfittaara piffissartornarlunilu nukinnik atuinangaarmat anersaakkut ittunik aallussilluarpallaarunnaarpunga. Jehovamit tillittutullusooq misigivunga.” Ima nassuiaavoq: “Piffissaq Jehovamut kiffartornermut immikkoortissimasara taassumunnga tunniussinnaajunnaarpara.” Gregoriop aamma Mariloup atukkatik nikallungassutigigamikkit  inooriaaserilersimasartik ullut ilaanni oqaloqatigiissutigaat. Gregorio ima oqarpoq: “Allannguerusukkaluarpugut, qanorpiarli iliussanerluta nalullugu. Inuunerput Jehovamut kiffartornitsinni, ingammik meeraqannginnitsinni, tamakkiisumik qanoq atussanerlugu oqaloqatigiissutigaarput. Jehovamut siulersoqqulluta qinuvugut.”

Tamatuma nalaani sumiiffinni oqaluussisartunik pisariaqartitsiffiunerusuni kiffartorneq pillugu oqalugiaatit arlallit tusarnaarpaat. Gregorio ima oqarpoq: “Misigivugut oqalugiaatit taakku aqqutigalugit Jehovap qinnutivut akigai.” Aappariit eqqortunik aalajangiisarnissamut sapiissuseqarumallutik uppersuseqarnerulernissartik qinnutigaat. Illuliortitsinertik ajornartorsiutiginerpaavaat. Akilersugassat pingajorarterutaat akilereersimavaat. Qanoq-una iliorniassappat? Marilou ima oqarpoq: “Isumaqatigiissuterput taamaatiinnarutsigu akiliutivut tamarluinnaasa — aningaasarpaaluit — annaassavavut. Tamannali Jehovap piumasaanik imaluunniit uagut nammineq kissaatigisatsinnik salliutitsinissatsinnik toqqaasariaqarnitsitut isigaarput.” Apustilip Paulusip ‘annaasaqarneq’ pillugu oqaaserisimasai eqqaallugit illuliortitsinertik unitsippaat, suliffimminnit soraarput, pigisatik amerlanerpaartaat tunivaat illoqarfeeqqamullu avinngarusimasumut qeqertamut Palawanimut, Manilamit kujammut 480 kilometerisut ungasitsigisumut, nuupput. — Fil 3:8.

Gregorio aamma Marilou nuunnissartik sioqqullugu pilimanianngitsumik inuulernissaminnut piareersaraluarput, nuuffissaminnulli tikikkamik aatsaat paasivaat qanoq pilimanianngitsigisumik inuuneqalertussaallutik. Marilou ima oqarpoq: “Innaallagiaqaranilu nutaalianik atortorissaaruteqanngimmat tupaallaqaagut. Nutaaliamik igaffeqannginnatta iganiaraangatta qisuttaqqaarluta ikumatitsisarpugut. Pisinniarfilerineq, neriniartarfimmut neriartortarneq illoqarfissuarmilu inuunermut ilaasut allat maqaasivakka.” Taamaattoq aappariit nuunnerminnut pissutaasoq eqqaamaniartuarpaat, sivitsunngitsorlu najukkaminnik sungiussipput. Marilou ima oqarpoq: “Maanna pinngortitarsuarmik, soorlu unnukkut ullorissanik kusanaqisunik, qimerluuisarneq nuannaarutigaara. Tamanilli pingaarnertut inuit oqaluussiffigisatta nuannaarpasinnerat qiimmattaatigisarpara. Maani kiffartornitsigut nalerisimaarnissap ‘isertugaa paasivarput’.” — Fil 4:12, NW.

Gregorio ima oqaluttuarpoq: “Tikeqqaaratta nalunaajaasut sisamaannaapput. Sapaatit-akunneri tamaasa oqalugiartalernera erinarsuutinullu Naalagaaffilersaarutinut guitarerlunga ingiuisalernera nuannaarutigingaarpaat.” Aappariit oqaluussisartoqatigiit ilaaffigisaat ukiup ataatsip ingerlanerani ilagiinngorput ingerlalluartut 24-nik oqaluussisartullit. Gregorio ima oqarpoq: “Ilagiinneersunit asannittuliorfigineqarnerput killitsissutigeqaarput.” Ullumikkut sumiiffimmi avinngarusimasumi ukiuni arfinilinni kiffartoreernertik eqqarsaatigalugu ima oqarput: “Soqutiginnittut ilagiinnut ilaalernerannik nuannaarutiginninnerput tamanit nallernissaqanngilaq.  Inuunerput aatsaat taama siunertaqartigilerpoq.”

Filippinerini qatanngutit 3000-t missaanniittut sumiiffinnut oqaluussisartunik pisariaqartitsiffiunerusunut nuussimapput. Taakkunannga 500-t missaat qatanngutaapput arnat kisimiittut. Karen assersuutigeriartigu.

Karen, maanna 20-t sinnerlugit ukiulik, Baggaomi Cagayanimiittumi peroriartorpoq. Inuusuttuaraalluni kiffartornermini iliuuseqarnerunissani eqqarsaatigisarsimavaa. Ima oqaluttuarpoq: “Piffissap sivikillinera inuillu nunanit tamaneersut Guutip naalagaaffianik tusarliussassamik pisariaqartitsinerat ilisimagakku sumiiffimmi oqaluussisartunik pisariaqartitsiffiunerusumi kiffartorusuppunga.” Karen ilaquttami ilaannit avinngarusimasumut nuunnani qaffasissumik ilinniagaqarnissaminut kajumissaarneqaraluarluni Jehovamut siulersoqqulluni qinuvoq. Avinngarusimasumi kiffartortut aamma oqaloqatigai. 18-inik ukioqarluni sumiiffimmut avinngarusimasumut, peroriartorfimminit 64 kilometerisut ungasitsigisumiittumut, nuuppoq.

Karenip ilagiit tapersersoriartugai qaqqartuumi Manerassuarmut sinerialimmiittumi oqaluussiffigisartagaqarput. Karen ima oqaluttuarpoq: “Baggaomiit ilagiinnut pilersinneqaqqammersumukarniarluta ulluni pingasuni pisulluta qaqqarsuit itivittarlugillu 30-riarluta kuussuit ikaartarpavut.” Ima nangippoq: “Biibilimik atuaqqissaaqatigisartakkama ilaat orninniarlugit nalunaaquttap-akunnerini arfinilinni pisuttarpunga taakkunanilu unnueriarlunga aqaguani aamma nalunaaquttap-akunnerini arfinilinni angerlamut pisuttarlunga.” Ilungersuanera asuliinnarsimava? Karen qungujorujussuarluni ima oqarpoq: “Ilaannikkut nissukka annernartaqaat.” Tamannali soqutaanngitsutut isigaa ima nangikkami: “Katillugit 18-inik Biibilimik atuaqqissaaqateqartarnikuuvunga. ‘Usserpara takullugulu Jehova ajunngitsuusoq’!” — Tuss 34:9.

Sukhip, qatanngutip arnap kisimiittup 40-t sinnilaarlugit ukiullip USA-meersup, Filippinerinut nuunnissaminut suna kajumississutigaa? 2011-mi ataatsimeersuaararnermi aappariit apersorneqarmata najuuppoq. Aappariit taakku oqaluttuarput Mexicomi oqaluusseqataarusukkamik pigisamik amerlanerpaartaat tunisimallugit. Sukhi ima oqarpoq: “Apersuinermi tamatumani anguniagassanik siornatigut eqqarsaatiginikuunngisannik eqqarsaatissinneqarpunga.” Sukhip, Indiamiunik nagguillip, Filippinerini punjabimiusut oqaluttunut oqaluussisoqarnissaanik pisariaqartitsisoqartorujussuunera paasigamiuk Filippinerinut nuunniarluni aalajangerpoq. Unamminiarnartunik nalaataqarpa?

Sukhi ima oqarpoq: “Pigisat sorliit pigiinnassanerlugit sorliillu tuniniassanerlugit aalajangernissaq ilimagisannit sapernarneruvoq. Ukiut 13-it nammineq inigisanni ilorrisimaarlunga inooreerlunga ilaquttannut  nuukkallarpunga. Tamanna oqitsuinnaanngilaq, pilimanianngitsumilli inuulernissannut piareersaataalluarpoq.” Filippinerinut nunassikkami unamminiarnartunik sunik nalaataqarpa? “Uumasuarsunnik ersigisaqarnera angerlarserneralu uannut unamminiarnarnerpaapput. Jehova aatsaat taama tatigitigilerpara!” Pinertusaarnera asuliinnarsimava? Sukhi qungujulluni ima oqarpoq: “Jehovap ima oqarfigaatigut: ‘Misilinniarsinga pilluaatissanik killeqanngitsunik kueraaffigissannginnerissi.’ Oqaatsit taakku ilumoornerat paasivara pulaakkama ima aperimmanga: ‘Qaqugu uteqqissavit? Suli apeqqutissarpassuaqarpunga.’ Inunnik anersaakkut kaattunik ikiuisinnaanera nuannaarutigalugulu nalerisimaarutigeqaara!” (Mal 3:10) Sukhi ima nangippoq: “Nuunnissaq pillugu aalajangerniarneq sapernarnerpaavoq. Aalajangereernerma kingorna Jehovamit isumagineqarnera misigalugu tupinnarluinnarpoq.”

Sime, qatanngut angut katisimasoq maanna 40-t pallillugit ukiulik, akissarsiagissaarnartumik atorfinitsinneqarami Filippineriniit nunamut Kangiani Qiterlermiittumut nuuppoq. Nooreerluni ilagiinnik nakkutilliisumit aamma Siulersuisoqatigiinnut ilaasortap oqalugiaataanit inuunermini Jehovamik salliutitsinissaminut kajumissisinneqarpoq. Sime ima oqarpoq: “Atorfinniilli soraarnissara annilaangatigeqaara.” Taamaakkaluartoq suliffimminit soraarpoq Filippinerinullu uterluni. Ullumikkut Sime nulianilu, Haidee, Filippinerit kujataatungaani angalaarfigisartakkami isorartuumi oqaluussisartunik pisariaqartitsiffiusumi Davao del Surimi kiffartorput. Sime ima oqarpoq: “Pisut kingumut eqqarsaatigalugit suliffinnit soraarnissannik ernummatiginnikkunnaarsimanera Jehovamillu salliutitsilersimanera nuannaarutigeqaara. Pitsaanerpaanik Jehovamut tunniussineq inuunermi nalerisimaarnarnerpaavoq!”

Ramilop Julietillu, aappariit pioneriusut 30-t sinnilaarlugit ukiullit, paasigamikku ilagiit angerlarsimaffimminnit 30 kilometerisut ungasitsigisumiittut ikiorneqarnissaminnik pisariaqartitsisut ikiuiartornissaminnik neqeroorput. Taamaattumik sapaatit-akunneri tamaasa arlaleriarlutik Ramilo Julietilu, silap qanoq innera apeqqutaatinnagu, motorcykelerlutik ataatsimiigiartarlutillu oqaluusseqataajartortarput. Naak aqqulluttukkut ikaartarfitsigullu nivingasukkut ingerlaarnissaq unamminiarnaraluartoq kiffartornerminni iliuuseqarnerunertik nuannaarutigaat. Ramilo ima oqarpoq: “Nuliaralu katillugit aqqanilinnik Biibilimik atuaqqissaaqateqartarpugut! Sumiiffimmi oqaluussisartunik pisariaqartitsiffiunerusumi kiffartorneq pilliuteqarnaraluartoq nalerisimaangaalersitsisarpoq!” — 1 Kor 15:58.

Illit najukkanni allamiluunniit naalagaaffimmik oqaluussisartunik pisariaqartitsiffiusumi kiffartorneq pillugu paasisaqarnerorusuppit? Taamaappat ilagiinni nakkutilliisoq angalasartoq oqaloqatigiuk, aamma Guutip naalagaaffianut kiffartorneq-mi aggusti 2011-moortumi allaaserisaq “‘Makedoniamut ikaarsinnaavit’?” atuaruk.