ចម្រៀងសរសើរព្រះ ១៣៥:១-២១
១៣៥ ចូរសរសើរយ៉ា!*
ចូរសរសើរដល់នាមព្រះយេហូវ៉ាឱអស់អ្នកដែលបម្រើព្រះយេហូវ៉ាអើយ ចូរសរសើរតម្កើងលោក+
២ អស់អ្នកដែលបម្រើនៅក្នុងវិហាររបស់ព្រះយេហូវ៉ាគឺនៅក្នុងទីធ្លាវិហារនៃព្រះរបស់យើង+
៣ ចូរសរសើរយ៉ា ដោយសារយេហូវ៉ាជាព្រះដ៏ល្អ។*+
ចូរច្រៀង*សរសើរតម្កើងនាមរបស់លោក ព្រោះនោះនាំឲ្យរីករាយត្រេកអរ។
៤ ព្រោះយ៉ាបានជ្រើសរើសយ៉ាកុបទុកសម្រាប់លោកគឺបានយកអ៊ីស្រាអែលទុកជាទ្រព្យវិសេសរបស់លោក។+
៥ ព្រោះខ្ញុំដឹងច្បាស់ថាព្រះយេហូវ៉ាអស្ចារ្យខ្លាំងណាស់ម្ចាស់របស់យើងអស្ចារ្យលើសអស់ទាំងព្រះឯទៀត។+
៦ ព្រះយេហូវ៉ាធ្វើអ្វីៗតាមដែលលោកពេញចិត្ត+ទាំងនៅស្ថានសួគ៌ នៅផែនដី ក្នុងសមុទ្រ និងក្នុងទីជ្រៅទាំងអស់។
៧ លោកបណ្ដាលឲ្យពពក*ឡើងពីចុងផែនដីលោកធ្វើឲ្យមានផ្លេកបន្ទោរជាមួយនឹង*ភ្លៀងលោកនាំខ្យល់ចេញពីឃ្លាំងរបស់លោក។+
៨ លោកសម្លាប់កូនច្បងរបស់អេហ្ស៊ីបគឺសម្លាប់កូនច្បងរបស់មនុស្សនិងរបស់សត្វ។+
៩ លោកធ្វើការអស្ចារ្យនិងអព្ភូតហេតុផ្សេងៗនៅអេហ្ស៊ីប+នៅចំពោះមុខផារ៉ូនិងអ្នកបម្រើទាំងអស់របស់គាត់។+
១០ លោកប្រល័យជីវិតប្រជាជាតិជាច្រើន+ហើយសម្លាប់បណ្ដាស្ដេចដ៏ខ្លាំងក្លា+
១១ គឺស៊ីហុនជាស្ដេចរបស់ជនជាតិអាម៉ូរី+អុកជាស្ដេចរបស់តំបន់បាសាន+និងបំផ្លាញរាជាណាចក្រទាំងប៉ុន្មានរបស់ស្រុកកាណានចោលគ្មានសល់។
១២ លោកប្រគល់ទឹកដីរបស់ជនជាតិទាំងនោះឲ្យដល់អ៊ីស្រាអែលជារាស្ត្ររបស់លោកទុកជាមត៌ក។+
១៣ ឱព្រះយេហូវ៉ា នាមរបស់លោកនៅជាប់ជារៀងរហូត។
ឱព្រះយេហូវ៉ាអើយ កិត្តិនាមរបស់លោក*នៅស្ថិតស្ថេរគ្រប់ជំនាន់តទៅ។+
១៤ ព្រោះព្រះយេហូវ៉ានឹងការពារ*រាស្ត្ររបស់លោក+ហើយលោកនឹងអាណិតអាសូរ*ដល់អ្នកបម្រើរបស់លោក។+
១៥ រូបព្រះរបស់ប្រជាជាតិនានាសុទ្ធតែធ្វើពីប្រាក់និងមាសដែលជាស្នាដៃរបស់មនុស្ស។+
១៦ រូបព្រះទាំងនោះមានមាត់ តែមិនអាចនិយាយ+មានភ្នែក តែមើលមិនឃើញ។
១៧ មានត្រចៀក តែស្ដាប់មិនឮមានច្រមុះ តែគ្មានដង្ហើម។+
១៨ មនុស្សដែលធ្វើរូបព្រះទាំងនោះ និងអស់អ្នកដែលទុកចិត្តរូបទាំងនោះនឹងបានដូចជារូបទាំងនោះដែរ។+
១៩ ឱកូនចៅអ៊ីស្រាអែលអើយ ចូរសរសើរព្រះយេហូវ៉ាឱកូនចៅអេរ៉ុនអើយ ចូរសរសើរព្រះយេហូវ៉ា។
២០ ឱកូនចៅលេវីអើយ ចូរសរសើរព្រះយេហូវ៉ា+អស់អ្នកដែលកោតខ្លាចព្រះយេហូវ៉ាអើយ ចូរសរសើរព្រះយេហូវ៉ា។
២១ សូមឲ្យព្រះយេហូវ៉ាបានទទួលការសរសើរពីស៊ីយ៉ូន+លោកជាព្រះដែលនៅក្នុងយេរូសាឡិម+សូមសរសើរតម្កើងយ៉ា!+
កំណត់សម្គាល់
^ ឬ«ហាឡេលូយ៉ា!»។ «យ៉ា»ជាឈ្មោះកាត់របស់ព្រះយេហូវ៉ា
^ ឬ«ព្រះដែលមានគុណធម៌»
^ ឬ«លេងភ្លេង»
^ ឬ«ចំហាយ»
^ ឬប្រហែលជាមានន័យថា«ធ្វើឲ្យមានទ្វារទឹកសម្រាប់»
^ ឬ«នាមរបស់លោក»។ ន័យត្រង់«សេចក្ដីនឹកចាំអំពីលោក»
^ ឬ«មានអារម្មណ៍សោកស្ដាយ»
^ ឬ«តស៊ូការពារក្ដីឲ្យ»
