ចម្រៀងសរសើរព្រះ ៨០:១-១៩
ជូនចំពោះមេភ្លេង សូមលេងតាមលំនាំភ្លេង«លីលី»។ ទុកជាសេចក្ដីរំលឹក។ ទំនុករបស់អេសាភ។+
៨០ ឱព្រះជាគង្វាលនៃអ៊ីស្រាអែលអើយជាព្រះដែលអង្គុយពីលើ*ចេរូប៊ីន+និងជាអ្នកដឹកនាំយ៉ូសែប ដូចគង្វាលដឹកនាំហ្វូងចៀម+សូមមេត្តាស្ដាប់ សូមមេត្តាបញ្ចេញពន្លឺរបស់លោកមក។
២ សូមលោកបង្ហាញឫទ្ធានុភាពខ្លាំងក្លារបស់លោក+នៅចំពោះមុខអេប្រាអ៊ីម បេនយ៉ាមីន និងម៉ាណាសេ។
សូមលោកមកសង្គ្រោះយើងផង។+
៣ ឱព្រះអើយ សូមទទួលស្គាល់យើងដូចកាលពីដើមវិញ+សូមបង្ហាញសេចក្ដីមេត្តាករុណាចំពោះយើង ដើម្បីយើងអាចទទួលសេចក្ដីសង្គ្រោះ។+
៤ ឱព្រះយេហូវ៉ាជាព្រះនៃបណ្ដាកងទ័ពស្ថានសួគ៌ តើលោកនឹងខឹងហើយមិនព្រមស្ដាប់សេចក្ដីអធិដ្ឋានរបស់រាស្ត្រលោករហូតដល់ពេលណា?+
៥ លោកឲ្យពួកគេបរិភោគទឹកភ្នែកជំនួសអាហារហើយលោកឲ្យពួកគេផឹកទឹកភ្នែកច្រើនក្រៃលែង។
៦ លោកឲ្យអ្នកជិតខាងរបស់យើងឈ្លោះប្រកែកគ្នាអំពីយើងពួកសត្រូវចំអកមើលងាយយើងតាមចិត្ត។+
៧ ឱព្រះនៃបណ្ដាកងទ័ពស្ថានសួគ៌ សូមទទួលស្គាល់យើងដូចកាលពីដើមវិញសូមបង្ហាញសេចក្ដីមេត្តាករុណាចំពោះយើង ដើម្បីយើងអាចទទួលសេចក្ដីសង្គ្រោះ។+
៨ លោកបានធ្វើឲ្យវល្លិទំពាំងបាយជូរ+ចាកចេញពីស្រុកអេហ្ស៊ីបលោកបានបណ្ដេញប្រជាជាតិនានាឲ្យចេញទៅ ហើយដាំដើមនោះវិញ។+
៩ លោកសម្អាតដីទុកសម្រាប់ដាំវល្លិទំពាំងបាយជូរហើយដើមនោះចាក់ឫសបែកមែកដុះពាសពេញដី។+
១០ ម្លប់ដើមនោះបានគ្របលើភ្នំទាំងឡាយហើយមែករបស់វាក៏គ្របលើដើមស៊ីដាររបស់ព្រះដែរ។
១១ មែកដើមនោះលូតរហូតដល់សមុទ្រហើយក៏លាស់ទៅដល់ទន្លេ។*+
១២ ហេតុអ្វីបានជាលោកបំផ្លាញរបងថ្មចម្ការទំពាំងបាយជូរ+ដើម្បីឲ្យអស់អ្នកដែលដើរកាត់បេះផ្លែវាដូច្នេះ?+
១៣ ជ្រូកព្រៃមកឈ្មុសកម្ទេចចម្ការទំពាំងបាយជូររីឯសត្វព្រៃវិញនាំគ្នាមកស៊ីបង្ហិនផលផ្លែទាំងនោះ។+
១៤ ឱព្រះនៃបណ្ដាកងទ័ពស្ថានសួគ៌ សូមត្រឡប់មកវិញសូមលោកមើលពីស្ថានសួគ៌មក!
សូមលោកមេត្តាថែរក្សាវល្លិទំពាំងបាយជូរនេះផង។+
១៥ នេះជាដើមដែលលោកបានដាំដោយដៃស្ដាំរបស់លោក+សូមលោកមើលមកវល្លិខ្ចី*ដែលលោកផ្ទាល់បានធ្វើឲ្យរឹងមាំ។+
១៦ ដើមនោះត្រូវកាប់ ហើយដុតចោល។+
ក្នុងពេលដែលលោកស្ដីបន្ទោស ពួកគេក៏វិនាសទៅ។
១៧ សូមលោកប្រើដៃជួយអ្នកដែលនៅខាងស្ដាំដៃរបស់លោកគឺជួយកូនមនុស្សដែលលោកផ្ទាល់បានធ្វើឲ្យរឹងមាំ។+
១៨ យ៉ាងនេះ យើងនឹងមិនបែរចេញពីលោកឡើយសូមរក្សាជីវិតយើង ដើម្បីយើងអាចហៅរកនាមរបស់លោក។
១៩ ឱព្រះយេហូវ៉ាជាព្រះនៃបណ្ដាកងទ័ពស្ថានសួគ៌សូមទទួលស្គាល់យើងដូចកាលពីដើមវិញសូមបង្ហាញសេចក្ដីមេត្តាករុណាចំពោះយើង ដើម្បីយើងអាចទទួលសេចក្ដីសង្គ្រោះ។+
