អេសាយ ១៦:១-១៤
-
ដំណឹងថែមទៀតទាស់នឹងម៉ូអាប់ (១-១៤)
១៦ ចូរផ្ញើចៀមឈ្មោលទៅឲ្យអ្នកគ្រប់គ្រងស្រុកគឺពីតំបន់សេឡាកាត់តាមតំបន់ស្ងាត់ជ្រងំ ឆ្ពោះទៅភ្នំនៃក្រុងស៊ីយ៉ូន។
២ ដូចសត្វស្លាបដែលត្រូវគេដេញចេញពីសំបុក+នោះអ្នកស្រុកម៉ូអាប់នឹងត្រូវទៅឯតំបន់ទឹករាក់នៃជ្រលងអើណូន។+
៣ «ចូរជូនយោបល់ និងធ្វើតាមការសម្រេចចិត្តចុះ។
ចូរធ្វើឲ្យស្រមោលរបស់អ្នកនៅពេលថ្ងៃត្រង់ទៅជាងងឹតដូចយប់វិញ។
ចូរលាក់បំពួនពួកអ្នកដែលខ្ចាត់ខ្ចាយ ហើយកុំក្បត់ពួកអ្នកដែលកំពុងរត់គេចឡើយ។
៤ ឱម៉ូអាប់អើយ! សូមឲ្យពួកអ្នកខ្ចាត់ខ្ចាយរបស់ខ្ញុំជ្រកកោនជាមួយនឹងអ្នកផង។
សូមលាក់បំពួនពួកគេឲ្យរួចពីអ្នកបំផ្លាញផង។+
អ្នកដែលសង្កត់សង្កិនគេនឹងដល់ទីអវសានការបំផ្លាញនឹងមកដល់ទីបញ្ចប់ហើយពួកអ្នកដែលជិះជាន់អ្នកឯទៀតនឹងវិនាសពីផែនដី។
៥ បន្ទាប់មក នឹងមានបល្ល័ង្កមួយត្រូវតាំងឡើងយ៉ាងមាំដោយសេចក្ដីស្រឡាញ់ដ៏ស្មោះត្រង់។
បុគ្គលដែលអង្គុយលើបល្ល័ង្កនោះស្ថិតក្នុងត្រសាលរបស់ដាវីឌ គាត់ជាអ្នកស្មោះត្រង់+គាត់នឹងវិនិច្ឆ័យដោយយុត្តិធម៌ ហើយប្រព្រឹត្តយ៉ាងសុចរិតដោយមិនបង្អែបង្អង់»។+
៦ យើងបានឮអំពីអំណួតរបស់ម៉ូអាប់+គឺគាត់មានចិត្តក្រអឺតក្រទម ហើយគាត់មានកំហឹងជាខ្លាំង+គាត់ពូកែអួតអាងណាស់ តែសម្ដីរបស់គាត់ឥតបានការទេ។
៧ ដូច្នេះ ពួកអ្នកស្រុកម៉ូអាប់នឹងយំស្រណោះស្រុករបស់ខ្លួនពួកគេនឹងទ្រហោយំជាមួយគ្នា។+
ពួកអ្នកដែលត្រូវគេវាយធ្វើបាប នឹងយំស្ដាយនំទំពាំងបាយជូរក្រៀមនៅក្រុងកៀហារ៉ាសែត។+
៨ ព្រោះចម្ការនានានៅក្រុងហែសបូន+បានក្រៀមស្វិតហើយដើមទំពាំងបាយជូរនៅក្រុងស៊ីបម៉ា+ក៏ស្វិតស្រពោនដែរ។
ពួកអ្នកគ្រប់គ្រងនៃប្រជាជាតិនានាបានជាន់ឈ្លីមែកដែលពេញដោយផ្លែទំពាំងបាយជូរក្រហម។
មែកទាំងនោះលាស់ទៅឆ្ងាយរហូតដល់ក្រុងយ៉ាសឺ+ហើយវារទៅដល់តំបន់ស្ងាត់ជ្រងំ។
ខ្នែងវាបានបែកទៅឆ្ងាយរហូតដល់សមុទ្រ។
៩ ហេតុនេះ ខ្ញុំនឹងយំស្ដាយចំពោះដើមទំពាំងបាយជូរនៅក្រុងស៊ីបម៉ាដូចខ្ញុំយំស្រណោះក្រុងយ៉ាសឺដែរ។
ឱក្រុងហែសបូននិងក្រុងអេលៀឡាអើយ!+ ទឹកភ្នែកខ្ញុំនឹងស្រោចស្រពមកលើអ្នកព្រោះលែងមានសម្រែកនាពេលប្រមូលផលនៅរដូវក្ដៅនិងនៅរដូវច្រូតកាត់ក្នុងអ្នកទៀតហើយ។*
១០ អំណរនិងការសប្បាយរីករាយបានត្រូវដកចេញពីចម្ការនោះហើយគឺគ្មានចម្រៀងអរសប្បាយ ឬសម្រែកអបអរក្នុងចម្ការទំពាំងបាយជូរទៀតទេ។+
ឯអ្នកជាន់ផ្លែទំពាំងបាយជូរយកទឹកធ្វើស្រា ក៏លែងធ្វើការនោះដែរព្រោះខ្ញុំនឹងធ្វើឲ្យសម្រែកទាំងនោះសាបសូន្យទៅ។+
១១ ហេតុនេះ ក្នុងចិត្តខ្ញុំញ័ររំជួលនឹងស្រុកម៉ូអាប់+ ដូចខ្សែពិណញ័រពេលត្រូវគេកេះហើយដួងចិត្តខ្ញុំក្ដុកក្ដួលនឹងក្រុងកៀហារ៉ាសែត។+
១២ ទោះជាម៉ូអាប់គោរពបូជាយ៉ាងនឿយហត់នៅលើទីខ្ពស់ពិសិដ្ឋ ហើយចូលទៅអធិដ្ឋាននៅកន្លែងបរិសុទ្ធក៏ដោយ ក៏ឥតប្រយោជន៍ដែរ។+
១៣ នេះជាប្រសាសន៍ដែលព្រះយេហូវ៉ាបានប្រាប់រួចហើយស្ដីអំពីស្រុកម៉ូអាប់។
១៤ ឥឡូវព្រះយេហូវ៉ាមានប្រសាសន៍ថា៖ «ក្នុងអំឡុងបីឆ្នាំដែលប្រៀបដូចជាឆ្នាំនៃកម្មករស៊ីឈ្នួល* ភាពរុងរឿងរបស់ស្រុកម៉ូអាប់នឹងត្រូវអាប់ឱន ហើយនៅទីនោះនឹងមានភាពចលាចលជាខ្លាំង។ ចំនួនពួកអ្នកដែលនៅសេសសល់នៅស្រុកនោះនឹងមានតែបន្តិចបន្តួចប៉ុណ្ណោះ ហើយពួកគេសុទ្ធតែជាមនុស្សមិនសំខាន់»។+
កំណត់សម្គាល់
^ ឬប្រហែលជាមានន័យថា«ព្រោះមានសម្រែកចម្បាំងនាពេលប្រមូលផលនៅរដូវក្ដៅនិងនៅរដូវច្រូតកាត់ក្នុងអ្នក»
^ ឬ«បានរាប់ដោយហ្មត់ចត់ដូចកម្មករស៊ីឈ្នួលរាប់ដែរ»។ នោះសំដៅលើបីឆ្នាំគត់
