Mukanda wa Dyanga ku Akwa Kolindu 11:1-34
11 Kayelenu o phangu yami, kala kingene mu kayela o phangu ya Kidistu.
2 Phange jami, nga miximana mukonda mu ima yoso i mubhanga, mwene mu ngi lembalala, enu wenu mwa mutumaka o ima yoso i nga milongele.
3 Maji ijiyenu-kyu kwila, o mutwameni wa diyala, Kidistu, o mutwameni wa muhatu, o diyala, o mutwameni wa Kidistu, Nzambi.
4 Diyala dyoso disamba mba ditula o njimbu ya Nzambi ni mútwe wovunge, wa mukwatesa jisonyi ku mútwe wê.
5 O muhatu kyoso kyasamba mba kyatula o njimbu ya Nzambi sé kuvunga o mútwe, ukwatesa jisonyi ku mútwe wê, mukonda mwene wasoko ngó ni muhatu a mubhutu o mútwe.
6 Mukonda se muhatu ukamba kuvunga o mútwe, watokala kubhuta o ndemba, maji se o kubhuta o ndemba jisonyi phala o muhatu, mwene watokala kuvunga o mútwe.
7 O diyala katokala kuvunga o mútwe, mukonda a mubhange mu kidifwanganu kya Nzambi, mwene we fuma ya Nzambi. Maji o muhatu mwéne o fuma ya diyala.
8 Mukonda o diyala katundu ku muhatu, maji o muhatu mwéne watundu ku diyala.
9 Nzambi kabhange o diyala mukonda dya muhatu, maji wabhange o muhatu mukonda dya diyala.
10 Kyenyiki, mukonda dya jianju, o muhatu watokala kuvunga o mútwe wê, phala kulondekesa kwila wa muxila mwadi wê.
11 Mu kilunga kya Ngana, o muhatu wabhindamena o diyala, o diyala wabhindamena o muhatu.
12 Mukonda kala o muhatu kyatundu ku mukutu wa diyala, o diyala we a muvwala ku muhatu, maji Nzambi mwéne wabhange o ima yoso.
13 Enu wenu, xinganekenu hanji: O kwila kifwama o muhatu kusamba kwa Nzambi sé kuvunga o mútwe?
14 O ukexilu wabhange o athu, u milonga kwila, ki kifwama o diyala kukala ni ndemba yalebha.
15 Maji se muhatu ukala ni ndemba yalebha, fuma phala mwene, mukonda mwene a mubhana o ndemba phala ikale divunga phala o mútwe wê.
16 Maji se bhukala muthu ukwata jiphata jalungu ni kijila kiki, etu kitwala dingi ni kijila kyengi, né mwene o ilunga ya Nzambi, kiyala we.
17 Maji mu ku mibhana o itendelesu yiyi, ki nga mu miximana kana, mukonda o yônge yenu i mibhanga dingi kyayibha, muveji dya ku mibhekela mbote.
18 Kya dyanga, ngevu kwila kyoso ki mu dyongeka mu kilunga, mwene mu diwanuna mu ibuka-ibuka, eme ngixikina kwila o maka yá akidi.
19 Kuma bhukaxi kenu sayi athu anda diwanuna mu ibuka-ibuka, phala o yó a axikina kwa Nzambi adilondekese.
20 Kyoso ki mu dyongeka phala kudya o Seyalu ya Ngana, ki mwene mubhanga kiki mu ukexilu watokala.
21 Mukonda mu kithangana kya kudya o Seyalu, sayi athu mudyenu ene mu dyanga kyá kudya o kúdya kwâ, mu kubhanga kiki, kibhita kwila, o yú wala ni nzala, o mukwá wakodiwa.
22 O kwila ki mwala ni inzo phala kudya ni kunwa? Inga mwa mu sebhulula o kilunga kya Nzambi ni kukwatesa jisonyi ku jingadyama? Ihi i nganda mitangela? O kwila ngatokala ku miximana? Mu maka yá, ki nganda miximana, kana.
23 Kuma ngatambula kwa Ngana o ima i nga milongo kwila: Ngana Jezú mu usuku kyeji ku musumbisa, wakwata o mbolo,
24 kyazubha kusakidila Nzambi, wa ibukujula, yu wambe: “O mbolo yiyi ilombolola o mukutu wami, u nganda bhakula phala o mbote yenu. Bhangenu jinga kyenyiki, mu ku ngibanza eme.”
25 Kyene we kyabhange ni kopho. Kyazubha kudya o Phasu, mwene wambe: “O kopho* yiyi, ilombolola o kikutu kyobhe bhukaxi ka manyinga mami. Kyoso ki munwa ku kopho yiyi, bhangenu jinga kyenyiki mu ku ngi lembalala eme.”
26 Kuma kyoso ki mudya o mbolo yiyi ni kunwa ku kopho yiyi, mwa muboka o kufwa kwa Ngana, katé kyanda kwiza.
27 Kyenyiki, woso kafwama kudya ku mbolo ni kunwa ku kopho ya Ngana, maji né kiki udya ku mbolo ni kunwa ku kopho, mwene wanda kala ni kikuma kya mukutu ni manyinga a Ngana.
28 O muthu watokala u dyanga hanji kuditonginina mudyê ni kumona se wafwama, kyene kiwa kyatokala kudya o mbolo ni kunwa ku dikáwu.
29 Mukonda woso udya ni kunwa sé kuxinganeka o mukutu wa Ngana, wa mu dibhekela kifundisu.
30 Mukonda dya kiki, avulu mudyenu abhwila, amukata, sayi yá afu kyá.*
31 Maji se etu enyoso twa ditonginine, keji ku tufundisa.
32 Kyoso kya tufundisa, a mu tubazela kwa Jihova, phala ka tubhane kaxtiku kumoxi ni mundu.
33 Enu akwetu phange jami, kyoso ki mu dyongeka phala kubhanga o Seyalu ya Ngana, mu dikingila mudyenu.
34 Maji se muthu wala ni nzala, adye kubhata dyê, phala kyoso kimwanda dyongeka ki kikale kithangana kya ku mi fundisa. Kyenyiki, o maka a mukwá nganda kwabatula kyoso kinganda bhixila kwenyóko.
Footnotes
^ Mba, “dikáwu.”
^ O kufwa kuku ki kulombolola o kufwa mu xitu, maji kulombolola o kufwa mu nzumbi.
