Mukanda wa Dyanga ku Akwa Kolindu 4:1-21
4 O athu atokala ku tumona kala tu jiselevende ja Kidistu ni imbadi ya ikutu ya Nzambi.
2 Kyenyiki, o imbadi yatokala kukala jifiyele.
3 Mudyami kikwala maka se enu mu ngitokwesa, mba a ngitokwesa ku inzo yoso-yoso ya kufundisa. Mu kidi, eme mwene, ki ngene mu ditokwesa mudyami.
4 Eme ki ngejiya-mi se ngabhange kima kyoso-kyoso kyayibha. Kiki ki kilondekesa kwila ngi muthu wayuka, maji u ngitokwesa, Jihova.
5 Kyenyiki, kanenu kufundisa muthu ande dya kubhixila o kithangana kyatokala. Muveji dya kiki, kingenu katé kyanda kwiza Ngana. Mwene wanda bheka mu mukengeji o ima yósweke mwavundu. Wanda londekesa we o ima yene mu xinganeka o athu ku mixima yâ, ni kwaximana mukonda dya ibhangelu yâ.
6 Jiphange jami, nga misonekena yalungu n’eme ni Apolo, phala o mbote yenu. Phala bhukaxi ka phangu yetu mutumake o itendelesu yiyi: “Bhangenu ngó o ima yoso yósoneke.” Mu kubhanga kiki, ki mwanda dizangeleka, ki mwanda zangeleka we muthu umoxi, anga o mukwá mu mutolesa.
7 Ihi i kubhangesa kukala kota, akwenu ndenge? Ihi iwala nayu ka kubhana-yu? Se o ima yoso i wala nayu, akubhana-yu, mukonda dyahi wa mudizangeleka kala ka kubhana-yu?
8 O kwila ima yoso mwa itambula kyá? O kwila mwala kyá mu jimvwama? O kwila enu mwamateka kyá o kutumina, etu kana? Nga mesenene kwila mumateka kyá o kutumina phala tutumine we kumoxi ni enu.
9 Tumona kwila, Nzambi watutula etu tu jipoxolo bhu kididi bhene mu bhongolokela athu avulu, kala tu kibuka kyasukina phala ku tujibha. Kyenyiki, oso mu ngongo atumona, kikale o jianju ni athu.
10 Etu twala tu yôwa mukonda dya Kidistu, maji enu mwala mu jinjimu mwa Kidistu. Etu twabhwila, enu-phe mwaswina, enu mutambula o fuma, maji etu katubhana fuma.
11 Katé o kithangana kiki twa mubhita ni nzala ni dinyota, kitwala ni izwatu yasoko,* ene mutubeta, kitwala ni jinzo.
12 Twakalakala ni kuswina kwoso ni maku metu. Kyoso kya tuxinga, etu ki tu avutwila phonzo, kya tu zukutisa, tu kolokota ni mwanyu.
13 Kyoso kya tutatela makutu, tu vutwila ni kulenduka,* twakituka kala tu ixete ya mundu yú ni dixidilu dya ima yoso katé kindala.
14 Ki nga mu misonekena o ima yiyi phala ku mikwatesa jisonyi, kana, maji phala ku midimuna kala mu twana twami twa kazola.
15 Sumbala enu mwala ni kwinyi dya midi ya iledi* mwa Kidistu, mu kidi kimwala ni jitata javulu. Mukonda, bhukaxi ka njimbu yambote eme ngakituka ngi tata yenu mwa Kidistu Jezú.
16 Kyenyiki, ngi mitangela: Kayelenu o phangu yami.
17 Mukonda dya kiki, nga mu mitumikisa Timote, mon’ami wakazola, mwene fiyele mwa Ngana. Wanda mi lembalesa o ulongelu* wami mwa Kidistu Jezú, kala ki nga mulonga mu ididi yoso, ni mu ilunga yoso.
18 Amukwá abanza kwila kinganda kwiza mu mikunda, mukonda dya kiki ezala ni ukumbu.
19 Se Jihova wa kyandala, kwakambe ngó nganda kwiza ku mikunda. Kyenyiki, nganda mona se o athu ezala ni ukumbu, ala ni kutena kwa kuzokela o ima ya muzwela.
20 Mukonda o Utuminu wa Nzambi ka ulondekesa bhukaxi ka izwelu, maji bhukaxi kakutena kwa Nzambi.
21 Ihi i mwa mesena? Mwa mesena kwila ngi mikunda ni mbangala, phala ku mibeta, inga ni henda ni kubatama kwa muxima?
Footnotes
^ Mu Ngel.: “twala ni thuxi.”
^ Mu Ngel.: “tu dyonda.”
^ Mba, “alangidi.”
^ Mu Ngel.: “o jinjila jami.”
