Kala Kyasoneka Nzwá 16:1-33
16 “Nga mi tangela o ima yiyi phala ki mute kituxi.*
2 O athu anda mi kaya mu malombe.* Kwanda kwiza o kithangana kya kwila, woso u mi jibha, wanda banza kwila, wa mubhanga kikalakalu kya Nzambi.
3 Maji ene anda bhanga o ima yiyi, mukonda kejiya o Tata, eme wami ka ng’ijiya.
4 Nga mi tangela o maka yá phala kyoso kyanda bhita, mu lembalale kwila, o maka yá nga atangele kyá.
“Kudimatekenu, ki nga mi tangela o maka yá mukonda ngexile hanji ni enu.
5 Kindala, ngandaya kwa Yó wa ngi tumikisa, maji né kiki sé-ku muthu mudyenu wa ngi ibhwidisa: ‘Kwebhi ku wandaya?’
6 Maji enu mwatoloka o mixima, mukonda nga mi tangela o ima yiyi.
7 Né kiki ngi mi tangela o kidi kwila, eme ngamuya, phala o mbote yenu. Mukonda se ki ngiya-mi, o mukwatekexi kanda kwiza kokwenu. Maji se ngiya, nganda mi tumikisa-nê.
8 Kyoso mwene kyanda kwiza, wanda kwijidisa o mundu se ihi ilombolola o kituxi, o kuyuka ni kufundisa kwa Nzambi.
9 Kya dyanga wanda kwijidisa o kituxi, mukonda ene ka ngi xikana.
10 Kya kayadi kwijidisa o kuyuka, mukonda ngamuya kwa Tata, enu wenu kimwanda ngi mona dingi.
11 Mu kusuka-ku, wanda kwijidisa o kufundisa kwa Nzambi, mukonda o nguvulu ya ngongo yiyi, a mufundisa kyá.
12 “Eme ngala hanji ni ima yavulu phala ku mi tangela, maji ki mutena luwa ku itendela.
13 Mu kyenyiki, kyoso mwene* kyanda kwiza, o nzumbi ya kidi, wanda mi endesa mu kidi kyoso, kanda zwela mu vondadi yê, maji wanda zwela yoso yevu, anga u mi lombolwela o ima yanda kwiza.
14 Mwene wanda ngi jingisa, mukonda wanda tambula o ima ya ngi tokala, ni ku mi ijidisa-yu.
15 O ima yoso yala nayu o Tata, ya ngi tokala. Kyene ki nga mi tangela kwila, o mukwatekexi wanda tambula o ima ya ngi tokala ni ku mi ijidisa-yu.
16 Kwa kambe ngó kakithangana enu kimwanda ngimona dingi. Maji we kwakambe ngó bhofele, mwanda ngimona dingi.”
17 Kyenyiki, amoxi ku maxibulu mê adyambela mudyâ, exi: “Ihi ya mesena kuzwela mwene, kyoso kyambe kwila, ‘kwakambe ngó kakithangana enu kimwanda ngimona dingi. Maji we kwakambe ngó bhofele, mwanda ngimona dingi’? Ni kyoso kyambe we, ‘mukonda ngandaya kwa Tata’?”
18 Ene ambe, exi: “Ihi ya mesena kuzwela mwene, kyoso kyambe: ‘Kwakambe ngó kakithangana’? Etu kitwejiya ihi ya mesena kuzwela mwene.”
19 Jezú wejidile kwila ene a mesenene ku mubhanga ibhwidisu, anga wa atangela, wixi: “Mwa mu dibhanga ibhwidisu mukonda nga myambela, ngixi: ‘Kwakambe ngó kakithangana enu kimwanda ngimona dingi; ni kwila, kwakambe ngó bhofele mwanda ngimona dingi?’
20 Ngi mi tangela ni kidi kyoso kwila, enu mwanda dila, mwanda kala ni malamba, maji o mundu wanda sanguluka. Enu mwanda luwala, maji o kuluwala kwenu kwanda kituka kusanguluka.
21 Kyoso o muhatu kyala phala kubhanduluka,* mwene utala hadi yavulu mukonda o kithangana kyê kyabhixila. Maji kyoso kyavwala o mona, mwene kalembalala dingi o hadi yoso yatale, mukonda dya kusanguluka kwa kubheka muthu mu ngongo.
22 Kyene we kimoxi, kindala kiki enu mwa luwala, maji eme nganda mi mona dingi, o mixima yenu yanda sanguluka. Sé-ku muthu wanda tena ku mi katula o kusanguluka kwenu.
23 Mu kizuwa kyenyókyo, enu kimwanda ngi ibhwidisa né ngó kima kimoxi. Ngi myambela ni kidi kyoso kwila, se mubhinga kima kyoso-kyoso kwa Tata yami mu dijina dyami, mwene wanda mi bhana-kyu.
24 Katé kindala enu ki mwabhingi luwa né ngó kima kimoxi mu dijina dyami. Kyenyiki, bhingenu, anga mutambule, phala o kusanguluka kwenu kutenene.
25 “Nga mi tangela o ima yiyi bhukaxi ka ifika. Maji kithangana kikiza, kinganda mi tangela dingi bhukaxi ka ifika. Maji nganda mi lombolwela kyambote o maka alungu ni Tata.
26 Mu kizuwa kyenyókyo, mwanda bhinga ima kwa Tata mu dijina dyami. Kiki, ki kilombolola kwila, nganda mi bhingila bhu kididi kyenu, kana.
27 O Tata wa mizolo, mukonda enu mwa ngizolo ni kwila, mwaxikina kuma eme ngeza kala ngi mukunji wa Nzambi.
28 Eme ngeza mu ngongo kala ngi mukunji wa Tata. Kindala, nga muxisa o ngongo, eme nga muya kwa Tata.”
29 O maxibulu mê ambe: “Mu kiki, wa mu tu lombolwela kyambote o maka, ki wa mu tutangela dingi bhukaxi ka ifika.
30 Kyenyiki twejiya kwila, eye wejiya o ima yoso, ki ubhingi muthu u kubhanga ibhwidisu. Mukonda dya kiki, tu xikina kwila eye watundu kwa Nzambi.”
31 Jezú wa avutwila: “Kindala mu xikina kyá?
32 Ivwenu! O kithangana kikiza, kyene kyabhixila kyá. Enu oso mwanda mwangana, kala muthu mu inzo yê, anga mu ngixisa ubheka wami. Maji kingala ubheka, mukonda o Tata wala n’eme.
33 Nga mi tangela o ima yiyi phala bhukaxi kami mukale ni kutululuka. Mu ngongo mumu mwanda tala hadi, maji swinenu! O ngongo yiyi, eme nga itolola.”
Footnotes
^ Mu Ngel.: “ki mu di bhukane.”
^ Mba, “ididi ya ubhezelu.”
^ O kizwelu “mwene” kyo tumbule mu jivélusu 13 ni 14, kya lungu ni “mukwatekexi” ki moneka mu vélusu 7. Jezú wa tumbula o kizwelu “o mukwatekexi” kala muthu phala kulombolola o nzumbi ikôla. O nzumbi yiyi, nguzu mba kutena, ki muthu kana.
^ Mba, “kuvwala mona.”
