Kala Kyasoneka Nzwá 19:1-42
19 Pilatu wambata Jezú, anga utuma ku mubeta ni jixikote.
2 O masoladi endi kitundu kya minya, a kite ku mútwe wê, anga a muzwika divunga dya kusuka.
3 Ene a mu zukama, ya akexile muzwela, exi: “Tana-ku, eye u Sobha ya Jijudé!” Anga akala mu mubhana jihuxi ku pholo.
4 Pilatu utunda dingi anga utangela o mundu: “Ivwenu! Nganda mubheka bhu kanga, phala mwijiye kwila ki nga mono kituxi kwa mwene.”
5 Jezú watundu bhu kanga ni kitundu kya minha ku mútwe ni divunga dya kusuka. Pilatu wa atangela: “Yú mwéne o diyala, mu talyenu!”
6 Kyenyiki, kyoso o akunji a makota ni alangidi a tembulu kya mumono, adikola, exi: “A mu phaphele ku taka!* A mu phaphele ku taka!”* Pilatu anga wa ambela: “Mwambatyenu enu mwene, mu mujibhe, mukonda ki nga mono kituxi kwa mwene.”
7 O Jijudé a mu tambwijila: “Etu twala ni kijila kyetu, kála kyosoneke-mu, mwene watokala kufwa, mukonda wadibhange mon’a Nzambi.”
8 Kyoso Pilatu kyevu o ima yakexile muzwela o mundu, wôma wa mukwata dingi.
9 Mwene wabokona dingi m’onzo ya nguvulu, anga webhwidisa Jezú, wixi: “Eye u mukwa-hi?” Maji Jezú ka muvutwila kima.
10 Pilatu anga u mu ibhwidisa: “Eye ngwayé kuzwela n’eme? Eye ki wejiya kwila, eme ngala ni kutena kwa ku kujituna ni kutena kwa ku kujibha?”*
11 Jezú wa mu vutwila: “Eye kiweji kala ni kutena ko kwami, se ka kubhele naku kwa Nzambi. Maji o diyala wa ngi bhakula kokwé, kituxi kyê kyabetakota.”
12 Mukonda dya kiki, Pilatu wakexile musota ndunge ya ku mu jituna, maji o Jijudé adikola, exi: “Se ujituna o diyala didi, eye ki udikamba dya Sézalu. Mukonda woso udibhanga sobha, ukala nguma ya Sézalu.”
13 Kyoso Pilatu kyevu o ima yiyi, wambata Jezú bhukanga, yu waxikama ku kyandu kya kufundisa, bhu kididi a kibhangele ni matadi, mu dimi dya Hebalayiku ak’ixana Ngabatá.
14 Kyexile o kizuwa kya kuyudika o Fesa ya Phasu, mu ola ya kasamanu.* Mwene watangela o Jijudé, wixi: “Talenu, o sobha yenu!”
15 O mundu anga udikola: “Mwambatyenu! Mwambatyenu! A mu phaphele ku taka!”* Pilatu wa ebhwidisa: “O kwila ngatokala kujibha o sobha yenu?” O akunji a makota a mu tambwijila: “Kitwala ni sobha yengi, kikale ngó Sézalu.”
16 Kyenyiki, Pilatu wabhakula Jezú bhu maku mâ phala ku mu jibhila ku taka.*
Ene anga ambata Jezú.
17 Jezú wambata o taka* yê, utunda phala kuya bhu Kididi kya Kiholongonyo, mu dimi dya Hebalayiku ak’ixana Ngolongota.
18 Bhenyobho, Jezú a mu phaphela ku taka* kumoxi ni kiyadi kya mala, umoxi ku kadilu, o mukwá ku kyasu.
19 Pilatu wa yudika kadibaya, wa kate kuthandu dya taka,* yu wa soneka-ku: “Jezú dya Nazalé, o Sobha ya Jijudé.”
20 Jijudé javulu atange o izwelu yiyi, mukonda o kididi kwa phaphele Jezú ku taka* kya zukamene ni mbanza. O izwelu yiyi a isoneka mu dimi dya Hebalayiku, dya Latinu, ni dya Ngeleku.
21 Maji o akunji a makota a Jijudé, atangela Pilatu, exi: “Kana kusoneka, ‘O Sobha ya Jijudé,’ maji mwéne wambe: ‘Éme ngi Sobha ya Jijudé.’”
22 Pilatu wa tambwijila: “Yoso i nga soneka, nga isoneka kyá.”
23 Kyoso kyazubha ku phaphela Jezú ku taka,* o masoladi akwata o divunga dyê anga a ditandujula mu mbandu jiwana. Kala disoladi waxala ni mbandu imoxi, akwata we o kizwatu kyê. Maji o kizwatu kiki, ka kitungile ni jidinya, tundé kuthandu katé ku lwiji.
24 Kyenyiki ene adyambela mudyâ, exi: “Kizwatu kiki ki tu ki tandujule, maji tute jisólote phala kumona se nanyi wanda xala nakyu.” Kiki kyabhiti phala kudikumbidila o kima kyosoneke mu Mikanda Ikôla, kyoso kyambe: “A wanuna o kizwatu kyami mudyâ, atela jisólote kudivunga dyami.” Kiki kyene mwene kyabhange o masoladi.
25 Ku mbandu ya taka* ya Jezú, kwemanene many’â, ni phang’ya many’â, ni Madiya muhatu wa Kolofa, ni Madiya dya Manda.
26 Kya mono many’â ni dixibulu dyê wa muzolele kyavulu, emanene ku mbandu yê, Jezú wambela many’â: “Muhatu, kindala yú mwéne mon’é!”
27 Jezú wambela we o dixibulu: “Kindala yú mwéne many’enu!” Tundé mu kithangana kyenyókyo o dixibulu wa mwambata kubhata dyê.
28 Kyoso kyabhiti o ima yiyi, Jezú mu kwijiya kwila yoso yotenese kyá, wambe: “Ngala ni dinyota.” Mwene wazwela kiki phala kudikumbidila kima kyosoneke mu Mikanda Ikôla.
29 Bhenyobho bhwakexile kitutu kyezalele ni vindangele. Akwata xiponja yezala ni vindangele, a ite mu kamuxi ka hisopo,* anga a mu zukamesa ku dikanu dyê.
30 Kyazubha kulola o vindangele, Jezú wambe: “Yoso yotenese kyá!” Wabhetama o pholo bhoxi anga ufwa.*
31 Kuma kyexile kizuwa kya kuyudika o Fesa ya Phasu, phala o imbi ki ikale ku jitaka mu kizuwa kya Sábhalu, (mukonda o Sábhalu yenyoyo yeji kala Sábhalu ya dikota), o Jijudé abhingi kwa Pilatu, phala kutumina kubukujula o inama ya mayala, ni kukatula o imbi ku jitaka.
32 O masoladi ayi, abukujula o inama ya kiyadi kya mala a aphaphele ku taka* ku mbandu ya Jezú.
33 Maji kyoso kya bhixila kwa Jezú, amono kwila wafu kyá, kyenyiki ka mu bukula dingi o inama.
34 Disoladi dimoxi wakwata sosa, wa mu kubula mu jimbanji, anga mutunda manyinga ni menya.
35 O yó wa mono o ima yiyi, ubhana umbangi, o umbangi wê wa kidi, mwene wejiya kwila uzwela o kidi, phala enu wenu muxikane.
36 Mu kidi, ima yiyi yabhiti phala kudikumbidila o maka m’osoneke mu Mikanda Ikôla kwila, “kanda mu bukula* né ngó kifuba kimoxi.”
37 Ni mbandu ya mukwá ya Mikanda Ikôla yambe: “A ka mona yó a mu kubula ni sosa.”
38 Kyabhiti o ima yiyi, Zuze dya Dimateya (wexile dixibulu dya Jezú maji mu kaswekele, mukonda dya wôma wa Jijudé) wabhingi kwa Pilatu phala kukatula o kimbi kya Jezú, Pilatu waxikina. Mwene wayi wakatula o kimbi kya Jezú.
39 Nikodemu, o diyala wayile mu zwela-nê muveji ya dyanga mu usuku, wayi we. Mwene wambata milongo yobhange ni mila ni alowé, ya pezalele makwinyi a tatu ni kitatu kya jikilu.
40 Kala kyexile o kifwa kya Jijudé kya kufunda muthu, ene akwata o mukutu wa Jezú, a u vungina mu milele ya linyu, kumoxi ni milongo inuha kyambote.
41 Bhu kididi bhwa mu jibhile* bhwakexile jaludim, bhenyobho bhwakexile mbila ya ubhe, ka fundile-mu luwa muthu.
42 Kuma kyexile o kizuwa kya Jijudé kuyudika o Fesa ya Phasu, ene atula o kimbi kya Jezú mu mbila ya zukamene kwenyóko.
Footnotes
^ Tala o Dilombolwelu.
^ Tala o Dilombolwelu.
^ Mba, “kwa ku kuphaphela ku taka?”
^ Kiki kilombolola mediya.
^ Tala o Dilombolwelu.
^ Tala o Dilombolwelu.
^ Tala o Dilombolwelu.
^ Tala o Dilombolwelu.
^ Tala o Dilombolwelu.
^ Tala o Dilombolwelu.
^ Tala o Dilombolwelu.
^ Tala o Dilombolwelu.
^ Tala o Dilombolwelu.
^ Mu Ngel.: “u bhana o mwenyu wê.”
^ Tala o Dilombolwelu.
^ Mba, “sasujula.”
^ Mba, “bhwa mu phaphele.”
