Kala Kyasoneka Nzwá 4:1-54
4 Kyoso o Ngana kyeza mu kwijiya kwila, o Jifalizewu evu kuma, mwene* wakexile mu batizala dingi maxibulu avulu, o Nzwá ndenge
2 (sumbala Jezú ki mwéne wakexile mu batizala, maji o maxibulu mê),
3 mwene watundu mu Judeya, yu wavutuka ku Ngalileya.
4 Maji wabhingile kubhita mu mbanza ya Samadiya.
5 Mwene anga ubhixila mu sanzala imoxi ya Samadiya, a ixana Sikale, bhwa zukama ni dibhya dya bhele Jakobo kwa mon’ê Zuze.
6 Bhene bhwa kexile o fixi* ya Jakobo. Kuma Jezú wa tohokele mukonda dya kwenda njila, waxikama bhu mbandu a kixima. Yexile o ola ya kasamanu.*
7 Sayi muhatu mukwa Samadiya weza musunga menya. Jezú anga u mutangela, wixi: “Ngibhane tu menya, ni ngi nwe.”
8 (O maxibulu mê ayile mu mbanza mu sumba kudya.)
9 Kyenyiki o muhatu mukwa Samadiya, wambe: “Sumbala u Judé, mukonda dyahi wa mu ngi bhinga menya, se ngi mukwa Samadiya?” (Mukonda o Jijudé kala ni ukamba wambote ni akwá Samadiya.)
10 Jezú wa mu tambwijila, wixi: “Eye se wejidile o ujitu* ubhana Nzambi, ni yó wa kwambela, wixi: ‘Ngibhane tu menya,’ eye weji ku mubhinga, anga mwene weji kubhana o menya a mwenyu.”
11 O muhatu wa mwambela, wixi: “Ngana, eye kiwala ni kima phala kusunga o menya, o kixima kyazongo. O menya yá a mwenyu, wanda kwa katula kwebhi?
12 O kukwetu Jakobo mwéne watubhana o fixi yiyi.* Mwene wa nwine o menya mu fixi* yiyi kumoxi ni an’ê ni ibhaku yê. O kwila eye wa betakota, o kukwetu Jakobo ndenge?”
13 Jezú wa mu tambwijila: “Woso unwa o menya yá, wanda kala dingi ni dinyota.
14 Woso unwa o menya u nganda mubhana, kanda kala dingi ni dinyota. Maji o menya u nganda mubhana anda kala fixi ifwafwa moxi dyê, ibhana mwenyu wakalelaku.”
15 O muhatu wa mu tambwijila: “Ngana, ngibhane o menya yá phala ki ngikale dingi ni dinyota, né kwiza dingi bhabha kukatula menya.”
16 Jezú wa mwambela: “Ndé, wixane munumi’é, wize-nê bhabha.”
17 O muhatu wa muvutwila: “Kingala ni munumi.” Jezú wa mwambela, wixi: “Eye wa lungwé mu kuzwela kwila, kiwala ni munumi.
18 Mukonda wakexile ni anumi atanu, o diyala di wala nadyu kindala, ki dya kutokala. Mu kiki, eye wazwela o kidi.”
19 O muhatu wa mutangela, wixi: “Ngana, nga mumona kwila eye u polofeta.
20 O jikuku jetu jakexile mu bheza mu mulundu mwenyumu, maji o mundu wé uzwela kwila, o athu atokala kubheza Nzambi mu Jeluzaleme.”
21 Jezú wa mwambela, wixi: “Muhatu, ngi xikane. O kithangana kikiza kya kwila, enu ki mwanda kubheza o Tata né mu mulundu mwenyumu, né mu Jeluzaleme.
22 Enu ki mwejiya ki mwa mubheza, maji etu twejiya ki twa mubheza, mukonda o kubhuluka kwijila ku* Jijudé.
23 Maji, kithangana kikiza, kyene kyabhixila kyá, kyoso o abhezi a kidi kyanda bheza o Tata mu nzumbi ni mu kidi. Mu kiki, o Tata wamesena kwila o athu a mubheza mu ukexilu yú.
24 Nzambi Nzumbi, oso a mubheza atokala ku mubheza mu nzumbi ni mu kidi.”
25 O muhatu wa mwambela, wixi: “Ngejiya kwila o Mexiya a mwixana Kidistu, wanda kwiza mwene. Kyoso kyanda bhixila, wanda tu jimbulwila o ima yoso.”
26 Jezú wa mutangela: “Éme mwéne nga muzwela n’eye.”
27 Mu kithangana kyenyókyo o maxibulu mê abhixila, ene adiwana kyavulu mukonda mwene wakexile muzwela ni muhatu. Maji, sé-ku dixibulu dya mu ibhwidisa: “Ihi i wamesena?” mba “Mukonda dyahi wa muzwela ni mwene?”
28 Kyenyiki o muhatu waxisa o disanga dya menya, yu wayi mu sanzala, anga utangela o mundu,
29 wixi: “Zenu mutale o diyala dya ngi tangela o ima yoso i nga bhange. O kwila ki mwéne o Kidistu?”
30 Ene atundu mu sanzala, ya ayi mu disanga nê.
31 Mu kithangana kyenyókyo o maxibulu a mu jijidika: “Mesene,* dya hanji kama.”
32 Maji mwene wa ambela: “Eme ngala ni kúdya kwami, enu ki mwa kwijiya.”
33 O maxibulu adyambela mudyâ, exi: “O kwila sayi muthu wa mubhekela kúdya?”
34 Jezú wa ambela, wixi: “O kúdya kwami o kubhanga o vondadi ya yó wa ngitumu, ni kuzubha o kikalakalu kya ngibhana.
35 Enu ki mwazwela kwila kwakambe hanji mbeji jiwana phala o kithangana kya kubhongolola? Maji ngi myambela kwila, bhetulenu o mesu ni mutale o mabhya, o idima yabhi kyá, yala polondo phala ku ibhongolola.
36 Kindala, o mubhongolodi wa mutambula kyá o futu yê, ni kubhongolola o ibundu phala o mwenyu wakalelaku, phala o mukuni ni mubhongolodi a sanguluke kumoxi.
37 O izwelu yiyi ya kidi: Umoxi o mukuni, o mukwá o mubhongolodi.
38 Nga mi tumikisa phala kubhongolola o idima ki mwa ikunu. Athu amukwá adimi ni nguzu yavulu, enu mwakatula mbote ku ikalakalu yâ.”
39 Athu avulu mu sanzala yenyoyo ya Samadiya axikana Jezú, mukonda dya ima yazwela o muhatu, wixi: “Mwene wa ngi tangela o ima yoso i ngabhange.”
40 Mu kyenyiki, kyoso akwa Samadiya kya disange-nê, a mubhingi phala kukala nawu. Mwene anga ukala mwenyomo izuwa iyadi.
41 Mu kiki, athu avulu dingi a muxikina, mukonda dya ima yazwela mwene.
42 Ene anga atangela o muhatu, exi: “Etu ki tuxikina ngó mukonda dya ima i wazwela, kuma étu mwene twa mwívu, anga twejiya kwila o diyala didi, mwéne o mubhuludi wa mundu.”
43 Kyoso kyabhiti izuwa iyadi, mwene watundu mwenyomo, yu wayi ku Ngalileya.
44 Jezú wambele kwila, polofeta ka mu bhana kijingu mu ixi mwa muvwalela.
45 Kyoso kyabhixila mu Ngalileya, akwa mbanza a mu tambulula kyambote, mukonda amwene o ima yoso ya bhangele mu fesa mu Jeluzaleme. Kuma ene ayile we mu fesa.
46 Mwene anga uya dingi mu Kaná mu mbanza ya Ngalileya, mwa kitulwile o menya mu vinyu. Mu Kafalanawú mwakexile mukalakadi wa sobha, mon’ê wa diyala wakatele.
47 O mukalakadi yú, kyevu kwila Jezú watundu mu Judeya yu weza mu Ngalileya, wayi kwa Jezú wa mubhingi phala kuya musaka mon’ê wa kumbama.
48 Jezú wa mutangela: “Enu se mu kamba kumona isuma ni madiwanu, ki mwanda xikina.”
49 O mukalakadi wa sobha wa mwambela, wixi: “Ngana, za ni lusolo ande dya mon’ami kufwa.”
50 Jezú wa mwambela, wixi: “Ndayé, mon’é wadisanze kyá.” O diyala waxikina o izwelu ya Jezú, yu wayi.
51 Kyoso mwene kyakexile mu kulumuka, o jiselevende jê ayi mudisanga nê phala ku mutangela kwila, mon’ê wadisanze kyá.
52 Mwene anga wa ebhwidisa se o mona wadisanze ola yebhi, ene a mu tambwijila, exi: “O febele yabhiti mazá, mu ola ya kasambwadi.”*
53 O tata watendela kwila, o mona wadisanze mu ola ya mutangela Jezú kwila: “Mon’é wadisanze kyá.” Kyenyiki, mwene ni mwiji wê woso axikina Jezú.
54 Yá exile o madiwanu a kayadi abhangele Jezú, kyoso kyatundu mu Judeya, phala kuya mu Ngalileya.
Footnotes
^ Mu Ngel.: “Jezú.”
^ Mba, “kixima.”
^ Kiki kilombolola ku mediya.
^ Mba, “ujitu wa kingoho.”
^ Mba, “kixima.”
^ Mba, “kixima.”
^ Mba, “kumateka ni.”
^ Mu Ngel.: “Labi.”
^ Kiki kilombolola ku 13 dya ola.
