Dimatekenu 6:1-22
6 Kyoso o athu kyamateka kudisokolola mu ixi, anga avwala an’a ahatu,
2 o an’a Nzambi* yakidi amateka kumona o ahatu* mu ixi kuma awabha. Kyenyiki, ene amateka kusola ahatu oso amesenene.
3 Jihova anga uzwela wixi: “O nzumbi yami ki yanda xikina o muthu kate ku hádya ni hádya, mukonda mwene xitu* ngo. O izuwa yoso ya mwenyu wê yanda soka hama ni makwinyi ayadi a mivu.”
4 Tunde mu izuwa yenyoyo ndu ku pholo, mu ixi mwexile Jinefelime.* Mu kithangana kyenyokyo, o an’a Nzambi yakidi asuluka ni kuzeka ni ahatu, ene anga a avwalela ana. Éne exile o mazonda axahulu, o mayala afuma.
5 Kyenyiki, Jihova wamono kwila, o kuyibha kwa muthu mu ixi kwavudile, wamono we kwila o ixinganeku ya mixima ya athu ya ibhile ithangana yoso.
6 Jihova wadyela* mu kubhanga o athu mu ixi, mwene waluwalele kyavulu.*
7 Mukiki, Jihova wambe wixi: “O athu u ngabhange mu ixi, nganda kwajima o mbutu. O athu kumoxi ni ibhaku ni yama ihuhutila bhoxi, ni yama ni ibamba yala ni mabhabha ibhita bhulu, kuma ngadyela mukonda dya ku abhanga.”
8 Maji Nowé wasange ngalasa bhu pholo ya Jihova.
9 Yú wene o musoso wa mwenyu wa Nowé.
Nowé wexile muthu wayuka. Kadifwile ni athu amukwa mu thembu yê. Nowé wende ni Nzambi yakidi.
10 Mukubhita thembu, Nowé wavwala an’a atatu a mala, Seme, Hame ni Jafete.
11 Maji o athu* exile mubhanga ima yayibha bhu pholo ya Nzambi yakidi, o ixi yezalele ni usweya.
12 Kyene, mu kutala mu ixi, Nzambi wamono kwila o athu atungile-mu, akexile mubhanga ima yayibha. Athu oso* mu ixi kakexile mubhanga ima yambote.
13 Nzambi anga wambela Nowé wixi: “Nganda bwika o athu oso* kuma o ixi yezala ni usweya mukonda dya ene. Mukiki, nganda kwa abwikisa kumoxi ni ixi yoso.
14 Bhanga álaka* ya mabaya a muxi wa wasu, phala eye. U ixiya ni betume moxi ni ku kanga.
15 Wanda ibhanga kiki: O kulebha kwê kukale hama jitatu ja kovadu,* o kukula kukale makwinyi atatu a kovadu, o kitala makwinyi atatu a kovadu.
16 Phala kumwikina wanda bhanga-mu njanena,* phala kubhixila ku ditala kukamba kovadu imoxi. Ku mbandu imoxi ya álaka kwatokala kukala dibhitu, u ibhanga ni ditala dya dyanga, dya kayadi ni dya katatu.
17 “Eme nganda bheka dilúvyu dya menya mu ixi, phala kubwikisa o ima* yoso yala ni mwenyu. Ima yoso yala mu ngongo yanda fwa.
18 Nganda ta kikutu kyami n’eye, wanda bokona mu álaka ni an’é , ni muhat’wê, ni ahatu a an’é.
19 Ku yama yoso yala ni mwenyu, watokala kwambata mu álaka kiyadi kiyadi, ndumbe ni mukaji, ikale n’eye phala u ilange.
20 Ku yama ni ibamba yala ni mabhabha ibhita bhulu mu idifwa yâ, ku ibhaku mu idifwa yâ ni yama yoso ihuhutila bhoxi mu idifwa yâ, yanda kusanga mu álaka kiyadi kiyadi, phala ikale ku mwenyu.
21 Eye-phe, watokala kubhongolola ni kubhaka kudya kwa maukexilu oso phala éye ni yama.
22 Nowé anga ubhanga mwene yoso ya mutumine Nzambi. Kyene mwene kya kumbidila.
Footnotes
^ Kizwelu mu dimi dya Hebalayiku, kilombolola o jianju ja Nzambi ku dyulu.
^ Mu Heba.: “An’a ahatu.”
^ Mba, “mukonda mwene ubhanga o ima mu ukexilu wa xitu.”
^ Nange kilombolola “akwa kulundumuna.” Kifwa, yó abwisa akwâ. Tala o Dilombolwelu.
^ Mba, “kyamubhekela dilamba.”
^ Mu Heba.: “waluwalele kyavulu ku muxima.”
^ Mu Heba.: “o ixi.”
^ Mu Heba.: “xitu yoso.”
^ Mu Heba.: “xitu yoso.”
^ Mu Heba.: “kaxa;” báluku yadikota.
^ O kovadu imoxi yasokele 44,5 a jisentimetru. Tala o Kiba. B14.
^ Mu Hebalayiku tsóhar. Mu veji dya kulombolola njanena ya kumwikina, o kizwelu tsóhar kitena kulombolola ditala dya zendalala disoka kovadu imoxi mu kididi kyalebha dingi.
^ Mu Heba.: “xitu yoso.”
