Kala Kyasoneka Luka 11:1-54
11 Sayi kizuwa, Jezú wakexile mu samba. Kyazubha o kusamba, dixibulu dimoxi u mwambela: “Ngana, tulonge o kusamba, kala Nzwá kyalongele o maxibulu mê.”
2 Mwene wa ambela: “Kyoso ki mu samba, mu zwela, mwixi: ‘Tatetu, dijina dyé adizelese.* O Utuminu wé wize.
3 Tu bhane o mbolo yetu ya kizuwa ni kizuwa i twa bhindamena.
4 Tuloloke o ituxi yetu, kala ki twene mu loloka we oso a tuta ituxi.* Ku twehele kudibhala mu jitendasá.’”
5 Kyenyiki, mwene wa atangela: “Xinganekenu hanji se muthu mudyenu ukala ni dikamba, mukaxi ka usuku uya kwa mwene, anga u mwambela: ‘Kamba dyami, ngi sobhese ngó jimbolo jitatu,
6 mukonda nga tambula dikamba dyatundu dikanga, eme ki ngala ni kima phala ku mubhana.’
7 O dikamba dyala m’onzo, u mu tambwijila: ‘Kana ku ngi bhindamesa. O dibhitu nga dijika kyá, eme ni twana twami, twala kyá bhu hama. Ki ngi tena dingi kubalumuka phala ku kubhana kima.’
8 Ngi myambela kwila, mwene wanda balumuka phala ku mubhana yoso ya bhindamena, ki mukonda dya kukala kamba dyê kana, maji mukonda dya kujiza kwê.
9 Mu kiki, ngi mi tangela kwila: Kolokotenu mu kubhinga, n’a mibhane, kolokotenu mu kusota, ni mu sange, kolokotenu mu kuphupha, n’a mi jikwile.
10 Mukonda woso ubhinga, utambula, woso usota, usanga, woso uphupha, a mu jikwila.
11 Nanyi o tata mudyenu se mon’ê u mubhinga mbiji, mwene u mubhana nyoka, muveji dya mbiji?
12 Mba u mubhinga diyaki, mwene u mu bhana dizalala?
13 Sumbala, mu akwa ituxi, maji mwene mubhana ima yambote ku twana twenu. O kwila o Tata ya dyulu kanda betakota kubhana nzumbi ikôla kwa yó a mubhinga?
14 Jezú anga ukaya o dimonyo dya bhangesa diyala kukala dibubu. Kyoso o dimonyo ki dya tundu, o diyala dya mateka o kuzwela. O athu anga adiwana kyavulu.
15 Sayi athu a mwambela: “Mwene ukaya o madimonyo ni kutena kwa Belezebú,* o ngana ya madimonyo.”
16 A kamukwá, amateka ku mubhinga kijimbwete kya dyulu phala ku mulonda.
17 Mu kwijiya o ibanzelu yâ, Jezú wa atangela: “Utuminu woso u diwanuna mudyê, ki u nangenena. Inzo yoso i diwanuna, ilundumuka.
18 Kyene we kimoxi, se Satanaji wa diwanuna mudyê, kyebhi o utuminu wê wanda nangenena? Mukonda mwa muzwela kwila, ngene mukaya o madimonyo ni kutena kwa Belezebú.
19 Se ngene mukaya o madimonyo ni kutena kwa Belezebú, an’enu akaya o madimonyo mu kutena kwa nanyi? Mukonda dya kiki, ene anda mi fundisa.
20 Maji se ngene mukaya o madimonyo ni kutena kwa Nzambi,* o Utuminu wa Nzambi wa mi tulukila.
21 Se dizonda dikala ni uta, anga ulangidila o inzo yê, o jimbote jê kanda tena ku jinyana.
22 Maji se bhu kala muthu wa mu túndu mu nguzu, wiza kwa mwene anga u mu tolola, u katula o mawuta moso akexile mudyelela, anga uwana o ima ni akwâ.
23 Woso-phe kàla ku mbandu yami, wa ngizembe, o woso kabhongolola n’eme, umwanga.
24 “Kyoso o nzumbi yayibha ki itunda moxi dya muthu, yene ibhita mu ididi ya kukuta mu kusota o dinyohenu. Maji se ki isange kididi, yene yamba: ‘Nganda vutuka mu inzo yami mu ngatundu.’
25 Kyoso ki ibhixila, isanga o inzo yokombe, yo fwamese kyambote.
26 Yene iya anga ibheka dingi sambwadi dya jinzumbi jayibha ja mu túndu mu kuyibha. Kyenyiki, mu disukilu o ukexilu wa muthu yú ukala dingi kota mu kuyibha, ku dimatekenu ndenge.
27 Kyoso mwene kya kexile mu zwela o maka yá, sayi muhatu mu kaxi ka mundu, wa mu tangela ni dízwi dya swina: “Wazediwa o muhatu wa ku vwala ni ku kwamwisa!”
28 Maji, mwene wambe, wixi: “Kana, azediwa yó évwa o maka ma Nzambi, anga abelesela!”
29 Kyoso o mundu kyakexile mu bhongoloka, mwene wamateka kuzwela: “Mwiji yú, wayibha! Ene amesena kijimbwete, maji kanda kimona, kikale ngó o kijimbwete kya Jona.
30 Mukonda kála Jona kyakexile kijimbwete phala akwá Ninive, o Mon’a muthu wanda kala we kijimbwete phala o mwiji yú.
31 Mu kithangana kya kufundisa, o mvwale ya lwiji wanda balumuka kumoxi ni athu a mwiji yú ni ku ubalakala, mukonda mwene watundu ku maxokololo a jixi phala kwívwa o unjimu wa Solomá. Maji talesenu! O muthu wala bhabha, wa betakota Solomá ndenge.
32 Mu kithangana kya kufundisa, akwa Ninive anda balumuka kumoxi ni mwiji yú ni ku ubalakala. Mukonda mu kwívwa yaboko Jona ene adyela. Maji talesenu! O muthu wala bhabha wa betakota, o Jona ndenge.
33 O athu kya wika o kandeya, kene mu kasweka mba ku katula moxi dya kinda,* maji a ka tula kuthandu a meza phala athu oso abokona m’onzo amone o mukengeji wê.
34 O kandeya ka mukutu, o dyesu. Se dyesu dyé dikala dya yuka,* o mukutu wé woso wanda kala mwazele, maji se dya yibha,* o mukutu wé woso wanda kala mwavundu.
35 O kiki-phe, dilange phala o mukengeji moxi dyé, ki ukale kitombe.
36 Se mukutu wé woso ukala mwazele sé kukala ni mbandu yavundu, wene woso wanda zela kyavulu, kála kandeya ka kumwikina ni mukengeji wê.”
37 Kyazubha kuzwela kiki, sayi Falizewu wa mubhingi phala kudya-nê kumoxi. Mwene anga ubokona m’onzo, yu waxikama ku meza.
38 O Falizewu-phe, wadiwana kyoso kyamono kwila, mwene wadi sé kusukula o maku.*
39 Ngana wa mwambela: “Enu mu Jifalizewu, o kopho ni dilonga mu dizelesa kukanga, maji moxi mwezala ni lwimbi ni kuyibha.
40 Mu yôwa! O muthu wabhange o mbandu ya kanga, ki mwene we wabhange o mbandu ya moxi?
41 Mu kiki-phe, bhanenu maujitu* ku jingadyama ni muxima wenu woso. Se mu bhanga kiki, mwanda zela.
42 Lamba dyenu enu mu Jifalizewu mu akwa mangonya! Mukonda mubhana o mbandu ya kakwinyi ya olatelá, ya aluda* ni ya mafe amukwá, maji o kuyuka ni henda ya Nzambi, ki mu ikumbidila!
43 Lamba dyenu, enu mu Jifalizewu, mukonda mwazolo kyavulu o ididi ya betakota mu malombe* ni ku mi menekena mu itanda!
44 Lamba dyenu, mukonda mwa difwangana ni jimbila ji kamba kumoneka ku mesu,* anga o athu kak’ijiya endela kuthandu dyâ!”
45 Mesene imoxi ya Kijila, wa mu vutwila, wixi: “Mesene, mu kuzwela kiki, wa mu tu lokalala we.”
46 Mwene wa mwambela: “Lamba dyenu we, enu mu jimesene ja Kijila, mukonda mu twika imbamba yaneme ku athu phala ku yambata, maji enu ki mukwata mu imbamba yiyi, né ngó ni mulembu umoxi!
47 “Lamba dyenu, mukonda mutunga o jimbila ja jipolofeta, maji o jikuku jenu ene mwene a ajibhile!
48 Mu kidi enu mwejiya kyambote o ima yabhangele o jikuku jenu, né kiki mwa i wabhela, mukonda ene ajibhile o jipolofeta, maji enu mutunga o jimbila ja jipolofeta.
49 Mukonda dya kiki, Nzambi mu unjimu wê, wambe: “Nganda kwa tumikisa jipolofeta ni jipoxolo, maji amoxi mudyâ anda kwa jibha ni kwa zukutisa,
50 phala o manyinga a jipolofeta joso, a zunzumuna tundé ku dimatekenu dya ngongo akale kuthandu dya mwiji yú.
51 Tundé ku manyinga a Abele, katé ku manyinga a Zakadiya, yó a mu jibhile bhukaxi ka kalatódiyu ni kididi kikôla kya tembulu.’ Ngi mi tangela kwila, o manyinga mâ anda kala kuthandu dya mwiji yú.
52 “Lamba dyenu enu mu jimesene ja Kijila, mukonda o sabhi ijikula o dibhitu dya lungu ni kwijiya kwa Nzambi mwa yambata. Enu ki mubokona, maji mu fidisa yó amesena kubokona!
53 Kyoso mwene kyatundu mwenyomo, o jimesene ja kulonga o Kijila ni Jifalizewu amateka ku mu kusa ni ku mubhanga ibhwidisu yavulu,
54 ni kusota ndunge phala ku mu kwata ku kima kyoso-kyoso kyeji zwela.
Footnotes
^ Mba, “a di xile kála dijina dikôla.”
^ Mu Ngel.: “makongo.”
^ Dijina dya tokala kwa Satanaji.
^ Mu Ngel.: “mulembu wa Nzambi.”
^ Mba, “kinda kya kuzongela.”
^ Mba, “dya zele.”
^ Mba, “dya lwimbi.”
^ O Jifalizewu ni Jijudé ja ka mukwá, akexile mu sukula o maku, kala kya kexile mu tuma o ijila yâ.
^ Mba, “ujitu wa henda.” Tala o Dilombolwelu.
^ Mafwe yá, ene mu saka nawu mawuhaxi; ene mu a ta we mu kudya phala kutowala.
^ Mba, “ididi ya ubhezelu.”
^ Mba, “ja kambe ijimbwete mba idimbu.”
