Kala Kyasoneka Matesu 12:1-50
-
Jezú, “mwéne o Ngana ya kizuwa kya Sábhalu” (1-8)
-
Jezú usaka diyala dyala ni lukwaku lwa kate (9-14)
-
Selevende amuzolo kwa Nzambi (15-21)
-
Madimonyo a akaya bhukaxi ka nzumbi ikôla (22-30)
-
Kituxi ka tena kukiloloka (31, 32)
-
O muxi a wijidila ku ibundu yê (33-37)
-
O kijimbwete kya Jona (38-42)
-
Kyoso o nzumbi yayibha ivutuka (43-45)
-
Mama ni jiphange ja Jezú (46-50)
12 Mu kithangana kyenyókyo, Jezú wabhiti mu mábhya mu kizuwa kya Sábhalu. O maxibulu mê akexile ni nzala anga amateka kuvuza o idima* ni ku idya.
2 Mu kumona o ima yiyi, o Jifalizewu a mu tangela, exi: “Tala! O maxibulu mê a mu bhanga kima katokala ku kibhanga mu kizuwa kya Sábhalu.”
3 Mwene wa atangela, wixi: “Ki mu tange yabhangele Davidi, kyoso mwene ni yó akexile-nê, kyakexile ni nzala?
4 Ene abokona mu inzo ya Nzambi, anga adya o jimbolo ja sata, kima katokalele ku kidya, kikale mwene mba yó akexile-nê, maji kyatokalele ngó ku akunji.
5 Mba kiluwa mu tanga mu Kijila kwila, mu Jisábhalu o akunji akalakala mu tembulu, maji akala sé kikuma kya kuxibhakela o Sábhalu?
6 Maji ngi mi ambela kwila, sayi muthu wala bhabha watúndu o tembulu.
7 Se mwejidile o dilombolwelu dya izwelu yiyi: ‘Nga mesena kwila akwenu mwa kwatela henda, mu veji dya ku ngi bhana jisata,’ enu ki mweji fundisa o athu akambe kikuma.
8 Mukonda o Mon’a muthu, mwéne o Ngana ya kizuwa kya Sábhalu.”
9 Kyatundu mu kididi kyenyókyo, wabokona mu dilombe* dyâ.
10 Mwenyomo mwakexile diyala dyexile ni lukwaku lwa kate.* Mu kiki, phala ku mu tatela a mu ibhwidisa, exi: “Kala kilonga o Kitumu, o kwila ki fwama kusaka muthu mu kizuwa kya Sábhalu?”
11 Mwene wa atangela wixi: “Se muthu mudyenu ukala ni mbudi, anga o mbudi yiyi ibwa mu dikungu mu kizuwa kya Sábhalu, o kwila mwene kanda ikatula-mu?
12 O muthu wabeta dingi kota, o mbudi ndenge! Mukonda dya kiki, o Kitumu kilondekesa kwila, kyafwama kubhanga o mbote mu kizuwa kya Sábhalu.”
13 Mu kiki-phe mwene wambela o diyala, wixi: “Sununa o lukwaku lwé.” Mwene anga u lu sununa, o lukwaku lu disanza kála lwa mukwá.
14 Mu kiki, o Jifalizewu ja tundu, anga amateka ku dikunda phala kusanga ndunge ya ku mu jibha.
15 Jezú-phe mu ku kijiya, watundu bhenyobho. Mundu wavulu anga u mu kayela, mwene anga u asaka ene oso,
16 maji wa atendelesa ni kuswina, phala katangele o athu se mwene nanyi,
17 phala ku dikumbidila o izwelu ya polofeta Izaya, kyoso kyambe:
18 “Talesenu! Selevende yami nga mu solo, mwene nga mu zolo, nga mu xikina! Nganda muta o nzumbi yami kuthandu dyê, mwene anga wanda kwijidisa o ifuxi, se ihi ilombolola o kuyuka.
19 Mwene kanda zoka, né ngó kudikola. Kana muthu wa k’évwa o dízwi dyê mu ikoka.
20 Mwene kanda sasujula mwenge woso-woso wo bukujule, kanda jima mwanga uxongota, katé mwene kyanda bheka o kuyuka kwa kidi.
21 Ifuxi yoso yanda dyelela mu dijina dyê.”
22 Mu kiki-phe, a mu bhekela diyala dyexile kifofo ni dibubu, dyakexile ni dimonyo, mwene anga u mu saka, hé o diyala di mateka kuzwela ni kumona.
23 Mundu woso anga udiwana, umateka kuzwela, wixi: “O kwila yú ki mwene o Mon’a Davidi?”
24 Kyoso o Jifalizewu kyevu o maka yá azwela, exi: “O diyala didi, ukaya o madimonyo ni kutena kwa Belezebú,* o mutwameni wa madimonyo.
25 Jezú-phe mu kwijiya o ibanzelu yâ, wa atangela, wixi: “Utuminu woso u di wanuna mudyê ki unangenena, mbonge yoso mba inzo i diwanuna mudyê ilundumuka.
26 Kyene we kimoxi, se Satanaji u di kaya mudyê, mwene wa diwanuna; kyebhi-phe o utuminu wê wanda nangenena?
27 Se ngi kaya o madimonyo mu kutena kwa Belezebú, an’enu akaya o madimonyo mu kutena kwa nanyi? Mukonda dya kiki, ene anda mi fundisa.
28 Maji se ngene mu kaya o madimonyo mu kutena kwa nzumbi ya Nzambi, o Utuminu wa Nzambi wa mi tulukila.
29 Mba kyebhi o muthu kyatena kubokona mu inzo ya dizonda, ni kunyana o jimbote jê, se ka dyanga kukuta hanji o dizonda? Kyene ngó kyanda tena kunyana o jimbote ja inzo.
30 Woso-phe kala ku mbandu yami, wangizembe, o woso kabhongolola n’eme, umwanga.
31 “Mukonda dya kiki ngi mi ambela: Kituxi kyoso-kyoso mba malebhu a muthu, anda mu loloka-u. Maji woso uxongwena o nzumbi ikôla ya Nzambi kanda mu loloka.
32 Mu kifika woso ulokalala o Mon’a muthu, anda mu loloka, maji woso ulokalala o nzumbi ikôla, kanda mu loloka, kikale ku mundu* yú, mba ku mundu wakeza-ku.
33 “Se mu kuna muxi wambote, o ibundu yê yanda wabha; maji se mu kuna muxi wayibha, o ibundu yê yanda bola. Mukonda o muxi a u ijidila ku ibundu yê.
34 Mu an’â madyuta, kyebhi ki mu tena kuzwela ima yambote, se mu athu ayibha? Mukonda o dikanu dizwela o ima yala ku muxima.
35 O muthu wambote, ku dilundilu dyê dyambote, ubheka-ku ima yambote. O muthu-phe wayibha ku dilundilu dyê dyayibha, ubheka-ku ima yayibha.
36 Ngi mi tangela kwila, mu Kizuwa kya Kufúndisa, o athu anda bhakula jikonda, mukonda dya ima yayibha yazwela;
37 mukonda o muthu u yukila mba a mu balakala bhukaxi ka izwelu yê.”
38 Mu kiki-phe, o jimesene ja kulonga o Kitumu ni Jifalizewu a mu tangela, exi: “Mesene, twa mesena kumona kijimbwete kokwé.”
39 Mwene wa avutwila wixi: “Mwiji yú wayibha, akwa jiphánda,* wabhindamena kijimbwete, maji kanda mona kijimbwete, kikale ngó o kijimbwete kya Jona, o polofeta.
40 Mukonda kala Jona kya bhitile izuwa itatu ni mausuku atatu mu mala dya kimbiji, o Mon’a muthu, wanda bhita we izuwa itatu ni mausuku atatu koxi a mavu.
41 Mu kithangana kya kufundisa, akwa Ninive anda balumuka kumoxi ni mwiji yú ni ku u balakala, mukonda mu kwívwa ya boko Jona ene adyela. Maji talesenu! O muthu wala bhabha wa betakota o Jona ndenge.
42 Mu kithangana kya kufundisa o mvwale ya lwiji, wanda balumuka kumoxi ni mwiji yú, ni ku u balakala, mukonda mwene watundu ku maxokololo a jixi phala kwivwa o unjimu wa Solomá. Maji talesenu! O muthu wala bhabha, wa betakota Solomá ndenge.
43 “Kyoso o nzumbi yayibha ki itunda moxi dya muthu, yene ibhita mu ididi ya kukuta mu kusota o dinyohenu, maji ki isange kididi.
44 Yene yamba, ‘nganda vutuka mu inzo yami mu nga tundu, kyoso kyabhixila usanga ki mwala muthu, yo kombe, yo fwamese kyambote.
45 Mu kiki, yene iya anga ibheka dingi sambwadi dya jinzumbi jayibha ja mu túndu mu kuyibha, o kya bokona akala mwenyomo, o ukexilu wasukidila wa muthu yú ukala dingi kota mu kuyibha, o wadyanga ndenge. Kiki kyene we kyanda bhita ni mwiji yú wayibha.”
46 Kyoso kyakexile hanji mu zwela ku kifuxi, o many’â ni jiphange jê atula bhu kanga, a mesenene kuzwela nê.
47 Anga bhu kala muthu u mu ambela, wixi: “Tala! Mam’enu ni jiphange jé ala bhu kanga, a mesena kuzwela n’eye.”
48 Mwene-phe wavutwila yó wa mu tangela: “Mam’etu nanyi? A nanyi o jiphange jami?”
49 Anga usununa o lukwaku lwê kwala o maxibulu mê, wambe wixi: “Talenu! Mam’etu ni jiphange jami!
50 Mukonda woso ubhanga o vondadi ya Tata yami wene mu dyulu, yó mwéne phang’yami ya diyala, mwéne phang’yami ya muhatu, mwéne mam’etu.”
Footnotes
^ Mu ukulu, o idima yiyi, akexile mu bhanga na-yu jimbolo.
^ Tala o nota ya Matesu 4:23.
^ Mu Ngel.: “lukwaku lwa xoweta; lwa kukuta.”
^ Dijina dyatokala kwa Satanaji.
^ Mba, “mu thembu yiyi.” Tala o Dilombolwelu.
^ Mba, “a kambe o ufiyele.”
