Kala Kyasoneka Matesu 23:1-39
23 Jezú-phe, wambela o mundu ni maxibulu mê, wixi:
2 “O jimesene ja kulonga o Kitumu ni Jifalizewu, aditula bhu kididi kya Mozé.
3 Kyenyiki, kumbidilenu o ima yoso ya mi tangela ene, maji ki mu tokala kukayela o phangu yâ, mukonda o ima yazwela, kene mu ikumbidila.
4 Ene akuta imbamba ya neme, anga a itwika bhu isuxi ya athu, maji ene kaxikina né ngó ku isetula ni mulembu.
5 Ikalakalu yoso, a ibhanga phala kwa mona ku athu. Phala kudilanga, ene akudisa o tu itutu* twala ni izwelu ya Mikanda Ikôla, akudisa we o mbandu ya izwatu* yâ.
6 Mu jifesa, ene awabhela kuxikama mu ididi ya fuma. Mu malombe,* awabhela kuxikama mu ididi ya betakota.
7 Awabhela we kwa menekena mu itanda, ni kwa exana Jimesene.*
8 Enu-phe, athu katokala ku m’ixana Jimesene, mukonda mwala ngó ni Mesene imoxi. Enu oso mu jiphange.
9 Ki mwixane we tata ku muthu woso-woso mu ngongo, mukonda sayi Tata yenu imoxi ngó, wene ku dyulu.
10 Ka tokala we ku m’ixana Ngana, mukonda sayi Ngana yenu imoxi ngó, mwéne Kidistu.
11 Maji, woso o dikota mudyenu, akale o selevende* yenu.
12 Woso udizangeleka, anda mu tulula. Woso-phe uditulula, anda mu zangeleka.
13 “Lamba dyenu, enu mu jimesene ja kulonga o Kitumu ni Jifalizewu, mu akwa mangonya! Mukonda mujika o mabhitu a Utuminu wa dyulu. Enu ki mu mesena kubokona, maji mu fidisa we yó ala mu njila phala kubokona.
14 ——
15 “Lamba dyenu, enu mu jimesene ja kulonga o Kitumu ni Jifalizewu, mu akwa mangonya! Mukonda mu nyunga o kalunga ni ixi, mu kusota kubhanga dixibulu. Kyoso o muthu kyakala dixibulu dyenu, mu mu bhangesa ku mi tùnda luyadi mu kufwama ku mu takula mu Njena,* enu ndenge.
16 “Lamba dyenu, enu mu ifofo, mwa mesena kulondekesa o njila ku akwenu, anga mu zwela, mwixi: ‘Se muthu ulokela o tembulu, kikimé; maji se ulokela o ulu ya tembulu, mwene watokala kukumbidila o kulôka kwê.’
17 Enu mu yôwa, mu ifofo! Ihi dingi ya betakota, o ulu, inga o tembulu ikôlesa o ulu?
18 Enu we mu zwela, mwixi: ‘Se muthu ulokela o kalatódiyu, kikimé; maji se ulokela o ujitu bhu kalatódiyu, mwene watokala kukumbidila o kulôka kwê.’
19 Enu mu ifofo! Ihi dingi ya betakota, o ujitu, inga o kalatódiyu ka kôlesa o ujitu?
20 Mu kyenyiki, woso ulokela o kalatódiyu, mu kidi wa mu lokela o kalatódiyu, ni ima yoso yala kuthandu dyê.
21 Woso ulokela o tembulu, mu kidi wa mu lokela o tembulu ni Nzambi wa tungu-mu.
22 Woso-phe ulokela o dyulu, wa mu lokela o kyandu kya Nzambi, ni mwene waxikama-ku.
23 “Lamba dyenu, enu mu jimesene ja kulonga o Kitumu ni Jifalizewu, mu akwa mangonya! Mukonda mu bhana o mbandu ya kakwinyi ya olatelá, ya tumáfwe twa towala, ni ya kominyu, maji ki mu kumbidila o maka amakota mu Kitumu kya Mozé, kala o kuyuka, o henda ni ufiyele. Enu mwa tokalele mwene kubhana o mbandu ya kakwinyi ya mafwe yá, ni kukumbidila we o maka amakota a Kitumu kya Mozé.
24 Enu mu ifofo, maji mwa mesena kulondekesa o njila ku akwenu. O kaluhamwe mu ka kenza, maji o kamelu, mu ka minya!
25 “Lamba dyenu, enu mu jimesene ja kulonga o Kitumu ni Jifalizewu, mu akwa mangonya! Mukonda enu mwala kala o kopho ni dilonga, dyozelese kukanga, maji moxi mwaxidi. Enu mwezala ni lwimbi,* mu mesena kubhanga ngó o jivondadi jenu.
26 Enu mu Jifalizewu, mu ifofo, dyangenu hanji kuzelesa moxi dya kopho ni dilonga, phala kukanga kuzele we.
27 “Lamba dyenu, enu mu jimesene ja kulonga o Kitumu ni Jifalizewu, mu akwa mangonya! Mukonda, mwa difwangana ni jimbila jo yukise. Kukanga jedi kala ja fwama, maji moxi jezala ni ifuba ya madifundu ni kuxila kwoso.
28 Enu wenu kyene we ki mwala, kukanga athu a mi mona kuma mwa yuka, maji moxi dyenu, mwezala ni mangonya ni ituxi yoso.
29 “Lamba dyenu, enu mu jimesene ja kulonga o Kitumu ni Jifalizewu, mu akwa mangonya! Mukonda mu tunga o jimbila ja jipolofeta, mu yukisa o jimbila ja athu ayuka,
30 anga mu zwela, mwixi: ‘Se twakexile ku mwenyu mu izuwa ya jikuku jetu, kitweji dibunda nawu kumoxi mu kujibha o jipolofeta.’
31 Mu kuzwela kiki, mwa mu ditatela kuma mu an’a yó ajibhile o jipolofeta.
32 Mu kiki, zubhenu o ikalakalu yamateka o jitata jenu.
33 “Mu jinyoka, mu an’â madyuta! Kyebhi ki mwanda lenga o ku mi fundisa, ni ku mi takula mu Njena?*
34 Mukonda dya kiki-phe, nga mu mi tumikisa jipolofeta ni jinjimu ni alongexi. Sayi yâ, mwanda kwa jibha ni kwa phaphela ku taka,* a mukwá, mwanda kwa beta mu malombe* menu, ni kwa zukutisa mu jimbanza joso.
35 Phala o manyinga a athu oso ayuka, a ajibha mu ixi, eze ku thandu dyenu. Tundé kwa Abele, katé kwa Zakadiya mon’a Balakiya, yó mwa mu jibhile bhukaxi ka kididi kikôla ni kalatódiyu.
36 Ngi mi tangela o kidi kwila, ima yoso yiyi, yanda kwiza kuthandu dya mwiji yú.
37 “Wawé! Jeluzaleme, Jeluzaleme tata! Ujibha o jipolofeta ni kububa ni matadi o akunji a atumikisa kokwê! Lukuxi lu nga mesenene kwongeka o twana twé, kala o sanji kyongeka o twana twê, bhoxi dya mabhabha mê, maji enu mwa ditunu.
38 Talesa! O inzo yenu, anda mi xisa-yu* ya hatu.
39 Ngi mi ambela kwila, tundé lelu katé ku hádya, ki mwanda ngimona dingi, katé ki mwanda dikola, mwixi: ‘Ataneku yó wiza mu dijina dya Jihova!’”
Footnotes
^ O Jijudé ja kexile mu ta o tu itutu tutu bhu mabhômo ni ku maku mâ, phala ku di langa ku ima yayibha.
^ Mba, “bayinya.”
^ Mba, “ididi ya ubhezelu.”
^ Mu Ngel.: “Labi.” Tala o Dilombolwelu.
^ Mba, “mubhika.”
^ Tala o Dilombolwelu.
^ Mu Ngel.: “wiyi.”
^ Tala o Dilombolwelu.
^ Tala o Dilombolwelu.
^ Mba, “ididi ya ubhezelu.”
^ Mba nange, “ya kà xala ngundu.”
