O dijina dia Ngana a di soneka mu izuelu i uana mu dimi dia Hebalaiku יהוה, mu mikanda ia Hebalaiku di moneka 7.000 ia ji veji. O mikanda íii, i lungulula o izuelu íii a di jiia mu dijina dia Tetragrama “Jihova.” O dijina didi, di moneka veji javulu mu Bibidia. Né muene, o asoneki a Bibidia a tumbula o majina a ujitu, kála “Muteni-a-Ioso,” “Suke-ku” ni “Ngana,” maji o Tetragrama ilondekesa o dijina dia tokala kua Nzambi.

Jihova Nzambi, ua tumu o asoneki a Bibidia ku soneka o dijina diê. Mu kifika, muéne ua tumu o polofeta Jouele ku soneka: ‘Uoso u ximana o dijina dia Jihova ua ka bhuluka.’ (Jouele 2:32) Nzambi ua tumu ué o mukua jisalamu ku soneka: ‘Phala a k’ijiie kuma eie ngó uavu o dijina dia Jihova, ku moneka luiadi; eie-muéne ngó u Suke-ku mu ngongo ioso.’ (Jisálamu 83:18) Mu kidi, o dijina dia Ngana di moneka 700 a ji veji mu divulu dia Jisalamu—divulu a di soneka mu ukexilu ua mimbu, a di tumbula ku mundu ua Nzambi. Mukonda diahi, o dijina dia Nzambi ki di moneka mu ji Bibidia ja mukuá? Mukonda diahi, o Tradução do Novo Mundo, di tumbula o dijina “Jihova”? O dijina Jihova, di lombolola ihi?

Mukonda diahi, o dijina dia Nzambi ki di moneka mu ji Bibidia ja mukuá? Mukonda dia ima iavulu. Saí athu a banza kuila, o Nzambi Muteni-a-Ioso ka bhingi ku kala ni dijina. A mukuá a a fuinhisa ku ijila ia Jijudé, a kamba ku tumbula o dijina dia Nzambi, mu ku banza kuila a mu xibhaka o kijila kiâ. Saí athu, a zuela kuma o dijina didi ka tokala ku di tumbula, mukonda ene kejiia se kiebhi kia kexile mu dixana m’ukulu, a mona kuila kota ku tumbula o majina a ujitu kala “Ngana” mba “Nzambi.” Maji, o ibanzelu íii ki i tokala ku bhangesa o athu ku kamba ku tumbula o dijina dia Nzambi mukonda:

• Oso a dituna kuila, Nzambi ka bhingi ku kala ni dijina, ua mu dituna o milongi ia Bibidia, katé muene ni milongi io bhake kiambote ande dia kithangana kia Kristu,  mu tu sanga o dijina dia Nzambi. Kala ki tua mono kiá, Nzambi ua tumu ku soneka o dijina diê mu Bibidia 7.000 a ji veji. Mu kiki, muéne ua mesena kuila, tuijiia o dijina diê ni ku di tumbula.

• O alunguludi a katula o dijina mukonda dia ijila ia Jijudé, a mu dituna kima kia beta-kota kia lungu ni Nzambi. Né muéne o asoneki Jijudé, a ditunine ku tumbula o dijina dia Nzambi, maji ene ka katula o dijina didi mu ji Bibidia jâ. Saí mikanda a i sange ku Qumran, bhua zukama ni Mar Morto, mua kexile o dijina dia Nzambi mu jimbandu javulu. Saí alunguludi a Bibidia, a zuela kuila o dijina dia Nzambi, di moneka mu mikanda ia dianga phala ku bhingana o dijina dia ujitu, dio soneke ni isoneku ia makota “NGANA.” Maji mukonda diahi o alunguludi, a katula o dijina dia Nzambi mu Bibidia, se ejidile kuila o dijina didi a di soneka mu veji javulu mu Bibidia? Nanhi ua a tumina ku bhanga kiki? Ene ngó ejiia.

• Oso a zuela kuila o dijina didi ki di tokala ku di tumbula mukonda kejiia se kiebhi kia kexile mu di xana m’ukulu, ene a tumbula o dijina dia Jezú. Maji o maxibulu a Jezú, ku hama ia dianga ka kexile mu tumbula o dijina dia Jezú, kála kiene mu tumbula o Jikidistá lelu. Nange o Jijudé, o dijina Jezú akexile mu di xana Yeshua. O dijina dia ujitu “Kristu” akexile mu di tumbula Mashiʹach, mba “Mexiia.” O Jikidistá a zuela o dimi dia Ngeleku, akexile mu tumbula I·e·sousʹ Khri·stos, o Jikidistá a zuela o dimi dia Latini a tumbula Ieʹsus Chriʹstus. Ni kikuatekesu kia Nzambi, o dijina diê a di soneka mu mikanda ia Ngeleku, phala ku londekesa kuila, o Jikidistá ku hama ia dianga akexile mu tumbula o dijina dia Nzambi, kála kiene mu di tumbula mu dimi didi. O kibuka kia lungulula o Tradução do Novo Mundo, a mono kuila kima kiambote ku tumbula o dijina dia “Jihova,” né muene ki tuejiia kiebhi kia kexile mu d’ixana o dijina didi, mu dimi dia Hebalaiku iokulu.

Mukonda diahi o Tradução do Novo Mundo di tumbula o dijina “Jihova”? Mu dimi dia kingileji, o isoneku i uana ia Tetragrama (יהוה) i moneka mu ji consoante YHWH. Mu kiki, o isoneku mu dimi dia Hebalaiku ka i sonekene ni ji vogais. Kioso kia kexile mu zuela hanji o dimi dia Hebalaiku, o atangi a tenene ku tanga o mikanda ni ji vogais ja tokala.

Mu ku bhita mivu iavulu, kioso kia zubhile kiá ku soneka o mikanda ia Hebalaiku, o jingijiie a Jijudé a sokejeka o ima, phala ku kuatekesa ku tumbula o ji vogais, kioso kia kexile mu tanga mu dimi dia Hebalaiku. Tundé mu kithangana kieniókio, Jijudé javulu ene  mu banza kuila, kima kia iibha ku tumbula o dijina dia Nzambi ni dízui dia suína, mukonda dia kiki ene mu tumbula o majina a ujitu. Maji, nange kioso kia soneka o tetragrama, ene a sokesa o ji vogais ni majina a ujitu, a a lungulula ni kiuana kia ji consoante, ja lomboluele o dijina dia Nzambi. Maji o milongi mu tu sanga o ji vogais, ki i kuatekesa kuijiia kiebhi, m’ukulu kia kexile mu kuixana o dijina didi mu dimi dia Hebalaiku.Saí athu a zuela kuila, o dijina dia Nzambi, akexile mu di tumbula “Yahweh,” maji a mukuá ala ni ibanzelu iéngi. O mikanda ia Mar Morto, mua kexile milongi ia divulu dia Ijila mu dimi dia Ngeleku, ia lungulula o dijina kuila Iao. O asoneki akua Ngeleku a dianga, a xikinine ué kuila, o dijina dia Nzambi akexile mu di tumbula Iae, I·a·beʹ, ni I·a·ou·eʹ. Mu kiki, ki tu tokala ku kala ni phata. Etu ki tuejiia se kiebhi o jiselevende ja Nzambi m’ukulu kia kexile mu tumbula o dijina didi mu Hebalaiku. (Dimatekenu 13:4; Makatukilu 3:15) Maji tuejiia kuila, Nzambi ua tumbula o dijina diê mu veji javulu, kioso kia zuela ni mundu uê, o athu akexile ué mu tangela o dijina didi ku akuâ.—Makatukilu 6:2; 1 Jisobha 8:23; Jisálamu 99:9.

Mukonda diahi o Tradução do Novo Mundo, di tumbula o dijina “Jeová”? Mukonda diene o dijina dia Nzambi, kala kiene mu di tumbula mu dimi dia phutu tunde ukulu.

O dijina dia Nzambi, a dianga ku di lungulula mu Bibidia dia kingileji ku muvu ua 1530 mu Pentateuco ia William Tyndale. Muéne ua tumbula o kizuelu “Iehouah.” Mu mivu iavulu, o ukexilu ua ku zuela o Kingileji ua lunguluka, o dijina dia Ngana a di tumbula mu ukexilu ua bhebhuluka. Mu kifika, ku muvu ua 1612, Henry Ainsworth ua tumbula o kizuelu “Iehovah,” kioso kia lungulula o divulu dia Jisalamu. Ku muvu ua 1639, kioso kia tokuesa dingi o divulu ni kia katula ji kopia kumoxi ni  Pentateuco o dijina “Jehovah” dia moneka. Ku muvu 1901, o athu a lungulula o Bibidia American Standard Version, a tumbula ué o dijina “Jehovah” mu milongi ia Hebalaiku.

Mu ku zuela se mukonda diahi ua tumbula o dijina “Jehovah,” mu veji dia Yahweh, mu divulu diê ia lungu ni Divulu dia Jisalamu ku muvu ua 1911, o mukua ku tokuesa Joseph Bryant Rotherham, uambe kuila ua mesenene ku soneka, “o dijina diejidile kiambote o athu (eji di xikina ku athu) a tanga o Bibidia.” Ku muvu ua 1930, kiene kiambe ué A. F. Kirkpatrick, kioso kia tumbula o dijina “Jehovah.” Muéne uambe: ‘O ji gramatica ja ubhe ji bhangesa kuila o muthu u tanga Yahveh mba Yahaveh; maji o kizuelu JEHOVAH, kia tundu mu dimi dia Kingileji, o kia beta kota ko ukexilu ua ku di tumbula, maji o ku xikina kuila, didi diene o dijina dia tokala kua Nzambi, ki dijina dia ujitu kála Ngana.’”

Ihi ilombolola o dijina Jihova? Mu dimi dia Hebalaiku, o dijina Jihova di lombolola “ku kituka,” o akua ku tokuesa a zuela kuila dia tundu mu kizuelu kia Hebalaiku. Mu kiki, o kibuka kia ku Lungulula o Bibidia, Tradução do Novo Mundo, a xikina kuila, o dijina dia Nzambi di lombolola ‘Muéne u Bheka ioso ia Mesena o ku Bheka.’ O akua ku tokuesa ala ni ibanzelu iavulu ia lungu ni dijina didi, maji ki tu tokala ku kala ni phata ia lungu ni dijimbuluilu dia dijina didi. O dijimbuluilu dia dijina didi di fuama kua Jihova, mukonda muéne o Mubhangi ua ima ioso, u Kumbidila ué o ima ioso ia kanena. Muéne ka bhange ngó o ixi ni ima iala ni muenhu phala n’a kale mu ixi, maji muéne uene mu bhanga ioso phala ku kumbidila o vondadi iê, ni kikanenu kiê.

Maji o dijimbuluilu dia dijina dia Jihova, ki dia lungu ngó ni izuelu i tu sanga mu divulu dia Makatukilu 3:14, diambe: “Eme Kala-Dia-Kala,” O izuelu íii, ki i bhana o dilomboluelu dia tokala ku dijina dia Nzambi. Maji, ilondekesa o ídifua ia Nzambi ia kuila, muéne u kituka ia mesena phala ku kumbidila o vondadi iê. Mu kuijiia kuila, o dijina dia Jihova di lombolola ima iavulu, ki di lombolola ngó ku kituka ia mesena muéne. Dilombolola ué kuila, muéne u bheka ioso ia mesena o ku bheka, phala ku kumbidila o kikanenu kiê kia lungu ni ibhangelu iê.