DISÁ 9
Kiebhi ki u Tena ku Kala ni Muiji ua Zediua?
1. Mukonda diahi o ukaza u zediuisa o muiji?
O njimbu iambote ia tokala kua Jihova, o Nzambi ia ku sanguluka, ua mesena kuila o miji i zediua uê. (1 Timote 1:11) Muéne ua bhange o ukaza. O ukaza u zediuisa o muiji, mukonda u bhangesa ku sasa o tuana bhu kididi kia tululuka. O Jikidistá a tokala ku xila o itumu ia jinguvulu ja lungu ni ukaza.—Tanga Luka 2:1, 4, 5.
Kiebhi Nzambi kia mona o ukaza? Muéne ua mesena kuila o diiala ni muhatu, a nangenena mu ukaza uâ. Jihova ua mesena kuila o anumi ni ahatu, a di kale jifiiele. (Jihebeleu 13:4) Muéne ua zembe o ku senga. (Malakiia 2:16) Maji uehela o Jikidistá ku di senga ni ku kazala dingi se o kaza diê u ta phánda.—Tanga Matesu 19:3-6, 9.
2. Kiebhi o makaza kia tokala ku dibhana?
Jihova ua bhange o diiala ni muhatu phala ku kumbidila o ikalakalu iâ, ni ku di xila mudiâ. (Dimatekenu 2:18) O munumi muene ua tokala ku kala ku pholo mu ku dikila o muiji uê, ni ku u longa o mak’â Nzambi. Muéne ua tokala ku zola o muhatu uê. O anumi ni ahatu a tokala ku di zola ni ku di xila mudiâ. Phala ku zediua mu ukaza, o anumi ni ahatu a tokala ku di loloka mudiâ, mukonda akua ituxi.—Tanga Efezo 4:31, 32; 5:22-25, 33; 1 Phetele 3:7.
3. Se ku zediua mu ukaza, o kuila ua tokala ku xisa kaza diê?
Se muala ni maka mu ukaza, mua tokala mu bhanga ioso phala ku di zola mudienu. (1 Kolindo13:4, 5) O Mak’â Nzambi ka tendelesa o ku di senga, phala ku batula o maka mu ukaza.—Tanga 1 Kolindo 7:10-13.
4. Tuana, ihi ia mesena Nzambi ko kuenu?
Nzambi ua mesena kuila mu zediua. Muéne u bhana milongi ia beta-kota i bhangesa ku zediua mu unzangala uê. (Kolose 3:20) Jihova ua mesena kuila, enu mu zediua mu bhanga ima iambote bhu pholo ia Mubhangi uenu, ni kua Mon’ê.—Tanga Ndongixi 11:9–12:1; Matesu 19:13-15; 21:15, 16.
5. Jitata, kiebhi an’enu kia tena ku zediua?
Enu mua tokala ku kalakala phala tuana tuenu n’a tene ku kala ni kudia, inzo, ni izuatu. (1 Timote 5:8) Phala n’a tene ku zediua, mua tokala ku a longa ku zola Nzambi, ni ku di longa o maka mê. (Efezo 6:4) O henda ienu kua Nzambi, a tena ku i kaiela uê ku tuana tuenu. Se mu a bazela kála ki tumina o Mak’â Nzambi, o tuana a-nda katula mbote mu milongi ienu.—Tanga Matendelelu 6:4-7; Jisabhu 22:6.
O tuana a tena uá ku di tunda kiambote se mu a suínisa, ni ku a ximana. A tokala uê ku a bazela ni ku a bhana milongi. O ukexilu iú, u tena ku a fidisa ku kala ni ukexilu ua iibha, u a bhangesa ku kamba o ku zediua. (Jisabhu 22:15) Maji ka tokala ku a bazela ni undanda, mba ku a talesa hadi.—Tanga Kolose 3:21.
O Jimbangi ja Jihova ene mu bhanga madivulu avulu, phala ku kuatekesa o jitata ni tuana. O milongi mu madivulu enhá, a tundu mu Bibidia.—Tanga Jisálamu 19:7, 11.
Eye Nange Wandawabhela we o Maka Yá
MUIJI UÊ U TENA KU ZEDIUA
Sota Nzambi Phala ku Zediua mu Ukaza
Ibhuidisu iiadi i tena ku kuatekesa ku kala ni ukaza uambote.
MUIJI UÊ U TENA KU ZEDIUA
Kiebhi ki mu Tena ku Batula o Maka ku Muiji
O ku di zuelesa kiambote mu ukaza ku tena ku kuatekesa o makaza ku kala kiambote mudiâ ni ku zediua.
