OO KUILA eie u di mona kala u Kidistá? Se kiene, ku tuzunda tuiadi ndenge tua athu mu ngongo, eie ué kuene ku uala. Ku kitatu kia athu ku mundu, muthu umoxi, uamba kuila ua mu kaiela Kristu. Lelu kuene jimidi ni jimidi ja jingeleja j’amba kuila a mu kaiela Kristu, maji kala ngeleja iala ni ibanzelu iê ni ilongesu. Mu kiki, o ilongesu iê nange ki iene imoxi ni ia ió amba kuila Jikidistá. O kuila o ima i u xikina iala ni valolo? Xe iala, mukonda se ua mesena kukala Kidistá ia kidi, o ilongesu iê ia tokala i tunda mu Bibidia.

O akaiedi a dianga a Jezú Kristu a exanene “Jikidistá.” (Ikalakalu 11:26) Ki ku bhingile kua exana mu majina a mukuá mukonda ene ngó akexile mu kaiela Kristu. O Jikidistá joso akexile mu kaiela o ilongesu ni ijila ia Mutuameni ua Jikidistá, Ngana Jezú Kristu. Abha o ngeleja iê? O kuila o ngeleja iê i xikina o ilongesu ia Kristu kala kia bhangele o akaiedi a dianga a Kristu? Kiebhi ki uejiia kuila kiene ki bhanga o ngeleja iê? Ua-nda tena ngó kuijiia se kiene se u sokesa o ilongesu iê ni ilongesu ia Bibidia.

 Tala: Jezú Kristu ua bhanene valolo ia dikota ku Mikanda Ikôla kuma Mak’â Nzambi. Muéne ka xikinine o athu akexile mu xisa o ilongesu ia Bibidia, ia akexile mu longa o ijila ia athu. (Marku 7:9-13) Mu kiki, tu tena kuzuela kuila o akaiedi a kidi a Jezú a tokala kuxikina ni kulonga o ilongesu ia Bibidia. Mu kiki, kala muthu uamba kuila Kidistá kima kiambote kudibhuidisa, ‘O kuila o ilongesu ia ngeleja iami, iene imoxi ni ia Bibidia?’ Phala kutambuijila o kibhuidisu kiki, ua tokala kusokesa o ilongesu ia ngeleja iê ni ilongesu ia Bibidia.

Jezú uambe kuila, o ubhezelu uetu kua Nzambi, ua tokala u kala ua kidi, o kidi ki tu sanga mu Bibidia. (Nzuá 4:24; 17:17) O poxolo Phaulu uambe kuila phala kubhuluka tua tokala ‘kuijiia o kidi.’ (1 Timote 2:4) Mukonda dia kiki, o ilongesu ietu ia tokala i tunda mu Bibidia. Mukonda se ki kiene, o muenhu uetu uala mu iluezu!

Tua ku bhingi, tanga o samanu dia ibhuidisu, tala kiebhi o Bibidia i tambuijila o ibhuidisu íii. Tanga o ibatulu ia Bibidia ni kuxinganeka mu itambuijilu iê. Mu kusuluka, dibhuidise, ‘O kuila o ilongesu ia ngeleja iami, iene imoxi ni ia Bibidia?’

O ibhuidisu íii ia-nda ku kuatekesa kusokesa o ilongesu iê ni ilongesu ia Bibidia ni kumona se iene imoxi. O kuila uala polondo phala kusokesa o ilongesu ia ngeleja iê ni ilongesu ia Bibidia? O Jimbangi ja Jihova ni kusanguluka kuoso a tena ku ku kuatekesa kutokuesa o kidi kia Bibidia. U tena kua bhinga phala ku kulonga o Bibidia sé kufuta kitadi. U tena ué kujikula o kijimbuete kietu, jw.org/kmb.