Eie ua mesena kuijiia o kidi kia lungu ni Nzambi—se muéne nanhi, ni ima ia mu uabhela ni ia mu iibhila, ni kuijiia iebhi o vondadi iê? Bhu kaxi ka Maka mê, o Bibidia, Jihova Nzambi u tanga o kidi kioso kia lungu ni muéne. Maji ko muthu uoso-uoso u tanga o Bibidia, u tendela ioso. Mukonda diahi? Mukonda o ku tendela o Mak’â Nzambi, ujitu ua dikota; ko athu oso a tambula o ujitu iú. Tua-nda di longa ia zuela Jezú ia lungu ni maka enhá.—Tanga Matesu 11:25.

O velusu íii i mateka kiki: “Kumbi dienhódio Jezú anga u kumbulula.” Kienhiki, o ima ia mesenene kuzuela Jezú, nange ia lungile ni maka a bhitile kiá. Muéne ua zubhile o ku bazela o athu ka mesenene ku muivua, a tungile mu mbanza jitatu ja Ngalileia, kua bhangele madiuanu. (Matesu 11:20-24) Nange u dibhudisa, ‘kiebhi o muthu ua mono o madiuanu a bhange Jezú, u dituna o ku mu kaiela?’ O athu ka mesenene kuívua Jezú mukonda dia ukexilu ua mixima iâ.—Matesu 13:10-15.

Jezú uejidile kuila, phala o muthu ku tendela o kidi kia lungu ni Nzambi, ku bhinga ima iiadi: O kikuatekesu kia Nzambi ni ku kala ni ukexilu uambote ua muxima. Jezú ua jimbulula: ‘Nga ku ximana Tata, Ngana ia diulu ni ixi, mukonda ima íii ua i suekela jinjimu, ni athu a dimuka ka i mono, maji ua i jingunuina ku ana-ndenge.’ Ua mono kiá se mukonda diahi o ku tendela o Mak’â Nzambi ujitu ua dikota? Jihova, o ‘Ngana ia diulu ni ixi,’ u tena ku sueka mba ku jingunuina o maka mê ku athu kala kia mesena. Maji Nzambi ki mukua kathombo, kana. Mukonda diahi-phe muéne u sola se nanhi ua tokala ku mu jingunuina o maka mê, o Bibidia?

Jihova u xikina o athu a lenduka, a dizangeleka kana. (Tiiaku 4:6) Muéne u suekela o kidi ku ‘jinjimu ni ku athu a dimuka’—o athu enhá ió amba kuila, ka mesena o kikuatekesu kia Nzambi. (1 Kolindo 1:19-21) Maji, muéne uidikisa o maka mê ku ‘ana-ndenge’—ió a bhixila bhu pholo ia Nzambi ni muxima uoso, athu a lenduka kala o ana-ndenge. (Matesu 18:1-4; 1 Kolindo 1:26-28) O Mon’a Nzambi, Jezú, uejidile o athu enhá kioso kia kexile mu ixi. Athu avulu akua ku dizangeleka, ni atuameni a jingeleja exile jinjimu, ka tendela ihi ia kexile mu lombolola o njimbu ia kexile mu tula Jezú, maji o athu a lenduka, o athambi a jimbiji, a i tendela. (Matesu 4:18-22; 23:1-5; Ikalakalu 4:13) Maji, kua kexile jimvuama ni athu a di longele kiavulu, a lendukile, a kituka uá akaiedi a Jezú.—Luka 19:1, 2, 8; Ikalakalu 22:1-3.

Tu tone dingi o kibhuidisu ki tua bhange ku dimatekenu: Eie ua mesena kuijiia o kidi kia lungu ni Nzambi? Se u mesena, ua-nda sanguluka kiavulu kuijiia kuila Nzambi ka xikina o jinjimu a dizangeleka, mu ngongo mumu. Maji muéne u xikina o athu a lenduka, ene mu a sebhulula ku jinjimu ja ngongo. Se u di longa o Mak’â Nzambi ni muxima ua lenduka, ni kilunji kioso, ua-nda dilunga ni athu ene mu a kuatekesa kua Jihova ku tendela o kidi kia lungu ni muéne. O ku tendela o kidi kiki, kia-nda ku bhangesa ku zediua, ni ku kuambata ku “muenhu ua kidi”—o muenhu ua kalela-ku ku mundu uobhe ua kanena ku bheka Nzambi. *—1 Timote 6:12, 19; 2 Phetele 3:13.