O diiala dia dianga, Adá, ua kexile ku muenhu mu hama ja mivu. Maji mu ku suka-ku, muéne ua kuka iu uafú. Kienhiki, o athu ene mu bhanga ioso phala ku lenga o ku kuka. Maji se-ku luua muthu ua tena ku lenga o kufuá. Mukonda diahi? Adá ua kuka iu uafú mukonda dia kituxi mu ku bhukumukina Nzambi. Etu tu kuka, mukonda tua lundula o kituxi kia Adá, kiene ki tu bhekela ué o kufuá.—Tanga Dimatekenu 5:5; Loma 5:12.

Phala tu kale ni muenhu ua kalelaku, tua bhingi muthu umoxi phala ku futa o kituxi mu ku tu kula. (Jobe 33:24, 25) O ku kula, o kifutu ki bhana o muthu phala ku bhulula muthu, kienhiki, etu tua bhindamena ku tu bhulula mu kufuá ku tua lundula. (Makatukilu 21:29, 30) Jezú ua futu o ku kula kioso kiafú phala ku tu bhulula.—Tanga Nzuá 3:16.

Ko athu oso a-nda ku a bhulula ku mauhaxi ni ku kuka. Kienhiki, o athu a bhukumukina Nzambi, kala kia bhange Adá, ka-nda tambula o ujitu ua ku kala ni muenhu ua kalelaku. O athu a a loloka o ituxi iâ, ene ngó a-nda tambula o muenhu ua kalelaku.—Tanga Izaia 33:24; 35:3-6.

Phala ku tu loloka o ituxi ietu, tua tokala ku bhanga kima. Tua tokala kuijiia Nzambi mu ku di longa o Maka mê, o Bibidia. Iene, i tu longa kiebhi ki tu tena ku kala ni muenhu uambote, ni kiebhi Nzambi kia tena o ku tu xikina, ni ku nganhala o muenhu ua kalelaku.—Tanga Nzuá 17:3; Ikalakalu 3:19.