O kuila ua divuile kiá kia iibha, eie ua didi?— * Nange etu oso tua divuile kiá kia iibha. Maji saí ithangana tu dila mukonda dia ku luuala. Saí athu a tena ku tu zuela ima iavulu ia iibha, ki ia kidi. O kiki ki tena ku tu bhekela ndolo, ki kiene?—Nzambi luuala ué kioso o athu kia zuela ima ia iibha ia lungu ni muéne. Tua-nda zuela ia lungu ni maka enhá ni ku mona kiebhi ki tu tena ku sangulukisa Nzambi mu veji dia ku mu luualesa.

O Bibidia i zuela kuma, saí athu a zuelele kuila a zolele Nzambi, a mu ‘luualesa ku muxima.’ ‘Ene akexile mu bhekela ndolo’ kua Nzambi! Mu kidi se-ku muthu u tena ku kuama o mukutu ua Jihova Nzambi. Mukonda Muéne muteni-a-ioso. Tua-nda mona-phe se mukonda diahi Jihova u luuala kioso ki tu kamba ku bhanga o ima i zuela muéne.

O athu a iiadi a dianga ku bhanga Nzambi mu ixi, a mu bhekele ndolo iavulu ku muxima. O athu a iiadi enhá a a tula mu Palaízu mu ixi a ixana, “jaludim ia Edene.” A nanhi o athu a iiadi enhá?—kia dianga, Adá mu ku bhita thembu, Eva. Tua-nda mona ihi ia bhange ene ia bhekela ndolo kua Jihova.

Kioso Jihova kia a tula mu jaludim, muéne ua a tendelesa ku langa o jaludim. Muéne ua a tendelesa uá o ku vuala ni ku kala ku muenhu ua kalela-ku sé kufuá. Maji ande dia Adá ni Eva ku kala ni tuana, kua bhiti kima kia dikota. Eie uejiia ihi ia bhiti?—Anju imoxi ia bhangesa Eva ni Adá ku bhumukina Jihova. Tua-nda mona kiebhi kiki kia bhiti.

O anju ia bhange kima kilondekesa kala o nhoka ia mu zuela. Eva ua uabhela o izuelu ievu—o nhoka ia mu tangela kuila muéne ueji kala kála  “Nzambi.” Kienhiki, Eva ua bhange o kima kia mu tumina o nhoka o ku bhanga. Uejiia se ihi?—

Eva uadi ku muxi, ua tangele Jihova kua Adá kuila ka tokalele ku dia-ku. Ande dia Nzambi ku bhanga Eva, muéne ua tangele Adá: ‘Ku mixi ioso mu jaludim u die-ku kioso ku ua mesena; maji ku muxi-phe ua kuijiia kia uabha ni kia iibha kana kudia-ku; mukonda o kizuua ki ua ka dia-ku, ijiia na-kiu kuma ua ka fuá muene.’

Eva ua kijidile o kitumu kiki. Maji muéne ua suluka ni ku tala iu ua mono kuila “muxi uambote phala kudia, ua uabha ue ku mesu . . . u kanza-ku [kibundu] anga u dia.” Mu ku bhita kithangana, ua bhana ué o kibundu kua muadi uê, Adá, “muene ue anga u dia.” Uejiia se mukonda diahi muéne ua bhange kiki?—mukonda Adá ua betele ku zola Eva, o Jihova, ndenge. Muéne ua solo ku uabhela Eva, mu veji dia ku uabhela Nzambi. Maji o ku belesela Jihova kiene kia beta-kota, o ku belesela muthu uoso-uoso, ndenge!

Ua mu lembalala hanji o nhoka ia zuela ni Eva? Kala o muthu u tena ku bhanga kima kilondekesa kala o boneku ia mu zuela, saí ué muthu ua bhange kima kilondekesa kala o nhoka ia kexile mu zuela. O dízui dia kexile mu tundu ku nhoka diexile dia nanhi?—Diexile o dízui dia “kinhoka kiokulu, a mu ila Diabhu, a mu ila [Satanaji].”

Eie uejiia kiebhi ki u tena ku sangulukisa Jihova?—U tena ku bhanga kiki, mu ku kolokota o ku mu belesela. Satanaji uambe kuma muéne u tena ku nganala oso phala a bhange o vondadi iê. Mukonda dia kiki, Jihova u tu tangela: “Dimuka mon’ami u tanese o muxima uami, phala ngi kale ni kia ku vutuila oso a ngi [sebhulula].” Satanaji u sebhulula Jihova. Muéne uambe kuma u tena ku nganala oso phala ka sidivile Jihova. Mukonda dia kiki, sangulukisa Jihova mu ku mu belesela ni ku mu sidivila! O kuila ua-nda ki bhanga muene?—