Jairo a mu vuala ni uhaxi ua uongo a uixana quadriplegia espástica. * Mukonda dia kiki, muéne ka tena kuendesa o mukutu uê. O uongo uê ki u tena ku kalakala kumoxi ni tuluingi tuê, kienhiki, ithangana ioso o maku mê ni inama i sunha-sunha kála uala ni uhaxi ua kikonha. Saí ithangana, kioso Jairo kia di sunha-sunha, muéne uivua ndolo iavulu ku mukutu. O athu ku mbanji iê, se ka di lange, a tena kua kuama. Mukonda dia kiki, ithangana iavulu o maku mê ni inama ene mu i kasa mu kialu kiê kia malola phala ka kuame akuâ.

Jairo ua mu kula ni jindolo javulu. Kioso kia mu vuala, mu ku bhita mbeji jitatu, muéne ua mateka ku kata kiavulu ni kuambuka. Saí ithangana, Mam’etu ua kexile ku mu kuata ni nguzu ioso ni ku mu ambata mu inzo ia ku saka mu ku banza kuila muéne ua fuile.

Mukonda dia ku di sunha-sunha ithangana ioso, o ifuba ia Jairo ia nemana. Mu ku tenesa 16 ia mivu, muéne ua bukuka o miongo, kienhiki kua bhingile ku mu bhanga pelasá ku ditabela diê ni ku miongo. Nga mu di lembalala hanji kioso Jairo kia kexile mu dila usuku uoso mukonda dia jindolo ja pelasá.

Mukonda dia uhaxi uê, Jairo ka tenene ku bhanga ima kála o kudia, ku zuata ni ku zeka, ua bhingile ku mu kuatekesa. Mam’etu ni Tat’etu ene akexile ku mu bhangela o ima. Sumbala Jairo ua bhindamene kikuatekesu ithangana ioso, o jitata jetu akexile ku mu lembalala kuila muéne ka tokalele ku jimba kuila ka bhindamene ngó o kikuatekesu kia athu maji ua bhindamene ué o kikuatekesu kia Nzambi.

O jitata jetu Jimbangi ja Jihova, a mateka ku tanga o misoso ia Bibidia kua Jairo kioso muéne kiexile hanji kabuetele. Ene ejidile kuila, o muthu u beta ku sanguluka se u kala ni ukamba uambote ni Nzambi. Sumbala Jairo kexile ni nguzu ku mukutu, maji muéne ueji tena ku kala ni kidielelu kia kidi ku muenhu uê. Maji o jitata jetu akexile mu di bhuidisa se Jairo ueji tena ku tendela o Mak’â Nzambi.

Saí kizuua, kioso Jairo kiexile hanji mona-ndenge, Tat’etu ua mu bhingi, uixi: “Jairo, nga ku dióndo zuela n’eme. Se ua ngi zolo, ua-nda tena kuzuela!” Kioso Tat’etu kia kexile ku mu dionda phala kuzuela kima, Jairo ua mateka o ku dila. Muéne ua  bhange ioso phala kuzuela, maji ka tenene. Tat’etu ua divu kia iibha ku muxima mukonda dia ku didisa Jairo. Maji kiokio, kia kuatekesa Tat’etu kuijiia kuila Jairo uevuile ia zuelele muéne. Kua mu bhonzele ngó o kuzuela.

Ki kua bhitile thembu iavulu, o jitata jetu a mono kuila Jairo ua tenene ku bhilula o mesu’ê ni lusolo-luoso phala kuzuela ihi ia kexile mu banza. Jairo ua luualele kiavulu mukonda saí ithangana o athu ka kexile mu tendela ihi ia mesenene kuzuela muéne. Maji kioso jitata jetu kia mateka o ku mu tendela mu ku mu tala ku mesu, Jairo ua sangulukile kiavulu. O ku sanguluka kuê kua londekesele kuila muéne ua kexile mu sakidila.

Saí dotolo i kuatekesa o athu o kuzuela, uambe kuila phala tu tene ku di zuelesa kiambote ni Jairo, mu ku muibhula se u xikina kima mba kana, tua tokalele ku zangula o maku’etu a iiadi. O lukuaku lua kadilu lu lombolola kuila, muéne ua xikina, o lukuaku lua kiasu, lu lombolola kuila muéne ua ditunu. Kienhiki, muéne ueji zuela ia mesenene mu ku tala ku lukuaku lua tokala.

O Jimbangi ja Jihova ene mu bhanga iônge ia makota ni ia ilunga lutatu ku muvu, mua bhanga madiskursu phala o nzungule dia athu. Jairo ua kexile mu sanguluka kiavulu kioso kia kexile mu bhanga o diskursu phala ió eji ku a batizala. Saí kizuua kioso Jairo kia tenesa 16, Papa ua mu ibhuidisa, “Jairo, eie ua-ndala ku ku batizala?” Muéne ua tale Papa ku lukuaku lua kadilu, kiki kia londekesa kuila muene ua mesenene ku mu batizala. Kienhiki Papa uambe, “Eie ua kanena kiá Nzambi kuila ua-nda mu sidivila katé ku hádia ni hádia?” Jairo ua tale dingi ku lukuaku lua kadilu lua Papa. Kiki kia londekesa kuila Jairo ua bhakuile kiá o muenhu ué kua Jihova mu musambu.

Mu ku di longa né o Bibidia, ki kuexile phata kuila muéne uejidile kiambote ihi ilombolola o batizu ia Kidistá. Kiki-phe ku muvu ua 2004, muéne ua tambuijila o kibhuidisu kia beta-o-kota, “ua di bhakula kua Jihova phala ku bhanga o vondadi iê?” Jairo ua tambuijila o kibhuidisu kiki mu ku tala bhulu. Kiki kiexile o kijimbuete kiê kia ku xikina. Kioso kia tenesa 17 ia mivu a mu batizala iu ua kituka Mbangi ia Jihova.

Ku muvu ua 2011, a sange ndunge iéngi phala Jairo kuzuela ia mu kala ku muxima—komputadolo a iendesa kuala o mesu. O komputadolo i kaiela o mona-diesu phala ku jikula o jifoto mu komputadolo íii. O ku tala ni mesu suíi ku jifoto jala mu komputadolo kua difuangana ni ku bueta ku mauze a  komputadolo. Jairo a mu bhangela ijimbuete ia jifoto ilombolola ia mesena muéne o kuzuela. Kioso muéne kia tala ni mesu suíi ku jifoto jiji, o komputadolo i tundisa o dízui kála muéne-muene ua mu zuela.

Kioso o kuijiia kua Jairo kua lungu ni Bibidia, kua dibandekesa, o vondadi iê ia ku kuatekesa o athu kuijiia Nzambi ia di bandekesa ué kiavulu ku muxima. Semana joso kioso muiji uetu kia xikama phala ku di longa o Bibidia, muéne u tala ku komputadolo iê ni ko kuami. Muéne u bhanga kiki phala ku ngi lembalala kuila nga tokala ku mu sonekena o itambuijilu ia ibhuidisu ia-nda bhanga mu kiônge.

Mu kiônge, muéne ni muanhu uoso u sota ni mesu’ê o jifoto ja tokala mu komputadolo, u ji tala ni mesu suíi, o dízui diê anga a divua kuala o mundu uoso uala mu kiônge. Muéne uelela mu ku suínisa o jiphange mu kilunga mu ukexilu iú. Alex, dikamba dia Jairo, uambe: “Ngi diuana kiavulu mu kuívua o itambuijilu ia Jairo ia lungu ni Bibidia.”

O mesu a Jairo ene mu mu kuatekesa ué kuzuela ni athu ia lungu ni ima ia mu di longa mu Bibidia. Muéne u bhanga kiki mu ku tala ku foto ilondekesa jaludim muala iama ni athu a jixi joso ala kumoxi ni ku tululuka kuoso. Kioso muéne kia tala ku foto íii, o komputadolo i tundisa o dízui diê, dixi: “O Bibidia i tu dielelesa kuila o ixi ia-nda kala palaízu, ki mua-nda kala dingi ku kata ni kufua, Dijingunuinu 21:4.” Se o muthu ulondekesa kuila ua mesena ku di longa o Bibidia, muéne u tala dingi ku foto iéngi ia tokala mu kuibhula, “Eie ua mesena ku di longa o Bibidia n’eme?” Kukue’tu ua diiala ua xikina ku di longa o Bibidia. Kisangusangu kia dikota ku mona Jairo ni kikuatekesu kia phange ia mukuá ku longa o Bibidia kua Kukue’tu. Kuku’etu a mu batizala mu kiônge kia dikota kia bhiti mu mbanza ia Madrid ku mbeji ia Kakuinhi ka 2014.

O alongexi a xikola muene mu di longa Jairo ene mu mona o ubhezelu uê kua Nzambi. Rosario, dotolo iê, saí kizuua uambe: “Hádia se ngi mesena ku kala kidistá, nga-nda sola ku kala ngi Mbangi ia Jihova. Ngene mu mona kiebhi o kixikanu kia Jairo kiene mu mu kuatekesa o ku sanguluka ku muenhu né muene ni ku kata kuê kuku.”

Jairo u sanguluka kiavulu kioso ki ngi mu tangela o kikanenu kia Bibidia: “Inema ia ká tuka-tuka, kala jimbambi o dimi dia mabubu dia k’emba.” (Izaia 35:6) Sumbala saí ithangana muéne u dila mukonda dia ku kata kuê, maji muéne u beta o ku sanguluka. Muéne ua sanguluka kiki, mukonda ua dielela kua Nzambi ni makamba mê mu kilunga. O kidielelu kiê ni kixikanu ki bhana umbangi ua kuila o ku sidivila Jihova ku kuatekesa o muthu ku kolokota né muene ni ibhidi.