O kuila ua di bhangele kiá o ibhuidisu íii? Se ua di bhangele kiá, k’eie ngó kana. O athu ku mundu uoso ene mu di bhanga o ibhuidisu íii ia beta-o-kota ku muenhu. O kuila u tena ku sanga o itambuijilu?

Mazunda ni mazunda a athu eji tambuijila kuila “u tena ku sanga.” Mukonda diahi? Mukonda ene a sange o itambuijilu ia ibhuidisu iâ mu Bibidia. Ua mesena kuijiia ihi i longa o Bibidia? Se ua mesena, eie u tena ku di longa o Bibidia ni Jimbangi ja Jihova sé ku futa. *

Ia lungu ni ku di longa o Bibidia, saí athu ene mu zuela: “Ki ngala ni kithangana.” “Ku bhonza o ku di longa o Bibidia. “Ngala ni ima iavulu phala ku bhanga.” Maji a mukuá ala ni ibanzelu iéngi. Ene a uabhela ku di longa o Bibidia. Tanga o misoso ia athu enhá:

• Gill, mukua Inglaterra uambe: “Eme nga kexile múia mu ngeleja ia Katolika ni mu Prostante, nga kexile múia ué mu tembulu ia ji Sikh, ni ia Budista, nga di longo o Bibidia mu xikola ia katunda. Maji ki nga sange o itambuijilu ia ibhuidisu iami ia lungu ni Nzambi. Saí kizuua kueza Mbangi ia Jihova ku bhata diami. Nga sangulukile kiavulu mukonda ioso ia kexile mu zuela ia kexile mu tunda mu Bibidia, eme nga xikina ku di longa o Bibidia ni muéne.”—

• Koffi, mukua Benin uambe: “Nga kexile ni ibhuidisu iavulu ia lungu ni Bibidia, maji ki nga sangulukile ni itambuijilu ia kexile mu ngi bhana o kafunga ka ngeleja iami. Maji sai Mbangi ia Jihova ua tambuijila o ibhuidisu iami ni Bibidia. Kioso muéne kia ngi bhuidisa se nga mesenene ku di longa dingi, eme nga xikina.”—

• José, mukua Brazil uambe: “Nga mesenene kiavulu kuijiia kuebhi kuia o athu kioso kia fua. Nga banzele kuila o athu afu kiá a tena ku bhanga kia iibha ku athu ala ku muenhu, maji nga mesenene kuijiia ihi i longa o Bibidia. Mu kiki-phe nga mateka ku di longa o Bibidia ni kamba diami uexile Mbangi ia Jihova.“—

• Dennize, mukua México uambe: “Nga fikisa ku tanga o Bibidia, maji ki nga kexile mu i tendela. Maji o Jimbangi ja Jihova eza a ngi jimbulula kiambote o ikanenu ia Bibidia. Nga mesenene ku di longa o Bibidia.”—

• Anju, mukua Nepal uambe: “Nga kexile mu di bhuidisa se Nzambi ua kexile mu ngi suua. Kienhiki nga mateka ku samba kua Nzambi. Mu kizuua kia kaiela-ku o Jimbangi ja Jihova a phupu ku dibhitu diami eme nga xikina ku di longa o Bibidia.”—

O misoso íii i tu lembalesa o izuelu ia Jezú, uexi: “A beta ku zediua oso évua o maka ma Nzambi anga a ma lunda!” (Luka 11:28) Kidi muene, tuejiia kuila athu oso a bhindamena kuijiia Nzambi. Nzambi muéne ngó u tena ku tu kuatekesa ku muijiia, muéne u bhanga kiki bhu kaxi ka Maka mê, o Bibidia.

Kiebhi-phe ki u tena ku di longa o Bibidia? Mbote iahi i u tena o ku katula? O milongi ia-nda kaiela ia-nda tambuijila o ibhuidisu íii.