Nga kulu mu mbanza ia Alicante, mu ixi ia Espanha. O muiji uami ua kexile ni maka avulu, mukonda dia kiki nga kudila mu ikoka. O inzo iami ia zukamene bhu diloja mua kexile mu iudika malola a makalu. Kuene ku nga sange diiala dijina diê José María, ua kexile mukalakadi a diloja, ua kituka kamba diami. Muéne uexile muthu uambote ua ngi zolele kiavulu, o henda íii ki i kexile ku muiji uami. Mu ithangana ia bhonzo, muéne ua kexile mu ngi kuatekesa kála kota diami, uexile kamba diami dia kazola sumbala muéne uexile kia dikota.

José María, ua kexile mu di longa o Bibidia ni Jimbangi ja Jihova. Ngejidile kuila muéne ua uabhele kiavulu o ima ia kexile mu dilonga mu Bibidia, saí ithangana muéne ua kexile mu ngi longa. Eme nga kexile ku muivua, maji ki ngi bhanene valolo ku ima ia kexile mu ngi longa. Mukonda ngexile ngi munzangala, nga mesenene ku bhanga ima iengi. Maji saí kizuua o ima ia lunguluka.

Ki ngi uabhela ku tanga o musoso ua kiluezu kiki. Ngi tena ku zuela ngó kuila ngexile ngi munzangala ua tobho sé kilunji. Mu kizuua kimoxi ngó, o muenhu uami uoso ua lunguluka. Ngexile ngi munzangala ua suina, ki ku nangenena nga bhiluka ngi kinema, nga kexile mu inzo ia kusaka. Kia ngi bhonzele kiavulu kuxikina kuila nga nemana. Nga kexile mu dibhuidisa se ‘mukonda diahi ngala hanji ku muenhu?’

José María, uéza mu ngi kunda, ua zuela ni Jimbangi ja Jihova mu kilunga kiê phala kuíza mu ngi kunda. Kioso ki nga kexile mu ku a mona, nga sangulukile kiavulu. Kioso kia ngi katula mu dixilu dia dianga muene mu kala ió a katé kiavulu, nga mateka ku dilonga o Bibidia. Nga di longo se mukonda diahi o athu ene mu tala hadi, a fua, ni mukonda diahi Nzambi uehela o ima ia iibha kubhita. Nga di longo ué o ikanenu ia Nzambi ia kuila, ku hádia o athu a-nda tunga mu ixi, ka-nda kala dingi ni kituxi, se-ku dingi muthu ua-nda zuela: “Nga kata, lémbua.” (Izaia 33:24) Iene o veji ia dianga i nga mateka kukala ni kidielelu ku muenhu uami.

Kioso ki nga tundu mu inzo ia kusaka, nga suluka mu ku dilonga o Bibidia. Nga kexile ni kialu kia inema, kia kexile mu ngi kuatekesa kuia mu iônge ia Jimbangi ja Jihova ni kuia mu boka. Mu kizuua kia 5 ku mbeji ia Kamoxi ua muvu ua 1988, a ngi batizala, nga kexile ni 20 a mivu. Jihova Nzambi ua ngi kuatekesa kusanguluka ku muenhu. Maji ihi i ngeji bhanga phala ku mu londekesa o kisakidilu kiami?

Ki ng’ehela kuila o uhaxi uami u ngi fidisa kubhanga ioso i nga tenene mu sidivisu ia Jihova. Eme nga mesenene kuia ku pholo. (1 Timote 4:15) Ku dimatekenu kia bhonzele kiavulu, mukonda jindandu jami ja zembele o ubhezelu uami. Maji nga kexile ni jiphange jami mu nzumbi. Ene akexile mu ngi kuatekesa kuia mu iônge ni kuia mu boka.

Maji mu kubhita kithangana, nga bhindamene muthu u ngi tambula konda suku ni muanha. Tua soto inzo i tambula konda ia athu ala ni unema, etu tua sange kididi mu mbanza ia Valência, iexile dikanga phala ku bhixila mu mbanza ia Alicante, tuenda 160 a jikilómetulu. Kuene ku nga tungu katé lelu.

Sumbala nga kexile bhu hama, maji nga mesenene kukolokota kusidivila Jihova. Ni kitadi kiene mu bhana o nguvulu ku jihaxi, ni ima iéngi, nga sumbu komputadolo, eme nga bhingi ku ngi tudila-iu bhu mbandu ia hama iami. Nga sumbu ué mutelembe ua kafuetele. Izuua ioso o muthu uene mu ngi tambula konda, u jikula o komputadolo ni mutelembe ua kafuetele. Ngi kalakala ni komputadolo iami ni kikuatekesu kia makina i ngi kuata ni muezu uami. Ngala ué ni muxi uófele u ngi kuata ni kanu diami. O muxi iú, u ngi kuatekesa kusoneka mikanda mu komputadolo ni kusoneka o ijimbuete mu mutelembe ua kafuetele.

Kiebhi o ji makina jiji jene mu ngi kuatekesa? Kia dianga, ji ngi kuatekesa kutanga o milongi mu kijimbuete jw.org ni mu BIBLIOTECA ON-LINE da Torre de Vigia. O ima íii iene mu ngi kuatekesa kiavulu! Saí ithangana ngi bhita ji ola javulu mu kutanga o madivulu metu, phala kusuluka ni ku dilonga ia lungu ni Nzambi ni ídifua iê. Kioso ki ngi divua ubheka, mba ngi luuala, ngi sanga ué kima mu Kijimbuete kietu ki ngi sangulukisa.

O komputadolo iami, iene mu ngi kuatekesa kuívua o iônge ioso mu kilunga ni kubhanga mbandu mu iônge íii. Ngi tena kutambuijila, ku samba ku bhanga madiskursu, ni kutanga o Mulangidi phala o jiphange. Sumbala ki ngi tena kuia mu kiônge, maji ng’ejiia kuila nga tokala mu kilunga.

O mutelembe ua kafuetele ni komputadolo, i ngi kuatekesa ué mu sidivisu ia kuboka. Ki ngi tena kuia mu boka inzo ni inzo kála kiene mu bhanga o Jimbangi ja mukuá ja Jihova. Maji né kiki, ngene mu boka. O komputadolo iami ni mutelembe uami, iene mu ngi kuatekesa kubokela o athu. Eme nga uabhela kiavulu kuzuela ni athu bhu kaxi ka mutelembe, mukonda dia kiki o tufunga a ngi bhingi kukala ku pholo ia kikalakalu kia kuboka ni mutelembe ua kafuetele. O kikalakalu kiki, kiene mu  kuatekesa kiavulu o aboki ka tena kutunda ku bhata phala kuia mu boka.

Maji eme ki ngala ngó ni kikuatekesu kia jimakina jiji kana. Izuua ioso o makamba mami eza mu ngi kunda. Eza ni jindandu jâ, ni athu a mesena ku dilonga o Bibidia. Saí ithangana a ngi bhinga kumateka kuzuela nau. Mu ithangana ia mukua o miji ieza mu ngi kunda, a ngi bhinga phala kubhanga nau o ubhezelu ku muiji. Nga uabhela kumona o tuana kuxikama bhu mbandu iami, ni kuzuela se mukonda diahi ene a zolo Jihova.

Nga uabhela kutambula ajitu avulu. O dixilu diami diezala ni athu mu ithangana ioso, makamba eza mu ngi kunda, saí iâ a tunda dikanga. O athu ene mu ngi tambula konda mu kididi kiki, a diuana kioso kia mona o henda iene mu ngi londekesa o makamba mami. Izuua ioso ngi sakidila Jihova ua ngi bheka mu kilunga kiê, muala athu a di zola mudiâ.

Se muthu u ngi menekena, anga u ngi bhuidisa se ngala kiambote, eme ngi mu tambuijila ngó: “Kabasa kuáki!” Mu kidi, k’eme ngó nga mu bhita mu ibhidi kala íii. Jikidistá joso a mu bhânga—“o ita iambote ia kuxikana.” (1 Timote 6:12) Ihi iene mu ngi kuatekesa kukolokota mu mivu ioso íii? Ngene mu samba izuua ioso mu kusakidila Jihova, ua ngi kuatekesa ku bhana valolo ku muenhu uami. Ngene mu bhanga ioso i ngi tena mu sidivisu ia Nzambi, ni ku kingila o ima ia kanena Nzambi ku hádia.

Saí ithangana ngene mu xinganeka ku mundu uobhe, kioso nga-nda tena kulenga ni kutuka-tuka dingi. Saí ithangana ngi tonoka ni kamba diami José María—kinema ué—kuila tua-nda lenga kumoxi dikanga dia lebha. Eme ngi muibhula: “Nanhi ua-nda tuama ku bhixila?” Muéne u tambuijila: “O kia beta-o-kota ko kutuama kubhixila kana, maji o kukala mu Palaízu ni kutena kulenga.”

Kiene mu bhonza kiavulu kuxikina kuila ngala ngi kinema. Ng’ejiia kuila mu unzangala uami, nga kambele kilunji, eme nga mu bhita ni ibhidi íii. Maji ngi sakidila kiavulu mu kuila Jihova ka ngi bhana dikunda. Muéne uene mu ngi bhana ima iavulu—jindandu javulu mu nzumbi, ku sanguluka ku muenhu ni kukuatekesa o athu kuijiia Nzambi ni kukala ni kidielelu ku hádia. Se a ngi bhinga phala kuzuela ioso mu kizuelu kimoxi ngó, ngeji zuela kuila Jihova uene mu ngi bhana mabesá avulu.