PANAYIOTA ua kudila mu ixi ia Mediterraneo. Mu unzangala muéne ua mesenene kiavulu kubhanga mbandu ku unguvulu. Mu kubhita thembu, muéne ua kituka seketa ia kibuka kia athu a mesenene kukala uá jinguvulu mu diembu mua tungile muéne. Muéne ua kexile múia nzo ni inzo mu bhinga kitadi phala kukuatekesa o kibuka. Maji mu kubhita thembu, Panayiota ua luuala kiavulu. Sumbala o athu mu kibuka akexile mu dixana makamba, maji ene akexile ni kathombo, luímbi, ku di kuata ni kudikuatela difuba mudiâ.

Daniiele mukua Irlanda, ua kexile múia mu ngeleja ni jitata jê. Maji muéne u di lembalala o mangonha ni makutu a ji padele, akexile mu nua kiavulu, kujokala phala kunganhala kitadi ni kunhana o kitadi kia kexile mu bhana o athu mu ngeleja, maji akexile mu tangela Daniiele kuila se muéne ua tele kituxi eji mu takula mu ifernu ia túbhia.

Jeffery ua bhiti mivu iavulu mu kukalakala mu ditenda dia jinaviu, dia kexile ni jingana javulu. O jifiliale ja ditenda didi ja kexile mu ixi ia Reino Unido ni Estados Unidos. Muéne u dilembalala kuila o athu a mukuá akexile uá mu sumbisa, akexile mu nganala o akunji a jinguvulu phala kutena kuta o uenji uâ.

Kuene dingi misoso iavulu ia lungu ni maka enhá. O mangonha ni makutu tu a sanga mu ididi ioso—ku jinguvulu, mu jingeleja, ni mu kuta uenji. O kizuelu “mangonha” kia tundu mu Ngeleku, kilombolola kiteka kia pholo jiiadi. Mu kubhita thembu, o kizuelu kiki kia lombolola muthu u di bhangesa kukala muthu uambote phala kunganala ngó akuâ.

O akua mangonha a bhangesa akuâ kukala ni njinda ni kuluuala. Mukonda dia kiki, o muthu uala ni njinda u tena kudibhuidisa, “O kuila ku hádia o mangonha ni makutu a-nda bhua?” Mu kidi, o Mak’â Nzambi a tu kuatekesa kudielela kuila ku hádia o mangonha a-nda kubhua.

O Bibidia i tu tangela kuila, o mangonha ni makutu ka mateka ni athu kana, maji a mateka ni anju ku diulu. Ku dimatekenu, Satanaji o Diabhu ua di sueka ku nhoka iu ua di bhangesa kukala muthu uambote phala kunganala o muhatu ua dianga Eva. (Dimatekenu 3:1-5) Tundé o kithangana kieniókio, athu avulu ene mu kaiela Diabhu mu ku di bhangesa kukala athu ambote phala kunganala akuâ.

 M’ukulu kioso akua Izalaiele kia mateka kubhanga o ubhezelu ua makutu, Nzambi ua a dimuna veji javulu. Bhu kaxi ka polofeta Izaia, Jihova uambe: ‘Manhi o mundu iú ua ngi zukama, uala ku ngi xila ngó ni dikanu diâ, ni mizumbu iâ, maji o muxima uâ ua di sandula kokuami.’ (Izaia 29:13) Kioso akua Izalaiele kia kambele kudiela o ituxi iâ, Jihova uehela akua Babilonha kubuika Jeluzaleme ni tembulu iê ku muvu ua 607 A.K.K., ni akua Loma ku muvu ua 70 K.K. Ioso íii ilondekesa kuila, Nzambi kehela akua mangonha kunangenena.

Maji Nzambi ni Mon’ê Jezú, a zolo kiavulu oso ala ni muxima ua kidi. Mu kifika, kioso Jezú kia kexile mu ngongo, diiala a mu ixanene Natanaiele uai kua muéne. Jezú kioso kia mu mono, uambe: ‘Talenu! Muthu ió mukua Izalaiele ua kidi, moxi diê ki muala mangonha!’ (Nzuá 1:47) Natanaiele, a mu ixanene ué Matulu, uexile ué poxolo ia Jezú.—Luka 6:13-16.

Jezú ua bhiti kithangana kiavulu ni maxibulu mê, iu ua a longo o ibanzelu ia Nzambi. Kienhiki, o maxibulu ka tokalele kukala akua mangonha. Phala kulondekesa kuila ua zembele kiavulu o mangonha, Jezú ni njinda ioso ua bazela o atuameni a jingeleja mu izuua ioio exile akua mangonha. Tala o ifika íii.

Ene akexile ‘mu bhanga jimbote’ phala athu kua mona. Jezú ua tangela o jingivuidi jê, uixi: “Alukenu, ki mu bhange jimbote jenu bhu pholo ia athu, phala ene ku mi mona . . . uila ki bhanga akua mangonha.” Muéne ua a tendelesa kubhanga mbote ‘mu kasuekele.’ Ene a tokalele kusamba mu xilu diâ, kana mu jiphambu phala athu kua mona. Mu kubhanga kiki, o Tat’ê Jihova ueji sanguluka kiavulu ni ubhezelu uâ.—Matesu 6:1-6.

Ene a uabhele kumona o ituxi ia akuâ. Jezú uambe: “Kamangonha! Dianga hanji kukatula o kimuxi mu diesu dié e’muène nda u mone kiua kukatula o kakisoso mu diesu dia mukuenu.” (Matesu 7:5) Mu kutala ngó o ituxi ia akuâ mu veji dia kutala o ituxi iê, o muthu u dilondekesa kukala muthu uambote maji mu kidi kana. Maji tuejiia kuila, “oso ituxi a i te, a bhondalala, o bhu fuma ia Nzambi, i bhulula, ka tena-bhu.”—Loma 3:23.

Ene akexile ni ibanzelu ia iibha. Saí kizuua, o maxibulu a ji Falizeu ni a Helode, aile kua Jezú ia a mu bhange kibhuidisu kia lungu ni kufuta o lubhaku. A bhombo Jezú exi: “Mesene, etu tuejiia kuma Eie u mukua kidi, u longa njila ia Nzambi sé makutu.” Mu suluka a mu bhange kibhuidisu kia bhonzo, exi: “O lubhaku lua Sézalu lua tokala ku lu bhana, inga kana?” Jezú ua tambuijila: “Mu ngi bhombela-hi, mu akua mangonha?” Jezú ua a exana akua mangonha mukonda ene ka kexile mu sota kuijiia kana, maji a mesenene ku “mu kuatela mu kuzuela kuê.”—Matesu 22:15-22.

Kioso kia mateka o kilunga kia Jikidistá ku Pendekoxi ku muvu ua 33 K.K. athu oso mu kilunga exile akua kidi. O Jikidistá ja kidi, akexile mu bhanga ioso mu ioso phala ka kale ni kadia ku mixima iâ. Mu kifika, Phetele, uexile ué poxolo ia Jezú, ua suínisa o jiphange jê mu kilunga ‘kutumaka o kidi, o henda iâ ku jiphange ki i moneka mangonha.’ (1 Phetele 1:22) O poxolo Phaulu ua tendelesa o jiphange jê kukala ni “henda i tunda mu muxima uazele, ni mu kitongoluelu kiambote, ni mu kuxikana kua kidi ki kua kudibhangesa.”—1 Timote 1:5.

O ilongesu ia Jezú ni ia jipoxolo i tu sanga mu Bibidia, i tu kuatekesa ué kiavulu lelu kála kia kuatekesa o athu ku hama ia dianga. Ia lungu ni maka enhá, poxolo Phaulu ua soneka: “Kuma o kizuelu kia Nzambi kima kia muenhu, ki ala ni kutena. Kia beta kutua o xibhata ia mazu a iadi ndenge. O kubatula kuê, ki sesa ni muenhu, ni nzumbi, ni masokuelu, ni uongo ua ifuba. Ki tungula ni jivondadi ni mabanzelu ma mixima ia athu.” (Jihebeleu 4:12) Mu kuijiia o ilongesu ia Bibidia ni kubhanga ioso phala ku i belesela, kuene mu kuatekesa athu  avulu kukala akua kidi ni kueha o mangonha. Tala o misoso ia athu kitatu u tua tange kiá ku dimatekenu.

Panayiota ua banze kulungulula o muenhu uê kioso kiai mu kiônge kia Jimbangi ja Jihova. Mu kiônge muéne ka mono-mu muthu ua di bhangesele kukala muthu uambote mu kudibhana ni akuâ. Muéne uambe: “Mu kiônge nga mono kuila o athu a di zolele mu kidi. Mu mivu ioso i nga kexile mu kibuka kia athu a mesenene kukala jinguvulu, ki nga mono o ukexilu ua kudizola mu kidi.”

Panayiota ua mateka kudilonga o Bibidia ia a mu batizala. Tundé kia mu batizala kua bhiti kiá 30 a mivu. Muéne uambe: “Nga sangulukile kiavulu, kana mukonda dia kuia nzo ni inzo kubhinga kitadi phala kukuatekesa o kibuka mu nga tokalele, maji nga sangulukile mukonda dia kuboka o njimbu iambote ia Utuminu ua Nzambi, o Utuminu iú uene ngó ua-nda tena kubheka kutululuka mu ngongo.”

Daniiele ua kituka ué Mbangi ia Jihova iu ua tambula ikalakalu iavulu mu kilunga. Mu kubhita tumivu, ua lueza, o muxima ua mateka ku mu fundisa. Muéne uambe: “Nga di lembalala o mangonha ni makutu u nga kexile mu mona mu ngeleja m’ukulu, kienhiki nga mono kuila ki ngi tokalele kusueka o kituxi kiami, eme nga ditunu o ikalakalu i nga kexile na-iu mu kilunga. Ki ngeji divua kiambote kubhangesa o jiphange jami kufika kuila ngi muthu uambote mbé kana.”

Maji mu kubhita thembu, Daniiele ua divu kiambote iu ua xikina kutambula dingi ikalakalu mu kilunga. Oso a bheza Nzambi ni muxima ua kidi, a bhanga kála kia bhange Daniiele. Ene a dilongo “kukatula o muxi” mu diesu diâ ande dia “kukatula o kakisoso” mu diesu dia jiphange jâ.

Jeffery, ua bhiti mivu iavulu mu kuta uenji, uambe: “Mu kudilonga o Bibidia, nga mono kuila ki ngi tokalele dingi kubhanga o salu ióio ia kutanga makutu. O izuelu i tu sanga mu divulu dia Jisabhu 11:1, ia ngi thandanganhesa o muxima, iambe kuila o ‘pezu ia kupezala ni mangonha, Jihova ia mu iibhila kiavulu.’” Jeffery ka difuile ni Jifalizeu a bhangele kibhuidisu kua Jezú maji ni ibanzelu ia iibha ku muxima, Jeffery ua di longo kukala ni ibanzelu iambote ni ia kidi mu kudibhana ni jiphange jê mu kilunga ni athu amukuá.

Ji midi ni ji midi ja Jimbangi ja Jihova ku mundu uoso, a bhanga ioso phala kubelesela o ilongesu ia Bibidia. Ene a bhanga nguzu phala ku “zuata o muthu uobhe a mu bhangulula mu kidifua kia Nzambi, ki di monekena mu kukala ni muenhu ua kuiuka, ni mu kuzela kua kidi.” (Efezo 4:24) Tua mu ku suínisa kusota kuijiia kiambote o Jimbangi ja Jihova, ni ilongesu iâ ni ku ku kuatekesa kuijiia o mundu uobhe ua kanena Nzambi. Ku mundu uobhe kua-nda kala ngó “ubatuilu ua kuiuka,” o mangonha ni makutu ka-nda kala-ku dingi.—2 Phetele 3:13.