Athu avulu adibhwidisa se mukonda dyahi ala ku mwenyu, ene nange adibhwidisa: “Mukonda dyahi twala bhabha?” mba “Mukonda dyahi ngala ku mwenyu?” O Bibidya itulonga kwila, atubhange phala tukale ni ukamba wambote ni Nzambi. Tala o milongi ya kidi itusanga mu Bibidya:

•   Nzambi mwene o Mubhangi wetu. O Bibidya yamba: “[Nzambi] mwene wa tubhange, mwene wa tuvu.”—Jisálamu 100:3; Dijingunwinu 4:11.

•   Nzambi wejiya se mukonda dyahi wabhange o ima yoso yene mu ngongo, wejiya we se mukonda dyahi watubhange.—Izaya 45:18.

•   O Bibidya yamba: “Azediwa yó ejiya kwila abhindamena Nzambi.” O kibhindamu kiki kyalungu we ni hanji ya kwijiya se mukonda dyahi twala ku mwenyu. (Matesu 5:3) Mwene wamesena kwila etu twijiya o maka yá.—Jisálamu 145:16.

•   Etu tu dikila o ibhindamu yetu mu nzumbi, mu kukala ni ukamba wambote ni Nzambi. Sumbala sayi athu abanza kwila o muthu katena kukala kamba dya Nzambi, maji o Bibidya yamba: “Zukamenu kwa Nzambi, mwene wanda mi zukama we.”—Tiyaku 4:8; 2:23.

•   Phala kukala kamba dya Nzambi, twatokala kukala ni ukexilu wa mwenyu u mu sangulukisa. O Bibidya ijimbulula o maka yâ mu divulu dya Ndongixi 12:13, yene yamba: “Xila Nzambi, u aluke o ijila iyê, mukonda kyene kya fwama athu oso ku ki bhanga.”—Bíblia na Linguagem de Hoje.

•   Ku hádya twanda tendela dingi kyambote se mukonda dyahi Nzambi watubhange, kyoso mwene kyanda zubha o jiphaxi, ni kubhana o mwenyu wa kalelaku ku makamba mê, kifwa yo amubheza ni kidi kyoso.—Jisálamu 37:10, 11.