Әм Дәрһәԛа Хԝәде жь Пʹехәмбәред Ԝи Педьһʹәсьн
Ԝәʹде бәре Хԝәде пʹехәмбәр дьданә хәбате, сәва кӧ әʹламәтийа фәрз дәрбази инсанәте кә. Гәло әв әʹламәти дькарьн али мә бькьн, кӧ пебьһʹәсьн ча кʹәрәма Хԝәде бьстиньн? Бәле, дькарьн. Ԝәрен бьньһерʹьн, һәла әм чь дькарьн жь се пʹехәмбәред амьн һин бьн.
БЬРАҺИМ
Хԝәде фьрԛийе накә ортʹа мьләта у дьхԝазә һʹәму мәрийа кʹәрәм кә.
Хԝәде соз да Бьраһим, ԝәки бь ԝи «дӧайе ль һʹәму бәрәкед дьнйайе бьбә» (Дәстпебун 12:3).
Әм чь һин дьбьн? Хԝәде мә гәләк һʹьз дькә у дьхԝазә ԝан һʹәму мәрьва кʹәрәм кә, йед кӧ гӧрʹа ԝи дькьн.
МУСА
Хԝәде рʹәʹм ә у кʹәрәм дькә ԝан мәрийа, кʹижан кӧ бь дьл дьхԝазьн ԝи нас бькьн.
Хԝәдайе Һьмзор ԛәԝат дабу Муса пʹехәмбәр, ԝәки бькарьбә кʹәрәмәтед мәзьн бькә. Муса дӧайе хԝәда готә Хԝәде: «Рʹийед хԝә ль бәр мьн вәкә ԝәки әз тә нас бькьм у ль бәр тә кʹәрәме бьбиньм» (Дәркʹәтьн 33:13). Хԝәстьна Муса Хԝәде хԝәш һат у әԝи Муса кʹәрәм кьр. Әԝи занәбун да Муса у али ԝи кьр, кӧ рʹейед ԝи у хәйсәт-һʹӧнӧред ԝи фәʹм бькә. Мәсәлә, Муса пеһʹәсийа ԝәки Әʹфьрандар «Хԝәдейе рʹәʹм» у дьлшәԝат ә (Дәркʹәтьн 34:6, 7).
Әм чь һин дьбьн? Һәрге әм ԛәԝате дьдьнә хәбате, кӧ һе рʹьнд Хԝәде нас бькьн, әԝ ԝе мә кʹәрәм бькә, чьмки әԝ һʹьзрәта ве йәке йә. Хԝәде бь Ньвисаред Пироз мәрʹа әʹйан дькә, ԝәки чаԝа әм дькарьн ԝи бьһʹәбиньн у чаԝа әԝ һʹьзрәта ԝе йәке йә, кӧ кʹәрәма ль сәр мәда бьбаринә.
ИСА
Иса бь дьлшәԝати һʹәму щурʹә нәхԝәши ԛәнщ дькьр
Һәрге әм дәрһәԛа Иса, кьред ԝи у һинкьрьнед ԝи пебьһʹәсьн, әме кʹәрәмед һәрһәйи жь Хԝәде бьстиньн.
Жь Хәбәра Хԝәде әм дькарьн дәрһәԛа жийин у һинкьрьнед Иса, гәләк тьшт һур бь һур пебьһʹәсьн. Хԝәде ԛәԝат да Иса, ԝәки әԝ гәләк кʹәрәмәта бькә, мәсәлә әԝи йед кор, кәрʹ у тʹопал ԛәнщ дькьр, һәла һе жи мьри сах дькьр. Иса бь ԝан кʹәрәмәта да кʹьфше, ԝәки Хԝәде ахьрийеда бона инсанәте ԝе чь бькә. Иса шьровәкьр, ԝәки чаԝа һәр кәс жь мә дькарә ԝан кʹәрәма бьстинә. Әԝи гот: «Әв ә жийина һʹәта-һʹәтайе, ԝәки әԝ тә нас кьн, чаԝа Хԝәдейе рʹасти бешьрики-беһәвал у ӧса жи Иса Мәсиһе кӧ тә шандийә» (Йуһʹәнна 17:3).
Иса дьлшәԝат, рʹәʹм у ԛәнщ бу. Мер, жьн, щаһьл у йед әʹмьрда мәзьн тʹәглифкьрьна ԝи ԛәбул дькьрьн, чахе әԝи дьгот: «Жь мьн һин бьн, чьмки әз шкәсти мә у дьлмьлаһим ьм у һуне хԝәрʹа рʹьһʹәтийе бьбиньн» (Мәтта 11:29). Рʹаст ә, бәре ԛәдьре жьна тʹӧнә бу, ле Иса һьндава ԝанда ԛәнщ у бь ԛәдьр бу.
Әм чь һин дьбьн? Иса һьндава мәрьвада һʹьзкьрьна мәзьн дьда кʹьфше у ӧса мәсәләкә баш мәрʹа һишт, кӧ әм һьндава һәвда гәрәке ча бьн.
ИСА ХԜӘДЕ НИНӘ
Жь Ньвисаред Пироз әм педьһʹәсьн, ԝәки «бона мә тʹәне Хԝәдек һәйә», у ԝәки Иса Мәсиһ бь мьлукти әʹламәтийа Хԝәде дәрбази мәрийа дькьр (1 Корьнтʹи 8:6). Иса зәлал дьда кʹьфше, ԝәки Хԝәде ԝи бьльндтьр ә у ԝәки Хԝәде әԝ шандә сәр әʹрде (Йуһʹәнна 11:41, 42; 14:28). *
^ абз. 17 Сәва кӧ һе зедә дәрһәԛа Иса Мәсиһ пебьһʹәсьн, бьньһерʹьн бәша (сәре) 8 у 9 жь брошура «Имана Рʹастәԛин Бәхтәԝар Дькә», кʹижан кӧ һун дькарьн бь онлайн сәр www.pr2711.com бьньһерʹьн.
