ЧАХЕ ТÖ РʹАСТИ ТӘНГАСИЙА ДЬҺАТИ, ДЬБӘКӘ ТÖ ЖИ ДЬФЬКЬРИЙИ: «ХWӘДЕ КʹÖ БУ?» ЙАН ЖИ ТÖ РʹАСТИ КÖЛ-ДӘРДӘКИ ÖСА ҺАТИ, ЖЬ БО ЧЬ ЖИ ТÖ ФЬКЬРИЙИ: «ГӘЛО ХWӘДЕ БОНА МЬН ХӘМ ДЬКӘ?»

Шейила йа кö Дәwләтед Йәкбуйида дьжи у малбәта кʹижани кö баwәрмәнд бун дьбежә: «Жь бьчʹуктайе, мьн Хwәде дьгәрʹийа, чьмки мьн заньбу, wәки әwи әм әʹфьрандьнә. Әз тʹö щар нәдьфькьрим кö мәрьв дькарә незики Хwәде бә. Һәмьки мьн заньбу кö Әw мә дьвинә, ле тʹәне дурва. Әз нә дьфькьрим кö Хwәде мьн нәфрʹәт дькә, нә жи баwәр дькьр кö Әw мьн һʹьз дькә». Гәло чьма Шейила һʹьзкьрьна Хwәдеда дькʹәтә шьке? Әw дьбежә: «Малбәта мьн рʹасти гәләк кöл-дәрда һат, ләма жи öса дьһатә кʹьфше кö Хwәде qә сәва мә хәм накә».

Дьбәкә тö мина Шейила баwәр дьки кö Хwәде һәйә, у бона тә хәм дькә. Мәрьвәки амьн Ибо жи, йе кö баwәр дькьр кö Хwәде Әʹфьрандаре qәwи у билан ә, дькʹәтә шьке (Ибо 2:3; 9:4). Гәләк кöл-дәрд рʹасти wи дьһатьн у әw тʹö дьлбини нәдьдит, ләма жи әwи жь Хwәде пьрси: «Чьма тö wәще [рʹуйе] хwә вәдьшери у мьн жь хwәрʹа нәйар дьһʹәсьбини?» (Ибо 13:24).

Гәло Кʹьтеба Пироз чь дьбежә? Һʹәму кöл-дәрдада Хwәде йә нәһәq? Гәло избатийа wе йәке һәйә, кö Хwәде бона инсанәте педа хәм дькә, у бона һәр кәси жь мә башqә жи? Һун дькарьн жь жийина хwә бежьн, кö Хwәде wә дьвинә, wә фәʹм дькә, бәр дьле wәда те у али wә дькә, кö һун проблемед хwә сафи кьн?

Готаред дьнда әме шеwьр кьн, кö чаwа жь әʹфьринед Хwәде те кʹьфше, wәки Әw бона мә хәм дькә (Рʹомайи 1:20). Паше әме бьньһʹерьн wәки Кʹьтеба Пироз чь дьбежә дәрһәqа Хwәде у инсанәте. Чьqас һе зедә бь сайа әʹфьрина у Хәбәра Хwәде әм wи нас бькьн, һаqас һе зедә әме избат бьн кö Әw бона мә «хәм дькә» (1 Йуһʹәнна 2:3; 1 Пәтрус 5:7).