Һьнә пʹешкʹеш сәва мә ԛимәт ьн, чьмки дьбә кӧ әԝ жь мәрьвәки навдар ә йан жь ԝи мәрьви йә, ԛәдьре кʹижани кӧ әм зәʹф дьгьрьн. Һәнә пʹешкешед ӧса жи, йед кӧ нә баһа нә ле тӧ ԝана хԝәй дьки чьмки нәфәре малбәта тә йан һәвале тәйи незик әв данә тә. Пʹешкʹеша Расел жи дәрһәԛа кʹижани кӧ дь готара пешьнда һатьбу готьне, сәва Йордан гәләк ԛимәт бу. Ле әм чь дькарьн бежьн дәрһәԛа кʹьрине, йе кӧ ԝәк пʹешкʹеш мәрʹа һатийә дайине?

Йа пешьн, Кʹьтеба Пироз дьбежә ԝәки Хԝәде «Кӧрʹе хԝәйи Тайе Тʹәне шандә дьнйайе, ԝәки әм бь ԝи бьжин» (1 Йуһʹәнна 4:9). Жь бо ве занәбуне, баһе ве пешкеше бәр чʹәʹве мә даһа мәзьн дьбә. Хенщи Хԝәде щәм тʹӧ кәси һʹӧкӧмдарийа пʹьрʹ мәзьн тʹӧнә. Дәрһәԛа ԝе йәке зәбурбеж ньвиси: «Наве тә, ЙАҺОԜА йә! У йе кӧ ль сәр тʹәваһийа Гәрдуне Һәри Бьльнд ә, тʹәне тӧ йи!» (Зәбур 83:18). Ле ԛә әм дькарьн жь кәсәки лапи бьльнд, пʹешкʹеше бьстиньн?

Йа дӧда, Хԝәде «Баве мә йә» (Ишайа 63:16). Чь щурʹәйи? Әԝи жийин дайә мә. Хенщи ԝе йәке әԝ мина бавәки дьлован, бь һʹьзкьрьн дәрһәԛа мә хәм дькә. Һьнә хьзмәткʹаред хԝәйи бәрерʹа мәсәлә Әфрайимрʹа Хԝәде гот: «Ма лаԝе мьни бьрумәт Әфрайим ә? Зарʹоке хошәԝист әԝ ә? . . . Дьле мьн жь бәр ве йәке берийа ԝи дькә; бь рʹасти, әзе дьлованийе ле бькьм!» (Йерәмйа 31:20). Иро жи Хԝәде дәрһәԛа хьзмәткʹаред хԝә ӧса дьфькьрә. Әԝ нә кӧ тʹәне Әʹфьрандаре мәйи һьмзор ә, ле ӧса жи Бав у Досте мәйи амьн ә. Ләма жи һʹәму пʹешкʹешед жь Хԝәде сәва мә гәләк ԛимәт ьн.

Һьнә пʹешкʹеш тәрʹа гәләк ԛимәт ьн, чьмки әԝ нә бь дәсте зоре данә тә, ле жь бо һʹьзкьрьне. Мәрьве кӧ бь дьл у щан пʹешкʹеше дьдә тә, һивийе нинә ԝәки тӧ жи гәрәке әʹсәйи сәва ԛәнщийа ԝи тьштәки бьди ԝи.

Хԝәде мә һʹьз дькә, ләма жи әԝи Кӧрʹе хԝә сәва һʹалхԝәшийа мә бәрва да. Кʹьтеба Пироз дьбежә: «Бь ве йәке һʹьзкьрьна Хԝәде һьндава мәда хӧйа бу, гава кӧ әԝи Кӧрʹе хԝәйи Тайе Тʹәне шандә дьнйайе». Ле чьма Хԝәде ӧса кьр? «Ԝәки әм бь ԝи бьжин» (1 Йуһʹәнна 4:9). Гәло дьбә кӧ Хԝәде борщдар бу ләма әв йәк кьр? На! Ԛӧрбанбуна Иса, дьһатә һʹәсабе ԛәнщийа Йаһоԝа һьндава мәда (Рʹомайи 3:24).

Чьма әм дькарьн бежьн ԝәки пʹешкʹеша жь Хԝәде ԛәнщийа ԝи әʹйан дькә? Кʹьтеба Пироз дьбежә: «Хԝәде һʹьзкьрьна хԝә һьндава мәда һьнге да кʹьфше, гава әм һе гӧнәкʹар бун, Мәсиһ бона мә мьр» (Рʹомайи 5:8). Һʹьзкьрьна дьловани Хԝәде һелан кьр, ԝәки бона һʹалхԝәшийа мә әве пʹешкʹеше бьдә, демәк сәва мәрьвед гӧнәкʹар, йед сьст у чәрчьранди. Бь рʹасти жи әм нәһежайи һʹьзкьрьна ӧса бун, у әме нә жи тʹӧ щар бькарьбьн бь тʹәмами һәԛе пʹешкʹеша ԝи бьдьн. Нава тʹәрихийеда тʹәне пʹешкʹеша Хԝәде бь рʹасти жи әʹйан дькә һʹьзкьрьна ԝийә пʹьрʹ мәзьн.

Чахе кәсәк тьштәки жь хԝә кем дькә сәва кӧ пʹешкʹеше бьдә тә, әв пʹешкʹеш тәрʹа гәләк ԛимәт дьбә. Чахе щәм мәрьв тьштәки ԛимәт һәйә у әԝ һазьр ә әве йәке тʹәви мә пʹарә вәкә у бьдә, һьнге әм әве пʹешкʹеше пʹьрʹ ԛимәт дькьн, чьмки әв мәрьв тьштәки жь хԝә кем кьр.

Хԝәде «кӧрʹе хԝәйи тайе тʹәне бәрва да» (Йуһʹәнна 3:16). Әԝи дькарьбу әв пʹешкʹеша хԝәйә лапә ԛимәт нә жи бьда. Иса, Кӧрʹе Хԝәдейи «һʹьзкьри йә» у әԝ һәйә «сурәте Хԝәдейе кӧ хӧйа набә». Кʹьтеба Пироз дьбежә кӧ Хԝәде пешийа һʹәму тьшти Иса әʹфьрандийә. Ләма жи әм дькарьн бежьн кӧ Хԝәде у Иса һәврʹа гәләк незик бун (Колоси 1:13-15).

Кʹьтеба Пироз дәрһәԛа Хԝәде дьбежә кӧ «һʹәйфа ԝи Кӧрʹе ԝи нәһат» (Рʹомайи 8:32). Йаһоԝа кәсе хԝәйи лапи дәлал да мә. Тʹӧ пʹешкʹеш нькарә бәрамбәри ԝе йәке бә, чьмки әв пʹешкʹешәкә лапә ԛимәт ә.

Һьнә пʹешкʹеш гәләк ԛимәт ьн, чьмки әԝана ԝәʹдәда мәрʹа һатьнә дайине у гәләк мәрʹа лазьм бун. Бьдә бәр чʹәʹве хԝә кӧ тӧ нәхԝәш и у пʹәрʹе тә тʹӧнә сәва дәрмана бькʹьри у ԛәнщ би. Ле кәсәк һазьр ә бь рʹәзәдьли дәԝса тә пʹәра бьдә сәва кӧ тӧ хьлаз би. Бь рʹасти жи тӧйе чьԛас шькьрдар би ԝи мәрьвирʹа, ӧса нинә! У әв пʹешкʹеш сәва тә ԝе пʹьрʹ ԛимәт бә.

«Һʹәмуйед жь Адәм буйи дьмьрьн, ӧса жи һʹәмуйед жь Мәсиһ буйи ԝе сах бьн» (1 Корьнтʹи 15:22). Әм зӧрʹәтед Адәм ьн, ләма әм һʹәмушк жи «дьмьрьн» у нькарьн хԝәхә жь нәхԝәшийе у мьрьне аза бьн. Әм ӧса жи нькарьн хԝәха тʹәв Хԝәде ль һәв бен у жь сущдаркьрьне аза бьн. Жь ԛәԝата мә дәр ә сәва кӧ хԝә, йан йед дьнена «сах кьн». Кʹьтеба Пироз дьбежә: «Тʹӧ кәсәк бь тʹӧ аԝайи нькарә бьрайе хԝә рьзгар бькә [хьлаз кә] у бәрдела ԝи бьдә Хԝәда. Жь бәр кӧ бәрдела щане ԝан, пʹьрʹ гьранбьһа йе у дьве, әԝ һәрһәйи дәв жь ԝе бәрдә» (Зәбур 49:7, 8). Әм һʹәԝще аликʹарийе нә, чьмки әм нькарьн бьдьн баһе кʹьрʹине демәк баһе бәрделе. Һәрге аликʹарийа мә тʹӧнә буйа, һʹале мә жи ԝе хьраб буйа.

Жь бо һʹьзкьрьна хԝәйә мәзьн, Йаһоԝа бь һазьрбун һәԛ демәк баһе «дәрмане» мә да, сәва кӧ  жийина мә хьлаз кә. Демәк әԝ һәбу Иса жь кʹижани кӧ гьшк ԝе сах бьн. Чь щурʹәйи кʹьрин дькарьбу бьбуйа бәрдел? «Хуна Исайе Кӧрʹе ԝи ԝе мә жь һʹәму гӧна паԛьж кә». Әре, һәрге әм баԝәрийа хԝә ԛӧрбанбуна Иса тиньн, бь ве йәке әм мәщале дьстиньн кӧ жь гӧна паԛьж бьн у жийина һәрһәйи бьстиньн (1 Йуһʹәнна 1:7; 5:13). Ле гәло бь ве кʹьрине чь мәщал чедьбә сәва мәрьвед мәйә һʹьзкьри йед кӧ мьрьн ә? «Мьрьн рʹуйе мәрьвәкида бу, бь мәрьвәки [Иса] жи ԝе рʹабуна мьрийа бьбә» (1 Корьнтʹи 15:21). *

Ԛӧрбанбуна Иса пʹешкʹешәкә пʹьрʹ ԛимәт ә у тʹӧ пʹешкʹеш нькарә бәрамбәри ве бә. Тʹӧ мәрьвәки һаԛас тьшт нәдайә мә, чьԛас кӧ Йаһоԝа Хԝәде дайә мә. У әм ӧса гәләк һʹәԝще тʹӧ пʹешкʹешәкә дьн ниньн, чаԝа ԛӧрбанбуна Иса, чь кӧ мә жь гӧнә у мьрьне аза дькә. Бь рʹасти жи әв гәләк пʹешкʹешәкә ԛимәт ә.