Чахе тӧ дьхԝази кәсәки нас ки, һәмьки пешийе тӧйе пьрс ки: «Наве тә чь йә?» Ле һәрге тӧ әве пьрсе бьди Хԝәде, һьнге әԝе ча щаба тә бьдә?

«Әз Йаһоԝа мә. Наве мьн әԝ ә» (Ишайа 42:8, ДТʹ).

Бона Хԝәде әв нав фәрз ә. Әв нав, Хԝәде хԝәха бона хԝә бьжартийә. Йаһоԝа дьбежә: «Һ′әта-һ′әтайе наве мьн әв ә у һ′әму ньсьлада әзе аһа бемә биранине» (Дәркʹәтьн 3:15). Дь Кʹьтеба Пирозда әв наве Хԝәде жь һʹәму сәрнавед ԝи, мәсәлә Һьмзор, Бав, Хӧдан йан Хԝәде һе зедә щар те хәбьтандьне у ӧса жи жь навед мәрьва, мәсәлә Бьраһим, Муса, Даԝьд, у Иса зедәтьр ә. Һе фәрз әԝ ә, ԝәки Йаһоԝа хԝәха дьхԝазә ԝәки наве ԝи бе әʹйанкьрьне. Кʹьтеба Пироз дьбежә: «Бьра мәрьв бьзаньбьн кӧ наве тә Йаһоԝа йә, у ль сәр тʹәмамийа әʹрде йе Һери Жорьн тʹәне тӧ йи» (Зәбур 83:18, ДТʹ).

Бона Иса әв нав фәрз ә. Иса пәйчуйед хԝә һин дькьр, ԝәки әԝана дӧайед хԝәда ӧса бежьнә Хԝәде: «Наве тә пироз бә» (Мәтта 6:9). Иса хԝәха жи Хԝәдерʹа ӧса дӧа дькьр: «Баво, наве хԝә бьльнд кә» (Йуһʹәнна 12:28). Жийина Исада һәри фәрз әԝ бу, кӧ наве Хԝәде рʹумәт кә, ләма жи әԝи дӧайед хԝәда гот: «Мьн тӧ ԝанва дайи ә′йанкьрьне у әзе һе бьдьмә ә′йанкьрьне» (Йуһʹәнна 17:26).

Бона мә әв нав фәрз ә. Щьмәʹта Хԝәдейә бәре, фәʹм дькьр кӧ хьлазкьрьна ԝан наве Хԝәдейи мәхсусва гьредайи йә. «Наве Йаһоԝа бьрща ԛәԝи йә, йед һәԛ дьрʹәԝьнә һьндӧрʹ у хьлазбуне дьстиньн» (Мәтʹәлок 18:10, ДТʹ). «Һәр кʹи банги наве ХӦДАН [Йаһоԝа, ДТʹ] бькә ԝе хәлас бьбә»  (Йоԝел 2:32). Кʹьтеба Пироз нишан дькә, кӧ хьзмәткʹаред Хԝәде ԝе бь ви нави щӧдә бьн. «Жь бәр кӧ һʹәмуйа нәтәԝәйан, һәр йәк бь наве илаһе хԝә дьмәшә, әм жи һәр тʹьм у һʹәта бедаԝибуне, бь наве Хԝәдайе хԝә [Йаһоԝа, ДТʹ] Хӧданва дьмәшьн!» (Миха 4:5; Кʹаред Шандийа 15:14).

Әв нав әʹйан дькә Хԝәде. Гәләк зандар дьбежьн, ԝәки наве Йаһоԝа те һʹәсабе «Әԝ Дькә ԝәки Бьбә». Чахе Йаһоԝа Хԝәде тʹәви Муса хәбәр да, әԝи мәʹна наве хԝә ԝирʹа вәкьр: «Әзе Бьбьмә Әԝ, Кʹе жи Бьхԝазьм Бьбьм» (Дәркʹәтьн 3:14, ДТʹ). Наве Хԝәде те һʹәсабе һе зедә, нә кӧ тʹәне рола ԝи кӧ Әԝ Әʹфьрандаре һәр тьшти йә. Әԝ те һʹәсабе, ԝәки Хԝәде дькарә бьбә әԝ кʹе жи бьхԝазә. Хенщи ԝе йәке, наве ԝи диса жи те һʹәсабе, ԝәки әԝ дькарә ӧса бькә, ԝәки әʹфринед ԝи бьбьн әԝ кʹе жи Әԝ хԝәха бьхԝазә, сәва ԛьрарʹа хԝә бинә сери. Сәрнавед Хԝәде әʹйан дькьн һьмзорийа ԝи, һʹӧкӧмти у ԛәԝата ԝи, ле наве ԝи Йаһоԝа, әʹйан дькә һʹәму тьшти дәрһәԛа ԝи, йане әԝ йәки чаԝа нә у ԛәԝата ԝи дьгьһижә чь.

Наве ԝи нишан дькә, ԝәки әԝ бона мә хәм дькә. Мәʹна наве Хԝәде зәлал дькә, ԝәки әԝ һьндава һʹәму әʹфьринед хԝә, һәла һе һьндава мәда жи, амьн ә. Әв йәк кӧ Хԝәде наве хԝә мәрʹа әʹйан кьр, дьдә кʹьфше ԝәки әԝ дьхԝазә әм ԝи нас кьн. Йаһоԝа гава пешьн авит, кӧ наве хԝә мәрʹа әʹйан кә. Зәлал ә, Хԝәде дьхԝазә ԝәки ԝи һʹәсаб кьн нә ча хӧдане кӧ хԝә жь мә дур дьгьрә, ле ча кәсе реали, тʹәви кʹижани әм дькарьн незик бьн (Зәбур 73:28).

Хәбьтандьна наве Хԝәде нишан дькә, кӧ әм дьхԝазьн ԝи һе рʹьнд нас кьн. Мәсәлә бьдә һʹәсабе хԝә, кӧ һәвале тә ԝәʹде хәбәрдане нахԝазә наве тә һьлдә. Тәйе чь тʹәхмьн кьра? Дьбәкә тӧ бьфькьрийайи ԝәки әԝ мәрьв бь рʹасти нахԝазә незики тә бә. Әве йәке әм дькарьн дәрһәԛа Хԝәде жи бежьн. Йаһоԝа наве хԝә инсанәтерʹа әʹйан кьр, у әԝ мә һелан дькә әви нави бьдьнә хәбате. Чахе әм әви нави дьдьнә хәбате, ӧса әм Йаһоԝарʹа нишан дькьн кӧ дьхԝазьн незики ԝи бьн. Ләма жи әԝ дина хԝә дьдә ԝан, йед кӧ бона «наве ԝи дьфькьрьн» (Малахи 3:16).

Гава пешьнә сәрәкә кӧ Хԝәде нас бькьн әԝ ә, ԝәки наве ԝи пебьһʹәсьн. Ле әм гәрәке бәрдәԝам кьн ԝи нас кьн у пебьһʹәсьн, һәла пьш ви нави Кʹе сәкьнийә у бь рʹасти Әԝ йәки чаԝа нә.