ДАԜЬД фәʹм накә, чьма әскәр ләзә-ләз вьрда-ԝеда дьчьн тен. Тьрсәкә мәзьн ԝана гьртьбу, гава әԝана жь мәйдана шәрʹ дьрʹәвийан. Гәло әԝана жь чь ӧса тьрсийан? Даԝьд дьбәкә дьбьһист кӧ чаԝа әԝана бь ләрьзандьне гьлик дьготьн. Әв наве мерькәки бу. Әв мерьк ль дәште сәкьни бу, у дьһатә кʹьфше кӧ әԝ жь һʹәму мәрьвед дьн бьльндтьр ә. Даԝьд әʹмьре хԝәда мәрьве ӧса бьльнд нәдитьбу.

Наве ԝи Голйатʹ бу! Ньһа ида Даԝьд фәʹм кьр, кӧ чьма тьрсәкә ӧса кʹәтьбу сәр әскәра. Нә әв мәрьв беһʹәсаб бьльнд бу. Һәла һе бей кʹьнщхԝәкьрьна ԝийә әскәрийе жи, гьранийа ԝи дьбәкә жь дӧ мәрьвед ԛальм, зедәтьр буйа. Голйатʹ гәләк чʹәкед әскәрийе тʹәв хԝә һьлда. Әԝ, әскәрәки гәләк ԛәԝи у щерʹьбанди бу. Голйатʹ гази әскәред Исраели дькьр, кӧ кәсәк жь ԝана бе тʹәви ԝи шәрʹ кә. Дә бьдә бәр чʹәʹве хԝә, ча әԝ бь дәнге хԝәйи бьльнд ԛәрфа әскәред Исраели у пʹадше ԝан Шаԝул дькә! (1 Самуйел 17:4-10).

Зьраве Исраелийа у Шаԝул пʹадша, ԛәтийа. Чаԝа кӧ Даԝьд пеһʹәсийа, әԝ дәрәщә ида мәһәк зедәтьр дькʹьшанд! Һьм ордийа Фьльстийа у һьм жи ордийа Исраелийа нькарьбун әве дәрәще сафи кьн. Чьмки Голйатʹ, рʹож бь рʹож дәрдькʹәт ԛәрфе Исраелийа дькьр у гази дькьр сәр шәрʹ. Даԝьд бәрхԝә кʹәт. Чьԛас шәрм ә, кӧ тьрсәкә ӧса мәзьн кʹәтьбу сәр пʹадше Исраеле, әскәред ԝи, ӧса жи се бьред Даԝьди мәзьн! Бәр чʹәʹве Даԝьд, әԝ Голйатʹ нә кӧ тʹәне Исраелийа беһӧрмәт дькьр; әԝи Хԝәдайе ԝан демәк Йаһоԝа, беһӧрмәт дькьр! Гәло Даԝьд чь дькарьбу бькьра, нә әв һәла һе щаһьл бу? Ле рʹасти баԝәрийа ԝи һәбу у жь ԝе йәке әм иро дькарьн гәләк тьшт һин бьн (1 Самуйел 17:11-14).

Ԝәрен әм ньһа дәрбази сәр ԝе дәрәще бьн, йе кӧ жь дәрәще жоре готи чәнд мәһ пешда ԛәԝьми. Тәʹри дькʹәтә әʹрде у Даԝьд незики тʹәпе Бәйтʹләһме, бәр пәзед баве хԝә бу. Әԝ хортәки бәрбьчʹәʹв бу, у һәла һе 20 сали жи нибу. Әԝ йәки сурәтсор у чʹәʹвбәдәԝ бу. Чахе ԝәʹде ԝи һәбу, әԝи чәнге дьхьст. Әԝ һелан дьбу дәрһәԛа әʹфьринед Хԝәде бьстьре. Әԝи гәләк ԝәʹдә чәнге дьхьст у чьԛас дьчу, әԝ дьбу чәнгване щерʹьбанди. Ле ԝе еваре, чахе тәʹри кʹәтә әʹрде, баве ԝи гази ԝи кьр щәм хԝә (1 Самуйел 16:12).

Чахе әԝ һат щәм Баве хԝә, демәк Йеша, әԝи дит кӧ баве ԝи тʹәви каләмерәки хәбәр дьдә. Әԝ каләмер Самуйел бу, пʹехәмбәрәки амьн. Йаһоԝа әԝ шанд мала Йеша, сәва кӧ әԝ кӧрʹәки ԝи рʹун кә, сәва кӧ паше әԝ бьбә пʹадше Исраеле! Самуйел ида һʹәфт кӧрʹед Йешайи мәзьн дитьн. Ле Йаһоԝа Самуйелрʹа әʹйан кьр, ԝәки Әԝи тʹӧ кʹәс жь ԝана нәжьбарт. Чахе Даԝьд һат, Йаһоԝа готә Самуйел: «Ԝи рʹун кә, чьмки әԝе бьбә пʹадша!» Бәр чʹәʹве һʹәму бьред Даԝьд, Самуйел борийа бьчʹук дәрхьст, йа кӧ бь рʹуне мәхсус тʹьжә бу, у һьнәк бәри сәр сәре ԝи да. Паши ԝе рʹункьрьне жийина Даԝьд ида нә мина бәре бу. Кʹьтеба Пироз дьбежә: «Һьнгеда рʹӧһʹе Йаһоԝа тʹәви Даԝьд бу» (1 Самуйел 16:1, 5-13).

Ле дьбә кӧ ньһа Даԝьд бьхԝазә тьштәки бькә, сәва әве пʹадшатийе зу һьлдә дәсте хԝә? На. Әԝ  һазьр бу һивийе бә, һʹәта кӧ рʹуһʹе Йаһоԝа рʹебәрийа ԝи бькә у ԝирʹа әʹйан кә, ԝәки чь чах әԝ гәрәке әве щабдарийе һьлдә сәр хԝә. Ләма жи әԝи хԝәрʹа бәрдәԝам дькьр бь мьлуктийе шьхӧле шьвантийе бькә. Әԝи педа хԝә тʹәсмили ви шьхӧли дькьр у бь мерхасийе дьԛәданд. Мәсәлә дӧ щара әԝи пәзед баве хԝә жь шерʹ у һʹьрч хьлаз кьр. Даԝьд нә кӧ бәри ван тәрәвьла дьда кӧ незики пез нәбьн. Ле ван дәрәщәда әԝи хԝәха тʹәви ԝан шәрʹ кьр у кӧшт, сәва пәзед баве хԝә хьлаз кә! (1 Самуйел 17:34-36; Ишайа 31:4).

Һьнә ԝʹәдә шунда мәрьвәки гази Даԝьд кьр. Әԝ Шаԝул Пʹадша бу. Хәбәрдана дәрһәԛа Даԝьд, ида гьһиштьбу һʹәта Шаԝул жи. Рʹаст ә Шаԝул әскәре ԛәԝи бу, ле әԝи ԛәбулкьрьна Йаһоԝа ӧнда кьрьбу, чьмки гӧһ нәдьда рʹебәрийа Хԝәде. Йаһоԝа рʹӧһʹе хԝә жь Шаԝул һьлдабу, ләма Шаԝул щарна тʹәвиһәв дьбу, һьм бь һерсе у зӧлмийе тʹьжә дьбу. Чахе Шаԝул һерс дькʹәт, тʹәне тьштәки дькарьбу әԝ һеса кьра. Әв мьԛам бу. Һьнә бәрдәстийед Шаԝул пеһʹәсийан, кӧ Даԝьд чәнгванәки баш бу у хортәки мерхас. Ләма жи Даԝьд һатә тʹәглифкьрьне ль ԛәсьра Шаԝул, у ԝе дәре ма, ча чәнгванәки баш у чʹәкдаре Шаԝул (1 Самуйел 15:26-29; 16:14-23).

Щаһьл дькарьн гәләк тьшт һин бьн жь баԝәрийа Даԝьд. Дина хԝә бьдьн кӧ чахе ԝәʹде ԝи һәбу, әԝ незики Йаһоԝа дьбу. Хенщи ԝе йәке, әԝ бь сәбьр фәрәсәтед ӧса нав хԝәда пешда дьани, чь кӧ керһати бун у бь сайа ԝан, әԝ хәбатһʹьз дьбу. Һәйнәсәр, әԝи дьһишт кӧ рʹӧһʹе Йаһоԝа рʹебәрийа ԝи бькә. Бь рʹасти жи сәва мә гьшка, әԝ мәсәләкә баш ә! (Ԝаиз 12:1).

Чахе Даԝьд ль ԛәсьра Шаԝулда хьзмәт дькьр, әԝ ӧса жи гәләк щара вәдьгәрʹийа мал, сәва шьвантийе бькә. У һьнә щара әԝ ԝе дәре гәләк ԝʹәдә дьма. Әв ԝи чахи бу, гава Йеша, Даԝьд шанд ԝәки әԝ сәрики бьред хԝәйи мәзьн хә, йед кӧ дь ордийа Шаԝулда хьзмәт дькьрьн. Даԝьд гӧрʹа баве хԝә кьр у бьред хԝәрʹа хԝарьн бьр. Әԝана ль тʹәпе Дәшта Әлайеда щиԝар бьбун. Чахе Даԝьд гьһиштә ви щийи, әԝ гәләк әʹщебмайи ма гава дит кӧ дӧ орди сәкьнинә у нькарьн шәрʹ сафи кьн, чаԝа кӧ жоре һатьбу готьне. Ордик ль алики тʹәпә сәкьнибу, ордийа дьн жи алийе дьн һьмбәри ԝан. У навбәра ԝан жи дәшт бу (1 Самуйел 17:1-3, 15-19).

Даԝьд жь ве дәрәще нәтьрсийа. Әԝи фʹәм нәдькьр кӧ чьма ордийа Исраелийа гәрәке жь ԝи мәрьви бьтьрсьн у бьрәвьн, нә тʹәви ԝан Хԝәдайе сах бу? Хенщи ԝе йәке әв Голйатʹ, Йаһоԝа беһʹӧрмәт дькьр. Ләма жи Даԝьд незики әскәра бу у ԝанарʹа гот кӧ дьхԝазә хԝәха тʹәви Голйатʹ шәрʹ кә. Һьнге бьре Даԝьди мәзьн, Әлйаб, гьлийе Даԝьд бьһист. Һерса ԝи рʹабу сәр Даԝьд у әԝи Даԝьдрʹа да кʹьфше, ԝәки әԝ ише ԝи нинә. Ле Даԝьд щаба ԝи да: «Мьн чь хьраб гот? Мьн тʹәне пьрс кьр!» Һьнге Даԝьд йәки дьнрʹа жи гот, кӧ дьхԝазә тʹәви Голйатʹ шәрʹ кә. Гьлийед Даԝьд гьһиштьнә һʹәта Шаԝул. Ләма жи әԝи фәрман да, кӧ Даԝьд биньн щәм (1 Самуйәл 17:23-31).

Даԝьд дәрһәԛа Голйатʹ, гьлийед ӧса готә пʹадше: «Бьра дьле тʹӧ кәси бәр ԝи мәрьви нәләрьзә». Бь рʹасти жи дьле Шаԝул у әскәред ԝи бәр Голйатʹ ләрьзин. Ԝана шаши бәрда кӧ  хԝә бәрамбәри ви мәрьви кьрьн, у дьтьрсийан чахе дьфькьрин кӧ әԝана ԛә ниве бәжна ԝи жи ниньн. Ԝана ида дьда бәр чʹәʹве хԝә кӧ Голйатʹе тәрьки, ԝе һеса ԝана алт кә. Ле Даԝьд ӧса нәдьфькьри. Әԝи ль сәр ве дәрәще бь щурʹәки майин дьньһерʹи. Ләма жи әв һазьр бу хԝәха тʹәви Голйатʹ шәрʹ кә (1 Самуйел 17:32).

Шаԝул тʹәви ԝи ԛайил нәбу: «Тӧ нькари һьмбәри ԝи Фьлисти дәркʹәви у тʹәви ԝи шәрʹ ки. Нә тӧ һе гәләк щаһьл и. Ле әԝ щаһьлтийа хԝәда әскәр ә». Гәло бь рʹасти Даԝьд һаԛас щаһьл бу? На. Шаԝул дьхԝәст бьгота кӧ Даԝьд һә гәләк щаһьл бу, сәва кӧ дәркʹәвә шәрʹ. Әԝи тʹьре хуна Даԝьд дькʹәлә, у әԝ щаһьл ә, ләма сәр ве дәрәще ӧса дьньһерʹә. Ле Даԝьд ԝәкә 20 сали бу, у ида әʹйан бу ча гӧлашгьрәки мерхас (1 Самуйел 16:18; 17:33).

Даԝьд, Шаԝул да баԝәркьрьне у кьрә бира ԝи, кӧ чаԝа әԝи тʹәви шерʹ у һʹьрч шәрʹ кьрьбу. Дьбә кӧ Даԝьд бь ве йәке хԝә ԛӧрә дькьр? На. Даԝьд заньбу кӧ бь сайа кʹе әԝи карьбу ԝан тәрәвьла бькӧжә. Әԝи гот: «Йаһоԝа кӧ мьн жь дәсте шерʹ у һьрчʹе хьлаз кьрийә, ԝе жь дәсте ви Фьлисти жи мьн хьлаз бькә». Ахьрийеда Шаԝул ԛайил бу у гот: «Һәрʹә у бьла Йаһоԝа тʹәви тʹә бә» (1 Самуйел 17:37).

Дьбәкә һун жи дьхԝазьн кӧ баԝәрийа ԝә мина йа Даԝьд ӧса ԛәԝи бә. Һәла бьфькьрьн, чьрʹа Даԝьд ӧса баԝәр бу? Занәбуна дәрһәԛа Хԝәде у әԝ тьштед кӧ тʹәви ԝи ԛәԝьмин, баԝәрийа ԝи һьндава Хԝәде ԛәԝи кьрьн. Әԝи рʹьнд Йаһоԝа нас кьр, мәсәлә кӧ әԝ Хԝәйе созед хԝә йә у кӧ хьзмәткʹаред хԝә дьпʹарезә. Ләма жи сәва кӧ баԝәрийа мә жи ӧса ԛәԝи бә, әм гәрәке бәрдәԝам кьн бь сайа Ньвисаред Пироз, Хԝәде рʹьнд нас кьн. У чахе әм бьжин ль гора ԝе йәке чь кӧ педьһʹәсьн, әме бьвиньн кӧ баԝәрийа мә жи ԛәԝи дьбә (Ибрани 11:1).

Пешийе, Шаԝул кʹьнщед хԝәйә әскәрийе ль Даԝьд кьр. Әԝ кʹьнщ мина кʹьнщед Голйатʹ бун, йед кӧ жь тʹунщ чекьри бун у ӧса жи дьбәкә зьрхәк жи дайе. Даԝьд дәстпекьр бь ван кʹьнща һьнәки рʹе һәрʹә, ле сәва ԝи әв ча барәки гьран бун, у ԝирʹа чәтьн бу. Нә әԝ әскәр нибу у һини кʹьнщед ӧса нәһатьбу. Һьм жи Шаԝул нав щьмәʹта Исраелда, мерәки жь һʹәмушка бьльндтьр бу у ләма кʹьнщед ԝи Даԝьдрʹа мәзьн бун (1 Самуйел 9:2). Даԝьд әв кʹьнщ жь хԝә ехьстьн, кʹьнщед хԝә ль хԝә кьр, у тьштед шьвантийе һьлда (1 Самуйел 17:38-40).

Даԝьд шьва хԝәйә шьвантийе һьлда, чәнтʹе хԝәйи бьчʹук у шьдан (кәвьркан). Ӧса дьһатә кʹьфше кӧ тʹәне кәвьркан бәс нинә, ле бь рʹасти әԝ һащәтәкә ԛәԝи бу. Әв кәвьркан бь щурʹе тʹорбә бьчʹук бу, йа кӧ дӧ алийава бь дӧ тʹогед чʹәрми дьшьдандьн. Әв һащәтәкә ԛәԝи бу сәва шьван. Әԝи гәрәке кәвьр бькьра ви тʹорбәйи, ль сәр сәре хԝәрʹа ԛайим бьзьвьранда, паше әԝи гәрәке тʹогәк бәрда у кәвьр бавита. Әв һащәт гәләк керһати бу. Щарна нав ордийед әскәра жи һәбун мәрьвед ӧса, кӧ бь кәвьра шәрʹ дькьрьн.

Даԝьд ида һазьр бу рʹасти дьжмьне хԝә бе. Әм дькарьн бьдьнә бәр чʹәʹве хԝә, кӧ чаԝа Даԝьд незики чʹәме зьһа дьбә дәштеда, пенщ кәвьред пән һьлдьдә у Йаһоԝарʹа бь дьл у щан дӧа дькә. Паше әв ләзә-ләз дьчә ль мәйдана шерʹ!

Лә гәло Голйатʹ чь фькьри, гава дит кӧ Даԝьде щаһьл те пешийа ԝи? «Әԝи әԝ бәр тʹӧ тьшти һʹәсаб нәкьр». Голйатʹ гот: «Чьра әз кучʹьк ьм ԝәки тӧ пе шьве тей сәр мьн?» Голйатʹ дәсте Даԝьдда шьв дит, ле дьбә кӧ әԝи дина хԝә нәда кәвьркана ԝи. Әԝи бь наве хԝәданед хԝәйә Фьльсти, ньфьра Даԝьд кьр, у сонд хԝәр кӧ ԝе щьнийазе ԝи бькә пʹара тәйрәдә у тәрәвьла (1 Самуйел 17:41-44).

Бьдә һʹәсабе хԝә кӧ чаԝа хорте щаһьл бь дәнге бьльнд Голйатʹрʹа дьбежә: «Тӧ пе шур, рʹьм у тире хԝә тей сәр мьн, ле әз бь наве Йаһоԝа Хӧдане ордийа, Хӧдане резед әскәред Исраеле, кʹижана кӧ тә бәһӧрмәт дькьр, тем сәр тә». Һʹәта рʹожа иройин, әв щаба Даԝьд әʹйан дькә, кӧ баԝәрийа ԝийә мәзьн һәбу. Чьмки сәва ԝи ԛәԝат у чʹәкед мәрийа, һьмбәри Хԝәде тʹӧ тьшт нибун. Голйатʹ, беһӧрмәт дькьр Йаһоԝа, у Йаһоԝа ԝе щаба ԝи бьда. Чаԝа кӧ Даԝьд гот, «әв шәрʹа Йаһоԝа йә» (1 Самуйел 17:45-47).

 Даԝьд кор нибу у дьдит кӧ Голйатʹ у чʹәкед ԝи пʹьрʹ мәзьн ьн. Ле әԝи нәһишт кӧ әв тьшт ԝи бьтьрсиньн у әԝ бьләрьзә. Әԝи мина Шаԝул у әскәред ԝи, шашийа ӧса бәрнәда, демәк нәтьрсийа. Даԝьд хԝә бәрамбәри Голйатʹ нәкьр. Дәԝсе әԝи ль сәр Голйатʹ бь чʹәʹве Йаһоԝа дьньһерʹи. Рʹаст ә бьльндайа Голйатʹ 2.9 метр бу, у әԝ жь һʹәму мәрьвед дьн зәʹф бьльндтьр бу, ле һьмбәри Хԝәдейе Һьмзор бьльндайа ԝи, тʹӧ тьшт нибу. Бәле, һьмбәри Хԝәде, Голйатʹ мина кʹезькәке бу, у Йаһоԝа ԝе әԝ кʹӧта кьра.

Даԝьд бь ләзә-ләз бәрбь дьжмьне хԝә дьчә, у жь чәнте хԝә кәвьр дәрдьхә. Әԝи кәвьркана хԝә һазьр дькә, у ль сәр сәре хԝәрʹа ԛайим дьзьвьринә. Ԝи чахи Голйатʹ жи тʹәви чʹәкдаре хԝә, пешда те. Жь бо бьльндайа Голйатʹ, чʹәкдаре ԝийи ньмьз, нькарьбу мәртʹал епʹещә бьльнд кьра, сәва кӧ Голйатʹ бькарьбә сәре хԝә бьпʹарезә. Нә һʹәма нета Даԝьд жи әԝ бу (1 Самуйел 17:41).

Дә ижар Даԝьд кәвьр авит. Бьдьнә бәр чʹәʹве хԝә кӧ чаԝа дәнге гьшка сәԛьри, чахе кәвьр дьфьрийа. Бе шьк Йаһоԝа ӧса кьр, кӧ Даԝьдрʹа кәвьре дьн ида лазьм нәһатьн. Кәвьр рʹастә-рʹаст әʹнийа Голйатʹ кʹәт. Һьнге Голйатʹе тәрьки дәвәрʹу кʹәтә сәр әʹрде! Дьбә кӧ зьраве чʹәʹкдаре ԝи ԛәтийа. Даԝьд незики Голйатʹ бу, шуре ԝи һьлда у сәре ԝи жекьр (1 Самуйел 17:48-51).

Ахьрийеда, Шаԝул әскәред хԝәва, бь мерхасийе тʹьжә бун. Бь ԛужинийа бьльнд, әԝана рʹәвинә сәр Фьльстийана. Шәрʹ һәма ӧса хьлаз бу, чаԝа кӧ Даԝьд готьбу Голйатʹ: «Йаһоԝа ԝә гьшка, ԝе бькә дәсте мә» (1 Самуйел 17:47, 52, 53).

Рʹожа иройин хьзмәткʹаред Хԝәде накʹәвьнә шәрʹед ӧса. Чьмки әԝ ԝәʹдә ида дәрбаз буйә (Мәтта 26:52). Ле йәкә әм гәрәке чʹәʹв бьдьнә баԝәрийа Даԝьд. Анәгори Даԝьд, Йаһоԝа сәва мә жи гәрәке зенди бә. Демәк әм гәрәке тʹәне ԝи бьһʹәбиньн у жь ԝи бьтьрсьн. Щарна чәтьнайед мә, сәва мә дькарьн зәʹф мәзьн бенә кʹьфше, ле һьмбәри ԛәԝата Йаһоԝа әв гәләк бьчʹук ьн. Һәрге әм Йаһоԝа дьжберьн ԝәк Хԝәдайе хԝә, у баԝәрийа хԝә ԝи тиньн мина Даԝьд, һьнге тʹӧ чәтьнайи у щерʹьбандьн ԝе мә нәтьрсиньн. Чьмки ԛәԝата Йаһоԝа дьгьһижә һʹәму тьшти!