Әԝ гьлийе жоре готи, кәчʹька 13 сали готьбу, кʹижанерʹа кʹучʹьк пʹешкʹеш кьрьбун. Кʹӧлфәтәкә пешдачуйи гот, кӧ чахе әԝе мәкʹтәба бьльнд хьлас кьрьбу, баве ԝе компотәр ԝераʹ кʹьрибу. Ль гора гьлийе ԝе, әве пʹешкʹеше жийина ԝе гӧһаст. Мерәк жи дьбежә, кӧ чахе сәр сала зәԝаща ԝан, жьна ԝи пʹешкʹешәкә бьчʹук да ԝи, кʹижан кӧ бь дәсте хԝә чекьрьбу, әв пʹешкʹеш бона ԝи гәләк ԛимәт бу.

Бәле, һәр сал гәләк мәрьв ԝәʹдә у ԛәԝате хәрщ дькьн, кӧ бона һәвал йан пьзмамед хԝә, пʹешкʹешәкә «пʹьр баш» бьвиньн. У чахе әм пʹешкʹеше дьдьнә кәсәки, ԝе мәрʹа жи хԝәш бьһата, ԝәки мә бьбьһиста кӧ пʹешкʹеша мә бәгәм дькьн. Ле тӧ чь дьфькьри? Ле тәйе бьхԝәста бьда йан бьстанда пʹешкʹешәкә ӧса, кӧ бь рʹасти жи бьһата ԛимәт кьрьне?

Сәва кӧ мәрьв жь пʹешкʹеша тә шабуне бьстинә, әв йәк нә кӧ тʹәне пʹешкʹешева гьредайи йә, ле ӧса жи кӧ чь щурʹәйи тӧ әве пʹешкʹеше дьди. Кʹьтеба Пироз дьбежә: «Хԝәзи ль дайийа, нә кӧ ль стандийа» (Кʹаред Шандийа 20:35). Һәмьки чахе тӧ дьвини кӧ мәрьв пʹешкʹеша тә ԛимәт дькә, шабуна тә һе мәзьн дьбә.

Чь тӧ дькари бьки кӧ пʹешкʹеша тә шабуне бьдә һьм тә, һьм жи ԝи мәрьви кʹижанирʹа тӧ пʹешкʹеше дьди? Ле һәрге тӧ нькари пʹешкʹешәкә «пʹьрʹ баш» бьди, һьнге чь дькари бьки кӧ пʹешкʹеша тә бь рʹасти бе ԛимәткьрьне?