Һьнәк дьфькьрьн кӧ чәтьн ә бона кәсәки пʹешкʹешәкә баш бьвиньн. Чь жи һәбә, мәрьве кӧ пʹешкʹеше дьстинә, тʹәне ԝирʹа ԝе бе кʹьфше әԝ пʹешкʹеш чьԛас ԛимәт ә. У һәрге йәк дьфькьрә кӧ пʹешкʹеш ԛимәт ә, дьбәкә йе дьн ӧса нафькьрә.

Мәсәлә щаһьл дькарә бьфькьрә кӧ пʹешкʹеша лапә баш әԝ һәйә һащәтед әләктроник. Ле бона мәзьна гәләк ԛимәт ә пʹешкʹеша кӧ жь кал-баве хԝә стандьнә. Һьнә културада, ча бона щаһьла ӧса жи бона мәзьна, пʹешкʹеша лапә баш пʹәрә йә, чьмки әԝана чь бьхԝазьн, ԝе ԝи жи бькʹьрьн.

Чь жи һәбә гәләк мәрьвед сәрԝахт бәрдәԝам дькьн пʹешкʹеша ӧса бьгәрʹьн, чь кӧ ԝе лайиԛ бә. Нә һеса йә тʹьме пʹешкʹешәкә ӧса бьвини, ле һәрге һьнә тьшта һьлдьн һʹәсаб, әԝ дькарә аликʹарийе бьдә кӧ ве пьрседа сәрфьраз бьн. Ԝәрен әм шеԝьр кьн чар тьшта, чь кӧ ԝе али мә бькә, ԝәки пʹешкʹешәкә лайиԛ бьвиньн.

Хԝәстьна мәрьв. Мерькәки жь Бәлфасте, Ирландайа Бакӧре дьбежә, кӧ чахе әԝ 10-11 сали бу ԝирʹа бисиклет пʹешкʹеш кьрьн. Әв пʹешкʹешәкә пʹьрʹ баш бу бона ԝи, чь кӧ шабунәкә мәзьн ԝирʹа ани. Чьма? Әԝи гот: «Чьмки мьн гәләк әв дьхԝәст». Чаԝа те кʹьфше хԝәстьна мәрьвава гьредайи йә, кӧ әԝе ве пʹешкʹеше ԛимәт кә йан на. Ләма жи бьфькьрьн дәрһәԛа ԝи мәрьви кʹижанирʹа кӧ һун дьхԝазьн пʹешкʹеше бьдьн. Тедәрхә мәрьв чь ԛимәт дькә, чьмки гәләк щар әв йәк һʹӧкӧм дькә сәр хԝәстьнед ԝан. Мәсәлә, кал-пир тʹьме ԛимәт дькьн тʹәви малбәта хԝә ԝәʹдә дәрбаз кьн. Дьбәкә хԝәстьна ԝан әԝ ә, кӧ тʹьме тʹәви зарʹед хԝә у нәбийед хԝә ԝәʹдә дәрбаз кьн. Мәсәлә кал-пир һʹәсаб дькьн, кӧ пʹешкʹешәкә лапә баш бона ԝан әԝ ә, һәрге нәфәред ԝан, ԝана жи тʹәглиф кьн тʹәви хԝә сәр тʹатʹиле.

Сәва кӧ хԝәстьнед мәрийа тедәрхьн, әм гәрәке гӧһдарванед баш бьн. Кʹьтеба Пироз дьбежә кӧ, бьһистьнеда бь ләз бьн, ле хәбәрданеда гьран бьн (Аԛуб 1:19). Чахе тӧ һәр рʹож тʹәви һәвал йан пьзмамед хԝә хәбәр дьди, рʹьнд  гӧһ бьдә ԝан, чьмки әԝе али тә бькә тедәрхи кӧ чь ԝана хԝәш те, у чь на. Ӧса те бькарьби пʹешкʹешәкә баш бьди ԝан чь кӧ ԝе шабуна ԝан зедә кә.

Һʹәԝщед мәрьва. Мәрьв дькарә һәла һе пʹешкʹешәкә бьчʹук у арзан жи ԛимәт кә, һәрге әв ԝирʹа лазьм ә у һәрге әԝе бькарьбә бьдә хәбате. Ле чаԝа тӧ дькари тедәрхи, кӧ чь мәрьврʹа лазьм ә?

Даһа һеса йә жь мәрьв бьпьрсьн, кӧ әԝ чь дьхԝазә у чь ԝирʹа лазьм ә. Ле һәрге әм дьфькьрьн, кӧ чаԝа бь пʹешкʹеша хԝә мәрьва әʹщебмайи кьн, әв йәк ԝе ида шабуне мәрʹа нәйинә. Рʹаст ә һьнәк мәрьв дькарьн һеса бежьн кӧ чь әԝана дьхԝазьн, ле гәләк щар мәрьв ԝе нәбежьн кӧ чь ԝанарʹа лазьм ә.

Сәрԝахт бә у дина хԝә бьдә дәрәщед мәрийа. Гәло әԝ мәрьв щаһьл ә, әʹмьрда мәзьн ә, азәп ә, зәԝащеда нә, би йә, хәбатчи йә йан нахәбьтә? Дина хԝә бьде, кӧ ԝан дәрәщада тӧ дькари кʹижан пʹешкʹеша бьди мәрийа. Ӧса жи бьфькьрә кӧ кʹижан пʹешкʹеш дькарә хут бона һʹәԝщед мәрьв бә.

Сәва кӧ бькарьби һʹәԝщед мәрьв һьлди һʹәсаб у пʹешкʹешәкә лайиԛ бьди, хәбәр дә тʹәви ԝан мәрийа йед кӧ рʹасти дәрәщед ӧса һатьнә. Дьбәкә әԝана дәрһәԛа тьштед ӧса бежьнә тә, чь кӧ нәәʹйан ьн. Ӧса те бькарьби пʹешкʹешәкә баш бьки.

Ԝәʹдә. Кʹьтеба Пироз дьбежә: «Чьԛас хԝәшә һәр хәбәр ԝәхте хԝәда!» (Мәтʹәлок 15:23). Әв рʹез дьдә кʹьфше кӧ хәбәред мә йед кӧ ԝәхтда тенә готьн, гәләк муһим ьн. Әве йәке әм дькарьн бежьн дәрһәԛа кьред хԝә жи. Хәбәред кӧ кәсәкирʹа ԝәʹдәки лазьмда те готьн, шабуне тинә. Анәгори ԝе йәке пʹешкʹеша кӧ ԝәʹдә у дәрәща лазьмда те дайин, дькарә шабунәкә мәзьн бьдә мәрьв.

Жере ве бе готьне дәрһәԛа һьнә дәрәща, кӧ чь чах әм дькарьн пʹешкʹеша бьдьн. Һәвал дьхԝазә бьзәԝьщә. Щаһьл ида мәкʹтәбе хьлаз дькә. Жьн-меррʹа гәрәке зарʹ бьбә. Һьнәк мәрьв дьфькьрьн ԝәки ԝе керһати бә, һәрге дәрһәԛа ԝан дәрәща хԝәрʹа бьньвисьн, йе кӧ ԝе нава саледа бьԛәԝьмьн. Ӧса әԝана дькарьн пешда дәрһәԛа пʹешкʹешәкә лайиԛ бьфькьрьн. *

Һәмьки һәнә дәрәщед мәхсус чахе тӧ гәрәке пʹешкʹеша бьди. Тӧ тʹьме дькари жь дайине шабуне бьвини. Ле тьштәки гәрәке бир нәкьн. Мәсәлә һәрге мерәк бе мәʹни пʹешкʹеше дьдә кʹӧлфәте, әԝ дькарә бьфькьрә кӧ әԝ ԝи хԝәш те у дьхԝазә һе рʹьнд ле нас кә. Демәк пʹешкʹеша ԝи щурʹәйи дькарә мәрийа бьхәльфинә йан тʹәви һәв кә. Ле әм гәрәке тьштәки һьлдьн һʹәсаб: нетед мәрьва.

Нетед мәрьва. Чаԝа жь мәсәлед жорʹе готи те кʹьфше, ԝе баш бә чахе әм пʹешкʹеша дькьн, һьлдьн һʹәсаб, кӧ мәрьв ԝе дәрһәԛа нета мә чь бьфькьрьн. Хенщи ԝе йәке ԝе баш бә кӧ әм бир нәкьн, ԝәки бь чь нети әм пʹешкʹеше дьдьн. Гәләк мәрьв бь дьл у щан пʹешкʹеша дьдьн, ле һьнәк жи тʹәне дәрәщед мәхсусда пʹешкʹеша дьдьн, чьмки дьфькьрьн кӧ мәщбур ьн ӧса бькьн. Һәнә йед ӧса жи, кӧ пʹешкʹешкьрьнеда кʹара хԝә дьгәрʹьн.

Пьрсе бьдә хԝә: Әз бь чь нете пʹешкʹеш дькьм? Кʹьтеба Пироз дьбежә: «Бьра һәр кьрьнед ԝә бь һʹьзкьрьне бьн» (1 Корьнтʹи 16:14). Һәрге нета дайина тә һʹьзкьрьн ә у хәмгинйева гьредайи йә, мәрьв ԝе бь шабун пʹешкʹеша тә бьстиньн, у тӧйе жи шабунәкә мәзьн бьстини жь бо дьлрʹәмйа хԝә. Чахе тӧ бь дьл дьди, тӧ Баве хԝәйи әʹзмана жи ша дьки. Паԝлосе шанди, пʹайе Мәсиһийед Корьнтʹийе да, чахе әԝана бь мәрʹдани у шабуне пьштгьрйа Мәсиһийед Щьһустане кьрьбун.  Паԝлос готә ԝан «Хԝәде йе бь дьл у әшԛ дьдә һʹьз дькә» (2 Корьнтʹи 9:7).

Һәрге тӧ дина хԝә бьди тьштед жоре готи, әв йәк ԝе али тә бькә ԝәки пʹешкʹеша лайиԛ бьки, чь кӧ ԝе шабуне мәрьварʹа бинә. Әԝ тьштед жоре готи у ӧса жи тьштед дьн, пʹарәкә жь нета Хԝәде бун бона инсанәте, кӧ әԝана пʹешкʹешәкә лапә баш бьстиньн. Әм ԝә тʹәглиф дькьн готара дьн бьхуньн, у һе зедә дәрһәԛа ве пʹешкʹеша баш пебьһʹәсьн.