Һәрге әм хԝә жь мәрьвед кӧ мә хԝәш найен, дур дьгьрьн, әм дьле хԝәда нәфрʹәтийе дьһа пешда тиньн. У һәрге әм тʹәне тʹәви ԝан мәрьва һәвалтийе дькьн, йед кӧ мина мә нә, әме дәстпекьн бьфькьрьн ԝәки ньһерʹандьн, һәст у кьред мә рʹаст ьн.

«Дьле хԝә мәрʹа вәкьн» (2 КОРЬНТʹИ 6:13).

Әв гьли чь тенә һʹәсабе? «Дьле» мә, те һʹәсабе емосийа у һәстед мә. Һәрге әм тʹәне ԝан мәрьва һʹьз дькьн, йед кӧ гәләк тьштада мина мә нә, дьле мә ԝе бона мәрьвед дьн дадайи бә. Сәва кӧ хԝә жь ве проблеме дур бьгьрьн, ԝе баш бә һазьр бьн тʹәви мәрьвед кӧ жь мә щӧдә дьбьн, һәвалтийе бькьн.

Чахе әм мәрьвед дьн рʹьнд нас дькьн, әм дәстпедькьн фәʹм кьн кӧ чьма әԝана жь мә щӧдә дьбьн. У чахе әм дьһа незики ԝан дьбьн, әм ида дина хԝә надьн щӧдәкьрьне. Әм һе зедә ԝана ԛимәт дькьн, һьм жи мәрʹа һеса дьбә дьлшәԝатийе һьндава ԝанда бьдьнә кʹьфше, чьмки шабун у дәрде ԝан дьле мә дьгьрә.

Ԝәрен әм шеԝьр кьн мәсәла Назаре. Ԝәхтәки әԝе мәрьвед жь ԝәлатед дьн нәфрʹәт дькьр. Әԝ гьли дькә, ԝәки чь али ԝе кьр кӧ әԝ һатә гӧһастьне: «Мьн тʹәви ԝан ԝәʹдә дәрбаз дькьр у әм тʹәвайи дьхәбьтин. Әз рʹасти мәрьвед ӧса һатьм,  йед кӧ жь мьн щӧдә дьбун, ле ӧса нибун чаԝа мьн дәрһәԛа ԝан бьһистьбу. Чахе тӧ һәвалтийе дьки тʹәви мәрьвед жь щурʹә-щурʹә култура, тӧ фәʹм дьки ԝәки гьшк мина һәв ниньн. Тӧ дәстпедьки ԝана бона хәйсәт-һʹӧнӧред ԝан һʹьз ки у ԛимәт ки».

Мәщала бьвинә кӧ тʹәви мәрьвед жь щурʹә-щурʹә ԝәлата у мьләта бькʹәви хәбәрдане. Тӧ дькари

• Жь ԝана һиви ки, ԝәки һʹәвәки дәрһәԛа хԝә гьли кьн.

• Ԝана тʹәглифи мала хԝә ки.

• Гӧһ бьди сәрһатийед ԝан у пебьһʹәси, кӧ чь бона ԝан ԛимәт ә.

Чахе тӧ ль сәр хԝә дьхәбьти, кӧ фәʹм бьки, ԝәки чаԝа дәрәщед жийина ԝан ль сәр ԝан һʹӧкӧм бунә, һьнге тӧ дәрһәԛа ԝан рʹаст дьфькьри.