Ве дәрәще бьдә бәр чʹәʹве хԝә: Карин һатийә сәр ԝәʹдәдәрбазкьрьнәке, у чәнд дәԛә шунда әԝ пьшт хԝәва дәнгәки нас дьбьһе.

Карин дьзьвьрʹә у һәвала хԝә Щесикайе дьвинә, йа кӧ пе дӧ ботʹьла сәкьни йә. Әԝ фәʹм дькә, ԝәки теда ичʹкә йә. Әԝ ботʹьләке дьрежи Карине дькә у дьбежә ԝе: «Нә тӧ ида зарʹа бьчʹук нини!»

Щесика һәвала ԝе йә, ләма жи Карин нахԝазә жерʹа бежә на. Һьн жи әԝ нахԝазә, ԝәки Щесика бьфькьрә, кӧ тʹәви ԝе һʹәԝас нинә. Әԝ дьфькьрә, кӧ Щесика кәчʹькәкә баш ә. Һәрге әԝ вәдьхԝә, демәк вәхԝарьнеда тьштәки хьраб тʹӧнә. «Әԝ тʹәне ичʹкә йә, әԝ наркотик нинә», ӧса Карин дьле хԝә һеса дькә.

Гәло һәрге тӧ дәԝса Карине буйайи, тәйе чь бькьра?

Сәва кӧ дәрәщед ԝи щурʹәйида бьжартьнед билани бькьн, мәрʹа лазьм ә тедәрхьн әм бь рʹасти мәрьвнә чь щурʹәйи нә. Чахе тӧ фәʹм дьки тӧ чь щурʹә мәрьв и у тӧ чь баԝәр дьки, ԝи чахи тӧйе бькарьби хԝәха жийина хԝә контрол ки у изьне нәди, ԝәки мәрьвед дьн дәԝса тә әԝе йәке бькьн (1 Корьнтʹи 9:26, 27).

Чаԝа мерхасийе ԛазанщ кьн? Пешийе щаба ԝан пьрса бьдьн.

Чахе тӧ фәʹм дьки, ԝәки фәрәсәт у хәйсәт-һʹӧнӧред тәйи ԛәԝи һәнә, әԝ йәк али тә дькә дьһа хԝәда баԝәр би.

МӘСӘЛӘ ЖЬ КʹЬТЕБА ПИРОЗ: Паԝлосе шанди ньвиси: «Дьбә әз хәбәрданеда нә сәр хԝә мә, ле нә алийе занәбунеда» (2 Корьнтʹи 11:6). Занәбуна Паԝлос һьндава Кʹьтеба Пироз һәбу, ләма жи әԝи дькарьбу һеса щаба ԝан бьда, кʹе занәбуна ԝида дӧдьли дьбу. Әԝи изьн нәдьда, ԝәки нет-фькьред мәрьвед нәрʹаст сәр ԝи ӧса һʹӧкӧм кьн, ԝәки әԝ ԛәԝата хԝәда дӧдьли бә (2 Корьнтʹи 10:10; 11:5).

ХԜӘ БЬЩЕРʹЬБИНӘ: Бьньвисә чь фәрәсәт йан талантед тә һәнә.

Ньһа бьньвисә һʹӧнӧрәки хԝәйи баш. (Мәсәлә, тӧ йәки хәмкʹеш и? мәрʹд и? нәрм и? һәр тьшти ԝәʹдәда дьки?)

Әм заньн, ԝәки зьнщир кʹидәре сьст ә, ԝедәре дьԛәтә, һәма ӧса жи һәрге әм изьне дьдьнә кемасийед хԝә сәр мә һʹӧкӧм кьн, ԝи чахи әме һе сьст бьн.

МӘСӘЛӘ ЖЬ КʹЬТЕБА ПИРОЗ: Паԝлос инкʹар нәдькьр, ԝәки сьстбунед ԝи һәнә. Әԝи дьньвиси: «Әз бь кʹурайийа дьле хԝә ԛануна Хԝәде бәгәм дькьм, ле ԛанунәкә дьн нава хԝәда дьбиньм кӧ мьԛабьли ԝе ԛануна һʹьше мьн бәгәм кьрийә дькә шәрʹ у мьн дькә һесире ԛануна гӧна» (Рʹомайи 7:22, 23).

ХԜӘ БЬЩЕРʹЬБИНӘ: Тʹәви кʹижан сьстбунед хԝә тӧ гәрәке шәрʹ бьки?

Гәло тӧйе бежи ажоване таксийе, ԝәки мьһаләкеда тә бьвә-бинә һʹәта кӧ бензина ԝи хьлаз бә? Һәмьки на. Әԝ йәк ԝе нәаԛьлайи бә у бьһа сәр тә рʹуне!

Әм чь дәрсе һин дьбьн? Нетед кӧ тӧ датини пешийа хԝә али тә дькьн пешда һәрʹи, нә кӧ щики бьсәкьни, чьмки тӧ зани, тӧ дьхԝази бьгьһижи чь у чаԝа әԝе йәке бьки.

МӘСӘЛӘ ЖЬ КʹЬТЕБА ПИРОЗ: Паԝлос ньвиси: «Әз ӧса нарʹәвьм чаԝа йед бемәрәм» (1 Корьнтʹи 9:26). Паԝлос чʹәʹвгьрти нәдьда пәй дәрәща, ле әԝи нет датани пешийа хԝә у дьгьһиштә ԝан (Филипи 3:12-14).

ХԜӘ БЬЩЕРʹЬБИНӘ: Жере бьньвисә дәрһәԛа се нета, йед кӧ тӧ дьхԝази бьгьһижейи нава саләкеда.

Һәрге тӧ мьԛәрм сәва баԝәрийа хԝә нәсәкьни, тәрʹа ԝе чәтьн бә. Һәрге тӧ мина маргисе йи (демәк хамелионе), йе кӧ рʹәнге хԝә дьгӧһезә, сәва кӧ һәртʹьм йед дьн хԝәш бе, әԝ йәк ԝе бьдә кʹьфше, ԝәки тӧ дьлда ԛәԝи нини.

Гава тӧ хԝә баԝәрийа хԝә дьгьри, демәк тӧ ԝи чахи жи найи гӧһастьне, гава йед дьн ӧса накьн чаԝа тӧ.

МӘСӘЛӘ ЖЬ КʹЬТЕБА ПИРОЗ: Кʹәнге Данийел щаһьл бу, ԝи жь нәфәред ԝи дур хьстьн, ле диса жи әԝи «дьле хԝәда бьрйар да», кӧ ԛануна Хԝәде бьԛәдинә (Данийел 1:8). Ӧса әԝи да кʹьфше, ԝәки әԝ найе гӧһастьне, ле амьн дьминә. Данийел бь рʹасти дьжит сәр һʹиме баԝәрийа хԝә.

ХԜӘ БЬЩЕРʹЬБИНӘ: Баԝәрийа тә чьда йә? Мәсәлә: Тӧ Хԝәде баԝәр дьки? Чьрʹа? Чь тә дьдә баԝәркьрьне, ԝәки Хԝәде һәйә?

Тӧ баԝәр дьки, ԝәки нормед Хԝәдейә нав-намусийе тәрʹа кʹаре тиньн? У чьма тӧ ӧса дьшьрмиш дьби?

Демәк тӧ дьхԝази бьби мина бәлге кӧ жь баки сьст дькʹәвә, йан мина дара кӧ бәр фьртоне тәйах дькә? Дьле хԝә ԛәԝи кә у тӧйе бьби мина дара ԛәԝи. Ԝи чахи тӧйе щаба ԝе пьрсе бьди, Әз мәрьвәки чь щурʹәйи мә?