На. Кʹьтеба Пироз дьбежә кӧ әм гәрәке тʹәне Хԝәдерʹа дӧа бькьн, бь наве Иса Мәсиһ. Иса готә шагьртед хԝә: «Һун аһа дӧа бькьн: Баве мәйи әʹзмана! Наве тә пироз бә» (Мәтта 6:9). Әԝи нә дьгот кӧ хенщи Хԝәде әм диса кәсәкирʹа гәрәке дӧа бькьн, мәсәлә кәсед пирозрʹа, йан мәләкарʹа.

 Ӧса жи Иса шагьртед хԝәрʹа гот: «Әз ьм, рʹе, рʹасти у жийин. Тʹәне пе мьн йәк дькарә бе щәм Баве (Йуһʹәнна 14:6). Хԝәде тʹәне Иса кʹьфш кьр «Кӧ бона мә лава-навчетийе бькә» (Ибрани 7:25).

Ле һәгәр әз һьн Хԝәдерʹа, һьн жи йед пирозрʹа дӧа дькьм?

 Чахе Шәйтʹан дьхԝәст Иса бьщерʹьбинә, Иса ӧса щаба хԝә да: «Сәре хԝә ль бәр Хӧдан Хԝәдейе хԝә дайнә у тʹәне ԝи бьһʹәбинә!» (Мәтта 4:10). Хԝәде дьхԝазә ԝәки әм тʹәне ԝи бьһ′әбиньн у тʹәне ԝирʹа дӧа бькьн (Ишайа 48:11).

 Әм Хԝәде беһӧрмәт дькьн чахе хенщи ԝи кәсәки дьнрʹа дӧа дькьн, фьрԛи тʹӧнә әԝ мәләк ьн йан кәсед Пироз ьн. Чахе Йуһʹәннайе шанди дьхԝәст сәре хԝә бәр мәләк дайнә, әԝи щаба ԝи да: «Ве йәке нәкә! Әз жи һәвал-хӧламәки мина тә у ԝан хушк-бьред тә мә, кʹижан әʹламәтийа Исайә рʹаст хԝәй дькьн. Сәре хԝә ль бәр Хԝәде дайнә» (Әʹйанти 19:10)