Хәбәра Йунани, йа кӧ Кʹьтеба Пирозда һатийә ԝәлгәрʹандьне ча сахкьрьн жь хәбәра «анастасис» пешда те, йа кӧ те һʹәсабе «рʹабун» йан жи «рʹабьн сәр пʹийа». Кәсе сахкьри жь мьрьне вәдьгәрʹә жийине у диса ча кәсе бәре йә (1 Корьнтʹи 15:12, 13).

 Рʹаст ә хәбәра «сахкьрьн» Ньвисаред Ибранида тʹӧнә йә, йа кӧ ӧса жи те навкьрьне Пәймана Кәвьн, ле йәкә әв зәлал бәʹса һевийа рʹабуна мьрийа дькә. Мәсәлә Хԝәде бь сайа Һосәйа пʹехәмбәр созәки ӧса да: «Әзе бь фидйә [бь кʹьрʹине] ԝан жь дийаре мьрийа, жь мьрьне рьзгар [хьлаз] бькьм» (Һосәйа 13:14, ИМ; Ибо 14:13-15; Ишайа 26:19; Данийел 12:2, 13).

 Мәрьв ԝе кʹидәре бенә сахкьрьне? Һьнә мәрьв тенә сахкьрьне сәр әʹзмана, ԝәки тʹәви Иса Пʹадшатийе бькьн (2 Корьнтʹи 5:1; Әʹйанти 5:9, 10). Кʹьтеба Пироз әв сахкьрьн нав дькә «рʹабуна мьрийайә пешьн», әв гьли дьдә кʹьфше ԝәки сахкьрьнәкә дьн жи һәйә (Әʹйанти 20:6; Филипи 3:11). Демәк әв һәйә сахкьрьна дӧда, бона жийина сәр әʹрде у һʹәчʹи зәʹф мьри ԝе ԝәʹде ԝе сахкьрьна дӧда жь мьрьне рʹабьн (Зәбур 37:29).

 Мәрьв ча тенә сахкьрьне? Хԝәде ԛәԝат да Иса, ԝәки әԝ бькарьбә мьрийа рʹакә (Йуһʹәнна 11:25). Иса ԝе «һʹәмуйед тʹьрбада» вәгәрʹинә жийине у һәр мәрьв ԝе һәма әв кәс бә, кʹижан кӧ пешийа мьрьне бу, бь хәйсәт-һʹӧнӧр у бь биранина хԝәйә бәре (Йуһʹәнна 5:28, 29). Кәсед кӧ ԝе сәр әʹзмана бенә сахкьрьне, ԝе бәдәна рʹӧһʹани бьстиньн, ле әԝед кӧ ԝе сәр әʹрде бенә сахкьрьне, ԝе бәдәна физикийә беԛьсур у сьһʹәт-ԛәԝата кʹамьл бьстиньн (Ишайа 33:24; 35:5, 6; 1 Корьнтʹи 15:42-44, 50).

 Кʹе ԝе бенә сахкьрьне? Кʹьтеба Пирозда те готьне ԝәки «һʹәму һәԛ у нәһәԛе жь мьрьне рʹабьн» (Кʹаред Шандийа 24:15). Йед һәԛ тенә һʹәсабе хьзмәткʹаред Хԝәдейә амьн, йед ӧса ча Нӧһ, Сәра у Бьраһим (Дәстпебун 6:9; Ибрани 11:11; Аԛуб 2:21). Ле йед нәһәԛ әԝ мәрьв ьн, йед кӧ пе принсипед Хԝәде нәдьжитьн, чьмки мәщала ԝан тʹӧнә бу дәрһәԛа принсипед Хԝәде пебьһʹәсьн.

 Ле йед кӧ педа кʹәтьбун нава хьрабийе у гӧнә дькьрьн у ида рʹастбуна ԝан тʹӧнә бу, йед ӧса ԝе сах нәбьн. Гава мәрьвед ӧса дьмьрьн, әԝана сәр һʹәта-һʹәтайе дьмьрьн у һевийа ԝан тʹӧнә жь мьрьне рʹабьн (Мәтта 23:33; Ибрани 10:26, 27).

 Сахкьрьн ԝе кʹәнге дәстпебә? Ль гора Кʹьтеба Пироз сахкьрьна сәр әʹзмен гәрәке дәстпебуйа ԝәʹде сәрԝертийа Иса, демәк жь сала 1914 (1 Корьнтʹи 15:21-23). Сахкьрьна сәр әʹрде ԝе бьԛәԝьмә ԝәʹде Һʹәзарсалийа Сәрԝертийа Иса, гава әʹрд бьбә щьнәт (Луԛа 23:43; Әʹйанти 20:6, 12, 13).

 Чьрʹа бь аԛьлайи йә рʹабуна мьрийа баԝәр кьн? Кʹьтеба Пирозда һур бь һур те гьликьрьне дәрһәԛа нә мәрьва, йед кӧ һатьнә сахкьрьне у ԝәʹде ԝан сахкьрьна тʹьме шәʹдә һәбун, йед кӧ дькарьбун ԝе йәке избат кьрана (1 Пʹадшати 17:17-24; 2 Пʹадшати 4:32-37; 13:20, 21; Луԛа 7:11-17; 8:40-56; Йуһʹәнна 11:38-44; Кʹаред Шандийа 9:36-42; 20:7-12; 1 Корьнтʹи 15:3-6). Мәсәлә сахкьрьна Лазар гәләк мәхсус бу, чьмки әԝ ида чар рʹожа мьри бу у Иса ԝи бәр чʹәʹве гәләк мәрьва сах кьр (Йуһʹәнна 11:39, 42). Һәла һе дьжмьнед Иса жи нькарьбун әв йәк инкʹар кьрана, ләма жи ԝана сафи кьр Иса у Лазар бькӧжьн (Йуһʹәнна 11:47, 53; 12:9-11).

 Кʹьтеба Пироз нишан дькә кӧ һьн ԛәԝат һьн жи хԝәстьна Хԝәде һәйә ԝәки мәрьва жь мьрьне рʹакә. Хԝәде биранина хԝәйә бесинорда һәр информасийа дәрһәԛа ԝи мәрьви хԝәйи дькә, кʹижани әԝ ԝе пе ԛәԝата хԝәйә мәзьн жь мьрьне рʹакә (Ибо 37:23; Мәтта 10:30; Луԛа 20:37, 38). Хԝәде дькарә мәрьва жь мьрьне рʹакә у әԝ гәләк һʹьзрәта ԝе йәке йә! Гава Кʹьтеба Пироз бәʹса рʹабуна мьрийайә ахьрийе дькә, әԝ дәрһәԛа Хԝәде ӧса дьбежә: «Те бира әʹфьрандьнед дәсте хԝә бьки» (Ибо 14:15, ДТʹ).

Ньһерʹандьнед нәрʹаст дәрһәԛа рʹабуна мьрийа

 Ньһерʹандьна нәрʹаст: Рʹабуна жь мьрьне әв һәйә, гава нәфс у бәдән дьбьнә йәк.

 Избати: Кʹьтеба Пироз һин дькә, ԝәки нәфс әв һәйә хԝәха мәрьв, нә кӧ пʹарәкә ԝи кӧ паше мьрьне дьминә (Дәстпебун 2:7; Һәзәԛел 18:4). Сахкьрьна жь мьрьне найе һʹәсабе ԝәки рʹӧһʹ у нәфса мәрьв дьбьнә йәк, ле те һʹәсабе ԝәки Хԝәде ԝи мәрьвирʹа бәдәнәкә тʹәзә дьдә у ԝе бина жийине пʹьфи ԝи бькә у әԝ ԝе диса дәстпекә бьжи.

 Ньһерʹандьна нәрʹаст: Һьнә мәрьв ԝе жь мьрьне рʹабьн у һәма ԝе дәме ԝе бенә ԛьрʹкьрьне.

 Избати: Кʹьтеба Пироз дьбежә ԝәки «йед кӧ хьраби кьрьнә бона диԝане» ԝе рʹабьн (Йуһʹәнна 5:29). Ле диԝана ԝан ԝе сәр һʹиме кьред ԝанә паше сахкьрьне бьбә, нә кӧ пешийа мьрьна ԝан. Иса гот: «Мьрийе дәнге Кӧрʹе Хԝәде бьбьһен у әԝед кӧ бьбьһен ԝе бьжин» (Йуһʹәнна 5:25). Әԝед кӧ «бьбьһен» демәк гӧрʹа Хԝәде бькьн у ль гора ԝе занәбуне бьжин, ԝе наве ԝан «кʹьтеба жийинеда» бе ньвисаре (Әʹйанти 20:12, 13).

 Ньһерʹандьна нәрʹаст: Мәрьв ԝе һәма бь ви бәдәни бе сахкьрьне бь кʹижани кӧ мьр.

 Избати: Паши мьрьне бәдәна мәрьв дьрʹьзә у дьбә тʹоз у хали (Ԝаиз 3:19, 20).