Һармәгәдон шәрʹе Хԝәде йә ортʹа сәрԝертийа мәрьва у Хԝәдеда. Әв һʹәму сәрԝерти у йед кӧ пьштгьрийа ԝан дькьн, мьԛабьли Хԝәде нә у нахԝазьн гӧрʹа сәрԝертийа ԝида бьн (Зәбур 2:2). Шәрʹе Һармәгәдон ԝе һʹәму сәрԝертийед мәрьва бьдә һьлдане (Данийел 2:44).

 Хәбәра «Һармәгәдон» Кʹьтеба Пирозда тʹәне щарәке һәйә. Әԝ Әʹйанти 16:16-да ньвисар ә. Ль гора пʹехәмбәртийа жь кʹьтеба Әʹйанти, һʹәму пʹадшед дьнйайе ԝе ԝи щи, кӧ бь Ибрани жерʹа «Һармәгәдон» те готьне, тʹоп бьн «бона шәрʹе ԝе Рʹожа Мәзьнә Хԝәдейе Һʹәму Зорайийе» (Әʹйанти 16:14).

 Шәрʹе Һармәгәдонеда ԝе кʹи шәрʹ бькә? Иса Мәсиһ ԝе рʹебәрийе ордийа әʹзмани бькә, у ԝе дьжмьнед Хԝәде алт кьн (Әʹйанти 19:11-​16, 19-​21). Әв дьжмьн әԝ ьн, йед кӧ мьԛабьли сәрԝертийа Хԝәде нә у Хԝәде бәр тьштәки һʹәсаб накьн (Һәзәԛел 39:7).

 Гәло шәрʹе Һармәгәдон ԝе Рʹоһʹьлата Навинда бә? На. Шәрʹе Һармәгәдон ԝе нә кӧ тʹәне щики бә, ле әв шәрʹ нав тʹәмамийа дьнйайеда бә (Йерәмийа 25:32-​34; Һәзәԛел 39:17-​20).

 Хәбәра Ибранийә «Һармәгәдон», кʹижан кӧ щарна те ԝәлгәрʹандьне ча «Һар-Мегидон», те һʹәсабе «Чʹийайе Мегидо». Мегидо шәһәре Исраела бәре бу. Ча әм жь тʹәрихийе педьһʹәсьн, незики ԝи бажари гәләк шәрʹ дьԛәԝьмин у дәрһәԛа һьнә жь ԝан шәрʹа Кʹьтеба Пирозда ньвисар ә (Һʹакьмти 5:19, 20; 2 Пʹадшати 9:27; 23:29). Ле йәкә Һармәгәдон найе һʹәсабе щики конкрет незики Мегидойа кәвьн, у нә жи ԝедәре чʹийайе мәзьн һәйә. Һʹәму мәрьвед кӧ мьԛабьли Хԝәде ԝе дәрен, дәшта Йизреәледа ԝе нә жи щи бьн. Һармәгәдон әԝ дәрәщә йә, кʹижанеда мьләтед нав тʹәмамийа дьнйайе ԝе бьщьвьн, сәва кӧ мьԛабьли сәрԝертийа Хԝәде һәрʹьн.

 Ԝәʹде шәрʹе Һармәгәдоне дәрәщә ԝе чь щурʹәйи бә? Рʹаст ә әм ньзаньн Хԝәде ԝе чь щурʹәйи ԛәԝата хԝә бьдә хәбате, ле әм заньн кӧ ԝе бь ԝан тьшта шәрʹ бьвә, чь кӧ әԝи бәре дьда хәбате. Мәсәлә, тәйрок, әʹрдһʹәж, лейи, агьр у кʹьркут, бьруск у нәхԝәши (Ибо 38:22, 23; Һәзәԛел 38:19, 22; Һәбаԛуԛ 3:10, 11; Зәкәрйа 14:12). Ԝәʹде ве тʹәвльһәвбуне һьнә дьжмьнед Хԝәде ԝе дәстпекьн һәв бькӧжьн. Ле ахьрийеда ԝе фәʹм бькьн, әв шәрʹе Хԝәде йә, нә кӧ шәрʹе мәрьва йә (Һәзәԛел 38:21, 23; Зәкәрйа 14:13).

 Гәло Һармәгәдонеда әʹрд ԝе бе кʹӧтакьрьне? Әʹрд ԝе тʹӧ щар нәйе кʹӧтакьрьне, чьмки әԝ һатийә әʹфьрандьне, сәва кӧ инсанәт ль сәр һʹәта-һʹәтайе бьжи (Зәбур 37:29; 96:10; Ԝаиз 1:4). Һармәгәдонеда инсанәт жи ԝе бь тʹәмами нәйе кʹӧтакьрьне, чьмки ԝәʹде ԝи шәрʹи «әʹлаләта мәзьн» демәк щьмәʹта Хԝәде ԝе бе хьлазкьрьне (Әʹйанти 7:9, 14; Зәбур 37:34).

 Кʹьтеба Пирозда хәбәра «дьнйа» нә кӧ тʹәне бона әʹрде те хәбьтандьне, ле ӧса жи бона ԝан мәрьвед зӧлм, йед кӧ мьԛабьли Хԝәде нә (1 Йуһʹәнна 2:15-17). Демәк фәʹмдари йә кӧ чь те һʹәсабе «ахьрийа ве дьнйайе», дәрһәԛа кʹижани кӧ Кʹьтеба Пирозда те готьне (Мәтта 24:3).

 Һармәгәдон ԝе кʹәнге бә? Дәрһәԛа тәнгасийа мәзьн, ахьрийа кʹижани кӧ ԝе Һармәгәдон бә, Иса гот: «Ле бона ԝе рʹоже у ԝе сьһʹәте тʹӧ кәс ньзанә, нә мьлйакʹәтед әʹзмана, нә жи Кӧрʹ, ле тʹәне Бав» (Мәтта 24:21, 36). Ле Кʹьтеба Пироз дьдә кʹьфше, ԝәки Һармәгәдон ԝе ԝәʹде һатьна Иса бьԛәԝьмә, демәк ԝәʹде сәрԝертийа ԝийә кӧ сала 1914-да дәстпебу (Мәтта 24:37-39).