Кʹьтеба Пироз рʹебәрийа лапә баш дьдә бона сафикьрьна. Әв дькарә али мә бькә кӧ «сәрԝахтийе» у фәʹмкʹарийе бьстиньн (Мәтʹәлок 4:5). Кʹьтеба Пироз бона һьнә дәрәща рʹастә-рʹаст дьбежә, ԝәки гәрәке чь бькьн. Ле бона һьнә дәрәща жи ширәта дьдә, сәва кӧ сафикьрьнед баш бькьн.

Ве готареда

•  Ширәтед кӧ дькарьн али тә бькьн, ԝәки сафикьрьнед рʹаст бьки

•  Һәрге мьн тьштәк сафи кьрийә, гәло әз дькарьм сафикьрьна хԝә бьгӧһезьм?

•  Чь бькьм һәрге мьн сафикьрьнәкә хьраб кьрийә у нькарьм бьгӧһезьм?

•   Сафикьрьнед фәрз ләзә-ләз нәкә. Кʹьтеба Пироз дьбежә: «Йе аԛьл дина хԝә дьдә гавед хԝә» (Мәтʹәлок 14:15). Һәрге тӧ ләзә-ләз сафикьрьне бьки, дьбәкә дина хԝә нәди сәр информасийа фәрз. Ԝәʹдә бьвинә, ԝәки кʹур бьфькьри у паше сафикьрьне бьки (1 Тʹесалоники 5:21).

•   Тʹәне сәр һʹиме һәст у емосийед хԝә сафикьрьна нәкә. Ль гора ширәта Кʹьтеба Пироз, әм нькарьн тʹьме итʹбарийа хԝә дьле хԝә биньн (Мәтʹәлок 28:26; Йерәмйа 17:9). Мәсәлә, әм нькарьн сафикьрьнед рʹаст бькьн, һәрге һерс ьн, дьлтәнг ьн, депресийайеда ньн, у һәла һе һәрге ԝәстийайи нә жи (Мәтʹәлок 24:10; 29:22).

•   Бона биланийе дӧа бькә (Аԛуб 1:5). Хԝәде бь шабун һазьр ә щаба дӧайед ӧса бьдә. Әԝ мина бавәки һʹьзкьри йә, кʹижан кӧ бона зарʹед хԝә хәм дькә у дьхԝазә ԝәки әԝана жь проблема хԝәйкьри бьн. «Хӧдан ә йе сәрԝахтийе дьдә, заньсти, биланти жи жь дәве Ԝи дәртен» a (Мәтʹәлок 2:6). Хԝәде сәрԝахтийе йан жи биланийе, рʹастә-рʹаст жь Хәбәра хԝә дьдә мә, демәк жь Кʹьтеба Пироз (2 Тимотʹейо 3:16, 17).

•   Леколина бькә. Сәва кӧ сафикьрьна баш бьки, тәрʹа лазьм ә информасийа рʹаст. Кʹьтеба Пироз дьбежә: «Йе сәрԝахт бьбьһе һе занәбуна хԝә зедә кә» (Мәтʹәлок 1:5). Тӧ кʹидәре дькари информасийа рʹаст бьвини, кʹижан кӧ ԝе али тә бькә?

   Пешийе бьньһерʹә һәла Кʹьтеба Пироз дәрһәԛа дәрәща тә чь дьбежә. Әʹфьрандаре мә рʹьнд занә чь бона мә дьһа баш ә, ләма жи Хәбәра ԝида ширәтед лапи керһати һәнә (Зәбур 25:12). Кʹьтеба Пирозда бона һьнә дәрәща ԛанун у тʹәми һәнә, кʹижан кӧ рʹастә-рʹаст мәрʹа дьбежьн ԝәки әм чь гәрәке бькьн (Ишайа 48:17, 18). Ле бона һьнә дәрәща жи Кʹьтеба Пироз конкрет набежә, ԝәки чь әм гәрәке бькьн, ле әв бь сайа принсипа рʹебәрийе мә дькә. Бь аликʹарийа принсипа тӧ дькари сафикьрьнед баш бьки, кӧ ль гора хԝәстьна дьле тә бьн у мьԛабьли нормед Хԝәде нибьн. Сәва кӧ бона дәрәща хԝә Кʹьтеба Пирозда тʹәмийа у ширәта бьвини, лазьм ә әʹдәбйәтед сәр һʹиме Кʹьтеба Пироз леколин бьки. Тӧ дькари ԝан әʹдәбйәта сәр малпәра мә бьвини. b

   Бона һьнә дәрәща жи ԝе тәрʹа лазьм бә канийед бь итʹбар леколин бьки. Мәсәлә, пешийа кӧ тьштәки бькʹьрʹи, илаһи һәрге әв тьшт гәләк бьһа йә, ԝе бь билани бә леколин бьки, ԝәки әв тьшт чьԛас баш ә, кʹижан кʹарханә ве дәрдьхә, әв тьшт һәрге хьраббуйи бә тӧ дькари пашда бьди йан на. Һәмьки тӧ гәрәке ӧса жи избат би, ԝәки әв тьшт һәма әв ә чь кӧ тә дьхԝәст.

   Кʹьтеба Пироз дьбежә: «Бе ширәт мәрәм у тʹьвдир бәтал дьбьн» (Мәтʹәлок 15:22). Пешийа кӧ тьштәки сафи ки, тʹәви мәрьвед бь итʹбар бьшеԝьрә. Мәсәлә, сәва кӧ методәкә ԛәнщкьрьне бьжбери, ԝе баш бә тʹәви һʹәкиме бь итʹбар бьшеԝьри (Мәтта 9:12). Һьнә дәрәщада тӧ дькари тʹәви мәрьвед ӧса бьшеԝьри, кʹижан кӧ кʹәтьнә дәрәща мина йа тә. Бир нәкә ԝәки тӧ гәрәке хԝәха сафикьрьне бьки, нә кӧ әв мәрьв тʹәви кʹижани тӧ шеԝьра хԝә дьки, чьмки тӧйе ахьрийа ве сафикьрьне бькʹьшини (Галати 6:4, 5).

•   Һʹәму информасийа һьлдә һʹәсаб. Паши леколина информасийа, хԝәрʹа бьньвисә тӧ чь щурʹә сафикьрьна дькари бьки у әв сафикьрьн ԝе тәрʹа чь кʹаре у чь зьраре биньн. Кʹур бьфькьрә кӧ сафикьрьна тә ԝе чь ахьри тәрʹа бинә (Ԛануна Дӧщари 32:29). Мәсәлә, әв сафикьрьн ԝе ча сәр тә, малбәта тә, у мәрьвед дьн һʹӧкӧм бә? (Мәтʹәлок 22:3; Рʹомайи 14:19) Һәрге фькьре тә дәрһәԛа ве сафикьрьне, сәр һʹиме Кʹьтеба Пироз бьн, әв йәк ԝе али тә бькә кӧ сафикьрьна тә бь билани у рʹаст бә.

•   Сафикьрьна бькә. Щарна әм хԝәда баԝәр ниньн, ләма жи паш дьхьн кӧ сафикьрьна бькьн. Ле һәрге әм тьштәки нәкьн, әм дькарьн мәщаләкә баш жь дәсте хԝә бәрʹдьн йан жи бькʹәвьнә дәрәща нәбаш. Тʹӧ тьшти нәкьн дькарә ахьрийа ӧса бинә, чаԝа сафикьрьна хьраб. Кʹьтеба Пироз рʹабун-рʹуньштьна мәрьве ӧса бәрамбәри рʹабун-рʹуньштьна щоткʹар дькә: «Кәсе чʹәʹвдерийа байе дькә, ԝе нәчинә, кәсе ль әʹԝьра дьньһерʹә, ԝе һьлнәйинә» (Ԝаиз 11:4, ИМ).

 Бир нәкә, ԝәки сафикьрьна лапә баш жи, кʹамьл нинә. Щарна бона сафикьрьне лазьм ә тьштәки жь хԝә кем кьн. Ӧса жи дькарә тьштәкә ӧса бьԛәԝьмә, чь кӧ тӧ һивийе нибуйи (Ԝаиз 9:11). Демәк, әв һʹәму информасийа кӧ тә леколин кьр, рʹаст бьдә хәбате, у сафикьрьнәкә ӧса бькә кӧ ԝе ахьрийа баш тәрʹа бинә.

 Һәнә сафикьрьнед ӧса, кӧ тӧ дькари бьгӧһези. Дәрәщед әʹмьре тә дькарьн бенә гӧһастьне, йан жи дьбәкә сафикьрьна тә ахьрикә ӧса бинә, кӧ тӧ һивийе нибуйи. Дәрәщед ӧсада ԝе баш бә кӧ сафикьрьна хԝә бьгӧһези у йа ӧса бьжбери кӧ кʹаре тәрʹа бинә.

 Ле һәнә сафикьрьнед ӧса кӧ найенә гӧһастьне (Зәбур 15:4). Мәсәлә, Хԝәде дәʹԝа дькә ԝәки жьн-мер созе хԝәйә зәԝаще биньн сери, ләма жи әв сафикьрьн найе гӧһастьне c (Малахи 2:16; Мәтта 19:6). Чахе малбәтеда проблем пешда те, лазьм ә ԛәԝате бьдьнә хәбате сәва кӧ әве проблеме сафи кьн, нә кӧ һәв бьԛәтьн.

 Әм һʹәмушк жи щар-щара сафикьрьнед нә бь билани дькьн (Аԛуб 3:2). Сәва ԝе йәке тʹәбийәти йә, ԝәки әм пʹошман бьн у хԝә нәһәԛ кьн (Зәбур 69:5). Һәстед ӧса дькарьн кери мә бен, ԝәки щарәкә дьн шашикә ӧса нәкьн (Мәтʹәлок 14:9). Ле диса жи Кʹьтеба Пироз мәрʹа дьбежә, ԝәки әм бь зедәйи хԝә начәрчьриньн, чьмки әв йәк дькарә алийе емосийали у психикида зийане бьдә мә (2 Корьнтʹи 2:7). d Кʹьтеба Пирозда те готьне: «Дьлшәԝат у рʹәʹм ә Хӧдан» (Зәбур 103:8-13). Ләма жи зәʹф бәрхԝә нәкʹәвә, ле жь ве шашийа хԝә дәрсе хԝәрʹа һьлдә у чьԛас ԛәԝата тә дьгьһиже, ӧса бькә ԝәки дәрәще баш ки.