Бь сайа ԛӧрбанбуна Иса, Хԝәде ԝе инсанәте жь гӧнә у мьрьне хьлаз кә. Кʹьтеба Пирозда те готьне, кӧ хуна Иса кʹижан кӧ һатә рʹетьне, те һʹәсабе кʹьрʹин (Әфәси 1:7; 1 Пәтрус 1:18, 19). Ча жь гьлийе Иса те кʹьфше, әԝ һат ԝәки «әʹмьре хԝә бьдә, кӧ гәләка бькʹьрʹә» (Мәтта 20:28).

Чьма лазьм бу ԝәки Иса «гәләка бькʹьрʹә»?

 Мәрьве пешьн, Адәм беԛьсур бу, демәк бе гӧнә һатә әʹфьрандьне. Әԝ гәрәке һʹәта-һʹәтайе бьжита, ле әԝи әв мәщал ӧнда кьр, чьмки гӧрʹа Хԝәде нәкьр (Дәстпебун 3:17-19). Ләма жи чахе зарʹ ԝирʹа һатьнә буйине, гӧнә дәрбази сәр ԝан жи бу (Рʹомайи 5:12). Кʹьтеба Пирозда те готьне, кӧ Адәм хԝә у зарʹед хԝә фьротә дилтийе, демәк дилтийа гӧнә у мьрьне (Рʹомайи 7:14). Жь бо гӧнәкʹарийа хԝә, зарʹед ԝи ида нькарьбун пашда вәгәрʹиньн әԝ, чь кӧ Адәм ӧнда кьрьбу (Зәбур 49:7, 8).

 Дьле Хԝәде гәләк ешийа бона зӧрʹәтед Адәм, чьмки әԝана кʹәтьбун һʹаләки хьраб (Йуһʹәнна 3:16). Ль гора нормед хԝәйә һәԛ, Хԝәде нькарьбу чʹәʹвед хԝә сәр гӧнед ԝан дада у һʹәма ӧса бьбахшанда ԝан, чьмки әв йәк мьԛабьли нормед ԝийи һәԛ буйа (Зәбур 89:14; Рʹомайи 3:23-26). Ләма жи әԝи һʹиме бь ԛануни дани, демәк мәщал да, ԝәки нә кӧ тʹәне гӧнед ԝан бенә бахшандьне, ле ӧса жи жь гӧна аза бьн (Рʹомайи 5:6-8). Әв һʹиме ԛануни, кʹьрʹин ә.

Чь те һʹәсабе кʹьрʹин?

 Ль гора Кʹьтеба Пироз се тьшт дькʹәвьнә нава кʹьрʹине:

1.   Һәԛе кӧ те дайине сәва тьштәки йан кәсәки вәгәрʹиньн (Жьмар 3:46, 47).

2.   Бь сайа кʹьрʹине мәрьв азайе дьстиньн (Дәркʹәтьн 21:30).

3.   Кʹьрʹин гәрәке ԝәкә ԛимәте ԝи тьшти бә, чь кӧ те кʹьрʹине йан һәԛе чь жи те дадане. a

 Ԝәрә әм шеԝьр кьн, кӧ ча әв се тьшт ԛӧрбанбуна Иса Мәсиһва гьредайи нә.

1.   Һәԛ. Кʹьтеба Пирозда те готьне, ԝәки Мәсиһи «бь ԛимәт һатьнә кʹьрʹине» (1 Корьнтʹи 6:20; 7:23). Әв һәԛ хуна Иса йә, бь сайа кʹижани әԝи, «мәрьв жь һәр бәрәке, жь һәр зьмани, жь һәр щьмәʹте у жь һәр мьләти кʹьрʹин бона Хԝәде» (Әʹйанти 5:8, 9).

2.   Азакьрьн. Ԛӧрбанбуна Иса мә жь гӧна аза дькә (1 Корьнтʹи 1:30; Колоси 1:14; Ибрани 9:15).

3.   Ԝәкә һәв. Әʹмьре Исайи беԛьсур кӧ әԝи кьрә ԛӧрбан, хут ԝәкә ԝе зьраре бу, чь кӧ Адәме беԛьсур ани (1 Корьнтʹи 15:21, 22, 45, 46). Кʹьтеба Пироз дьбежә: «Чаԝа бь нәгӧһдарийа йәки [Адәм] гәләк бунә гӧнәкʹар, ӧса жи бь гӧһдарийа йәки [Иса Мәсиһ] гәләк ԝе рʹаст бенә һʹәсабе» (Рʹомайи 5:19). Жь ԝан гьлийа те кʹьфше, кӧ ча мьрьна мәрьвәки бона гәләка дькарә бьбә кʹьрʹин. Бь рʹасти ԛӧрбанбуна Иса бона ԝан һʹәму мәрьва йә, кʹижан кӧ алийе хԝәда һәр тьшти дькьн, сәва кӧ жь ве ԛӧрбанбуне кʹаре бьстиньн (1 Тимотʹейо 2:5, 6).