Ве готареда

•  Чьма рʹу бь рʹу хәбәр дьн?

•  Чаԝа хәбәрдане дәстпекьн?

•  Щаһьлед дьн чь дьбежьн

 Һьнә мәрьв дьбежьн кӧ хәбәрдана рʹу бь рʹу дьһа чәтьн ә, нә кӧ һәрге пе СМС хәбәр дьн.

 «Тӧ дьһа дькʹәви стресе гава рʹу бь рʹу хәбәр дьди, чьмки тӧ нькари тʹӧ тьшти тʹәмьз ки йан жи бьгӧһези»—Анна.

 «Хәбәрдана бь СМС мина бәрнаме йә, йа кӧ пешда һатийә ньвисандьне, ле хәбәрдана рʹу бь рʹу әԝ мина бәрнама зьнди йә. Чахе әз тʹәви кәсәки хәбәр дьдьм, һʹьше мьнда әв гьли нә, ‘Тьштәки шаш нәбежә!’»—Щин.

 Зу йан дәрәнг, ԝе тәрʹа лазьм бә һин би ча рʹу бь рʹу тʹәви мәрьва хәбәр ди. Мәсәлә, тӧ гәрәке һин би ча һәвала ԛазанщ ки, хәбате хԝәрʹа бьвини, йан жи чахе дәстпеки рʹасти кәсәки бейи.

 Бь рʹасти, хәбәрдана рʹу бь рʹу нә жи ӧса чәтьн ә. Тӧ дькари һин би у бьзаньби ча хәбәр ди, ԝи чахи жи һәрге тӧ йәки шәрмокә йи.

 «Тӧ гәрәке бона ве йәке һазьр би кӧ щарна те тьштәки шаш бежи у жь бо ве йәки шәрм ки. Тӧ нькари тʹьме хԝә контрол ки»—Нил.

•   Пьрса бьдьн. Бьфькьрә дәрһәԛа ве тʹеме йа кӧ дькарә мәрьврʹа һʹәԝас бә у дәстпекә дәрһәԛа ве тʹемайе хәбәр дә. Мәсәлә:

   «Тӧ һавине кʹӧ һеса буйи?»

   «Тӧ ԛә рʹасти ве малпәре һати? Әԝ малпәрәкә гәләк һʹәԝас ә.»

   «Тә бьһистийә дәрһәԛа . . . ?»

   Ӧса жи тӧ дькари бьфькьри дәрһәԛа ве йәке, һәла кʹижан тʹема ԝә һәрда хԝәш те у ԝәрʹа һʹәԝас ә. Мәсәлә, дьԛәԝьмә һун һәрдӧ жи дьчунә мәкʹтәбәки йан жи хәбата ԝә йәк ә? Пьрса сәр һʹиме ԝан тʹема бьдә, кʹижан кӧ бона ԝә нас ә.

   «Бьфькьрә дәрһәԛа ԝан пьрса йед кӧ тӧ һʹәсаб дьки, ԝәки һʹәԝас ьн у тәйе бь рʹасти бьхԝәста щаба ԝан пьрса бьстанда»—Марита.

   Фәсал бьн: Мәрьва әʹщьз нәкьн у пьрс пәй пьрса нәдьн. Ӧса жи фәсал бьн кӧ пьрсед шәхси нәдьн. Мәсәлә пьрсед ӧса ча «Тӧ дьһа зедә жь чь дьтьрси?» йан «Чьма тӧ тʹьме кʹьнще рʹәш хԝә дьки?» дькарьн ӧса бькьн, кӧ мәрьв хԝә щурʹәки тʹәхмин кә. Пьрса дӧда дькарә ӧса бе кʹьфше те бежи тӧ мәрьва беһӧрмәт дьки.

   Ӧса жи ләз нәкʹәвьн ньһерʹандьна хԝә мәрьврʹа бежьн, һʹәта кӧ әԝи щаба хԝә нәдайә сәр пьрса ԝә. Һәрге кьн бежьн, бьра хәбәрдана ԝә нәбә ԛьсәкьрьн.

   Принсипа Кʹьтеба Пироз: «Мәрәме дьле мерьв авед кʹур ьн, ле мәрьвед билан ԝан һьлдьчʹьньн» (Мәтʹәлок 20:5).

•   Рʹьнд гӧһ бьдьн. Сәва кӧ хәбәрдана ԝә һʹәԝас бәрдәԝам бә, гәрәке бира тәда бә, кӧ һе фәрз ә тӧ гӧһдар би нә кӧ хәбәр ди.

   «Мьн нет хԝәрʹа данийә, ԝәки һәр щар чахе әз тʹәви кәсәки хәбәр дьдьм тьштәки тʹәзә бона ԝи пебьһʹәсьм. Паше, әз бира хԝәда хԝәй дькьм чь кӧ әԝи гот, сәва кӧ мьнрʹа һеса бә ль гора ве йәке пьрса бьдьм у хәбәрдане бәрдәԝам кьм»—Тамара.

   Фәсал бьн: Бәр хԝә нәкʹәвьн бона ве йәке һәрге һун ньзаньн хәбәрдане ча бәрдәԝам кьн. Һәрге һун рʹьнд гӧһ бьдьн мәрьва, һуне бькарьбьн щаба хԝә сәр һʹиме ве йәке бьдьн, чь кӧ мәрьв гот.

   Принсипа Кʹьтеба Пироз: «Бьһистьнеда сәрхԝә бә, ле хәбәрдан у һерскʹәтьнеда гьран бә» (Аԛуб 1:19).

•    Һәԝасе пешда биньн. Тӧйе жь хәбәрдане дьһа шабуне бьстини һәрге һәԝасе һьндава ве йәке пешда бини, кӧ мәрьв дәрһәԛа кʹижан тʹеме хәбәр дьдә.

   «Чахе тӧ мәрьврʹа дьди кʹьфше кӧ бь рʹасти тәрʹа һʹәԝас ә бьбьһейи әԝ чь дьбежә, хәбәрдана ԝә һәла һе ԝи чахи жи ԝе хԝәш бә, һәрге нәфәʹмдари жи пешда бен»—Мариа.

   Фәсал бьн: Пьрсед шәхси нәдьн. Һәрге тӧ бежи, «Әԝ кʹьнще сәр тә чьԛас бәдәԝ ьн. Тә чь бьһа кʹьрʹи?» мәрьв жь бо ве пьрсе дькарә бьхәйидә!

   Принсипа Кʹьтеба Пироз: «Тʹәне ль кʹара хԝә нәгәрʹьн, ле бьра һәр кәс ль кʹара һәвале хԝә жи бьгәрʹә» (Филипи 2:4).

 Тӧ ча дькари хәбәрдане хьлаз ки? Хортәк жь Урдӧне ширәтәкә ӧса дьдә: «Хәбәрдане сәр тьштәкә позитив хьлаз кә». «Һәрге тӧ бежи, ‘Хәбәрдана тʹәви тә гәләк һʹәԝас бу’ йан жи ‘Бьра рʹожа тә хԝәш дәрбаз бә’ дькарә хԝәстьна мәрьв пешда бинә, кӧ диса тʹәви тә хәбәр дә».