Һʹәму малбәтада ԛәйдә һәнә, мәсәлә чь чах гәрәке бенә мал, чьԛас ԝәʹде хԝә сәр һащәтед әләктроник хәрщ кьн у ча хԝә һьндава мәрьвада бьгьрьн.

Ле һәрге тә ԛәйдәки малбәте тʹәрʹьбандийә? Чь кӧ ԛәԝьми, тӧ ида нькари бьгӧһези, ле бьхәбьтә кӧ дәрәще һе хьраб нәки. Әв готар ве дәрәщеда ԝе али тә бькә.

•  Гәрәке чь нәки

•  Ширәтәкә баш

•  Һьнә щаһьл чь дьбежьн

• Һәрге де-баве тә һаш пе тʹӧнә нә, ԝәки тә ԛәйдәки малбәте тʹәрʹьбандийә, дьбәкә тӧ бьхԝази әве йәке жь ԝан вәшери.

• Ле һәрге де-баве тә пеһʹәсийанә, ԝәки тә ԛәйдәки малбәте тʹәрʹьбандийә, һьнге те рʹасти щерʹьбандьне бейи, кӧ хԝә һәԛ дәрхи, йан жи кәсәки дьн ве йәкеда нәһәԛ ки.

Әв һәр дӧ метод керһати ниньн. Чьма? Чьмки чахе тӧ тьшта вәдьшери йан жи хԝә һәԛ дәрдьхи, әв нишана ве йәке йә, кӧ тӧ һе нькари щабдарийе һьлди сәр хԝә. У әв йәк ԝе де-баве тәрʹа жи бьдә кʹьфше, ԝәки тӧ һе зарʹ и.

«Дәрәԝа бьки, тʹӧ щар сафикьрьнәкә баш нинә. Ԝәʹдә шунда рʹасти ԝе әʹйан бә у щәзакьрьн дьһа сәрт бә. Ле һәрге тӧ сәре-серида рʹастийе бежи, щәзакьрьн ԝе ӧса сәрт нибә» (Диана).

• Шашийед хԝә бинә сәр хԝә. Кʹьтеба Пироз дьбежә: «Әԝе кӧ нәһәԛийа хԝә вәдьшерә хере набинә» (Мәтʹәлок 28:13). Де-баве тә заньн, ԝәки щарна тӧйе шашийа бьки, чьмки әв йәк тʹәбийәти йә. Әԝана тʹәне дьхԝазьн, ԝәки тӧ рʹастийе бежи.

  «Де-баве тә ԝе һьндава тәда дьһа рʹәʹм бьн, һәрге тӧ ԝанарʹа рʹаст бежи. Ӧса әԝана ԝе һе итʹбарийа хԝә тә биньн» (Оливийа).

• Бахшандьне һиви кә. Кʹьтеба Пироз дьбежә: «Шкәсти бьн» (1 Пәтрус 5:5). Бь рʹасти жи лазьм ә мьлук у шкәсти би, сәва кӧ хԝә һәԛ дәрнәхи у бежи: «Бьбахшиньнә мьн».

  «Мәрьвед кӧ һәр щар хԝә рʹаст дәрдьхьн, исафа хԝә хьраб дькьн. Ахьрийеда һәрге әԝана тьштәки хьраб жи бькьн, исафа ԝан ԝе ида ԝана нәчәрчьринә» (Һетер).

•   Ахьрийа кьред хԝә ԛәбул кә. Кʹьтеба Пироз дьбежә: «Гӧһ бьдьнә ширәта» (Мәтʹәлок 8:33). Дәԝса кӧ бьки кӧтә-кӧт, ԝе баш бә щәзакьрьна жь де-бава ԛәбул ки.

  «Бь кӧтә-кӧте тӧ дәрәще дьһа хьраб дьки. Ԛәԝате бьдә хәбате, кӧ щәзакьрьне ԛәбул ки у зәʹф дина хԝә нәдә ԝе йәке, кӧ чь синор тәрʹа данинә» (Щейсон).

• Бьхәбьтә, кӧ де-баве тә диса итʹбарийа хԝә тә биньн. Кʹьтеба Пироз дьбежә: «Дә һун хәйсәте хԝәйи бәре жь хԝә дур хьн» (Әфәси 4:22). Хԝә маԛул бьгьрә, тьштед бь аԛьлайи бькә, ԝәки де-баве тә бьвиньн кӧ тӧ мәрьвәки щабдар и у итʹбарийа хԝә тә биньн.

  «Һәрге тӧ сәр хԝә дьхәбьти, кӧ сафикьрьнед билани бьки у диса шашийа бәрнәди, ахьрийеда де-баве тә ԝе тәда дӧдьли нәбьн» (Карине).

ШИРӘТ: Сәва кӧ итʹбарийа де-баве хԝә ԛазанщ ки, лазьм ә һе зедә бьки нә кӧ чьԛас әԝана жь тә дәʹԝа дькьн. Мәсәлә щарәкә майин, чахе щикида дьчи, һәрге тӧ дәрәнги накʹәви жи, гава вәдьгәрʹи, рʹева де-баве хԝәрʹа тʹеле хә у бежә, ԝәки тӧ ида тейи мал. Бь ԝе йәке әԝана ԝе фәʹм бькьн, ԝәки тӧ диса дьхԝази итʹбарийа ԝан ԛазанщ ки.