Karên Şandiya 2:1-47
2 Roja Pênciyê Hesabê, ewana gişk cîkî tevayî bûn.
2 Nişkêva, dengek mîna bakî qayîm ji ezmên hat, û temamiya mala ku ewana têda rûniştî bûn, tije kir.
3 Û alavên agir ku mîna zimana wanra xuya bûn, bela bûn û ser wan her yekî danîn.
4 Hemû bi ruhê pîroz tije bûn, û destpêkirin ser cûre-cûre zimana xeber din, çawa ku ruhê pîroz ewana didane xeberdanê.
5 Hingê Cihûyên xwedêxofe ji her welatî, Orşelîmêda bûn.
6 Gava ev deng hate bihîstinê, xelq li hev top bûn. Ewana gelek ecêbmayî man, çimkî dibihîstin ku şagirt ser zimanên wan her yekî xeber didin.
7 Ewana heyr-hujmekar man û gotin: “Ne ew hemû kesên ku xeber didin, ji Celîlê ne?
8 Lê îja ça her yek ji me ser zimanê xweyî dê dibihê?
9 Partoyî, Medî, Elamî, bineliyên Mêsopotamyayê, Cihûstanê, Kepedokyayê, Pontosê û Asyayê,
10 Firîgyayê, Pamfîlyayê, Misirê û bineliyên herêmên Lîbyayê yên nêzîkî Kûrênê, yên ji Romê hatî him Cihû him jî yên ku dînê Cihûya qebûl kiribûn,*
11 Krêtî û Ereb—em hemû dibihên ku ewana ser zimanên me derheqa kirên Xwedê yên mezin xeber didin”.
12 Her kes metal û şaş ma, û ji hev dipirsîn: “Ev çi tê hesabê?”
13 Lê hineka jî qerfên xwe wan dikirin û digotin: “Ewana pê şerava şîrin* serxweş bûne”.
14 Hingê Petrûs tevî Yanzdeha* rabû û bi dengekî bilind got: “Gelî bineliyên Cihûstanê û hemû bineliyên Orşelîmê, rind guh bidine giliyên min.
15 Ev meriv serxweş nînin, ça hûn difikirin, çimkî niha şebeq e, sihet neh e.*
16 Lê ev giliyên Yowêl pêxember ber çevên we têne sêrî:
17 ‘Xwedê dibêje: “Rojên xilaziyêda,* ezê ruhê xwe ser her cûre merivada bibarînim. Kur û qîzên we wê pêxembertiyê bikin, û xortên we wê dîtinoka bivînin, û kal-pîrên we wê xewna bivînin.
18 Û wan rojada, ezê ruhê xwe ser hemû xulamên xweda, him ser jina, him jî ser mêrada, bibarînim, û ewê pêxembertiyê bikin.
19 Ezê jor li ezmên nîşana bikim û jêr jî ser rûyê erdê keremeta bikim: xûn, agir û ewrên dû.
20 Pêşiya hatina roja Yehowaye mezin û mexsûs, tev wê terî be û hîv wê mîna xûnê sor be.
21 Hingê her kesê ku gazî navê Yehowa ke, wê xilaz be”’.
22 Gelî bineliyên Îsraêlê, guh bidine van giliya: Çawa ku hûn xwexa zanin, Xwedê zelal nîşan kir, wekî Îsayê Nisretî aliyê wîva hatiye şandinê, û ewî pê Îsa keremet û kirên mezin dikirin.
23 Xwedê pêşda zanibû û qirar kiribû, ku ew meriv bikeve destê we, û we pê destê gunekara ew stûnê xist û kuşt.
24 Lê Xwedê ew ji mirinê rakir, ew ji cefê* mirinê aza kir, çimkî hukumê mirinê ser wî tune bû ku wî bigire.
25 Dawid derheqa wî usa gotibû: ‘Yehowa hertim ber çevê min e, çimkî ew aliyê milê minî rastê ye, wekî ez tu tiştî netirsim.
26 Lema jî dilê min şa ye, û ez bi şabûnê xeber didim. Û ezê* pê gumanê bijîm,
27 çimkî tuyê min Gorêda* nehêlî, û tuyê nehêlî wekî xizmetkarê teyî amin birize.
28 Te riyên jîyînê nîşanî min kir. Çaxê ez kêleka te* bim, tê dilê min bi şabûnê tije kî.
29 Birano, îzinê bidine min wekî ez eşkere derheqa kal-bavê* me Dawid bêjim. Ew mir, hate definkirinê û tirba wî heta îro vira ye.
30 Ew pêxember bû û ewî zanibû ku Xwedê wîra sond xwaribû, wekî wê yek ji zureta wî, ser textê wî bide rûniştandinê.
31 Dawid pêşda dît ku Mesîh wê ji mirinê rabe, û got ku ewê Gorêda nemîne, û bedena wî wê nerize.
32 Xwedê ew Îsa ji mirinê rakir, û em hemû şedên vê yekê ne.
33 Ew hate bilindkirinê û li milê Xwedêyî rastê rûnişt, û ruhê pîroz ku Bav jêra soz dabû, stand. Lema jî Îsa ruhê pîroz barande ser me, û hûn niha vê yekê divînin û dibihên.
34 Dawid neçû li ezmên, lê ew dibêje: ‘Yehowa Xudanê minra got: “Aliyê milê minî rastê rûnê,
35 heta ku ez dijminên te bikime binê piyên te”’.
36 Lema jî bira temamiya mala Îsraêlê rind bizanibe, ku ev Îsayê ku we stûnê xist, Xwedê ew him kire Xudan, him jî Mesîh”.
37 Ev gilî kûr ketine dilê wan, û wana Petrûs û şandiyên dinra got: “Birano, îja em çi bikin?”
38 Petrûs wanra got: “Tobe kin, û bira her yek ji we bi navê Îsa Mesîh bê nixumandinê,* seva ku gunên we bêne baxşandinê. Hingê hûnê ruhê pîroz ça pêşkêş bistînin.
39 Çimkî ev soz bona we, zarên we û bona wan hemûya ne, yên ku dûr in, bona hemûyên ku Xwedayê me Yehowa wê gazî bal xwe ke”.
40 Ewî bi gelek giliyên din jî şedetî da, temî da wan û got: “Xwe ji vî nisilê xirab xilaz kin”.
41 Hingê merivên ku bi dil û can giliyên wî qebûl kirin, hatine nixumandinê, û wê rojê weke 3 000 kes ser şagirtada zêde bûn.
42 Ewana timê ji şandiya hîn dibûn, tevayî wext derbaz dikirin,* dixwarin û dua dikirin.
43 Şandiya destpêkirin gelek nîşan û keremeta bikin, û tirsa Xwedê kete dilê her kesê ku ev tişt dîtin.
44 Hemû kesên ku bûne bawermend tevayî bûn, û ewana her tiştên xwe nav hevda parevedikirin.
45 Wana mal-milkê xwe difirot û ev pere li gora hewcê her kesî parevedikirin.
46 Ewana her roj paristgehêda top dibûn, diçûne malên hev tevayî xwarin dixwarin, eşq-şa û bi dilê sax xwarina xwe hevdura parevedikirin.
47 Wana pesinê Xwedê dida û hemû meriv wanra razî bûn. Wî çaxî, Yehowa roj bi roj hejmara kesên ku dihatine ser riya xilazbûnê, zêde dikir.
Спартьн
^ Raste-rast “prozêlît”. Eva ser wan meriva dihate gotinê, yên ku ji miletên din bûn û dînê Cihûya qebûl kiribûn.
^ Dêmek şerava teze.
^ Dêmek 11 şandî.
^ Raste-rast “siheta sisiya”. Wedê berê, sihet ji şebeqê dihate jimartinê.
^ Yan “rojên paşinda”.
^ Yan dibeke “zincîrên”.
^ Raste-rast “bedena min”.
^ Yan “Hadês”. Bi sîmbolîk mezelê hemû miriya.
^ Yan “li ber rûyê te”.
^ Yan “baveşîrê”.
^ Nixumandin edeteke rêlîgî ye, ku meriva pêda dikine bin avê û derdixin.
^ Yan “her tişt nav hevda parevedikirin”.
