MWE LUTLUT 26

Efuh Kuh Oasr Ma Kuluk ac Mwe Kweok?

PLAY

“Efuh?” Pa inge sie mwet el kwacna siyuck ke pacl ma oasr ongaiyac sikyak. Kuht arlac engan mweyen Bible uh ahkkahlwemye top na wo nuhke kihsen siyuck sacn!

1. Satan el sramtwacack fuhkah ma kuluk fin facluh?

Satan suc pahngpahng pac Devil el seahkos ac lain God. Satan el luhngse in kol mwet sahyac, ke ma inge el kiacpwelah mwet se meet, Adam ac Eve, in weluhl ke orekma in lain lal inge. Satan el fahk kahs kikiacp nuh sel Eve. (Genesis 3:1-5) El oruh Eve elan nuhnkuh muh oasr ma wo ma Jeova el sruhnga eltahl in engankihn. Kahs lal Satan inge kuh in kalmackihn pac muh mwet uh ac fah insewowo liki, eltahl fin tiac ahkos God. Satan el fahk kahs kikiacp se meet ke el fahk nuh sel Eve muh el ac tiac misac. Pwacnacng, Bible uh pahnglol Satan “mwet kikiacp se ac el pahpah tuhmuhn kikiacp nuhkewa.”—John 8:44.

2. Adam ac Eve sulaclah in oruh meac?

Jeova el sang ma puhkantwen nuh sel Adam ac Eve. El fahk lah eltahl kuh in mongo ke fukunsahk ke kuhtwena sahk ke imac Eden sahyen sahk soko uh. (Genesis 2:15-17) Tuhsruhktuh, eltahl sulaclah in kang fukunsahk ingacn. Eve “el eis kuhtuh fahko kac ac kanglah.” Tukun ma inge, el sang kuhtuh nuh sel Adam “ac el kanglah pac.” (Genesis 3:6) Ahok, eltahl seahkos God. Ke srihpen Adam ac Eve eltahl mwet suwohswohs, pwacnacng fal eltahl in oruh ma suwohs. Tuhsruhktuh, ke eltahl seahkos ke luhngse laltahl sifacna, eltahl oraclah ma kuluk ac pihlesruh kolyuck wowo lal. Sulaclah laltahl inge oruh eltahl in sun mwe kweok upac.—Genesis 3:16-19.

3. Meac sulaclah lal Adam ac Eve oruh nuh sesr?

Ke pacl se ma Adam ac Eve oraclah ma kuluk, eltahl eklac mwet sesuwohs. Ac ke srihpac inge eltahl pahselah ohiyac sesuwohs laltahl inge nuh sin tuhlihk nuhkewa nahtuhltahl. Bible uh fahk ohinge kacl Adam: “Ma kuluk tuhkuh nuh facluh ke mwet se, ac ma kuluk lal use pac misac. Ke srihpac se inge, misac ma nuh sin mwet nuhkewa.”—Rome 5:12.

Oasr srihpac pucspucs pwacnacng kuht sun mwe kweok. Kuhtuh pacl, kuht kweok ke srihpen sulaclah kuluk ma kuht oruh. Oasr pacl kuht kweok ke srihpen sulaclah kuluk luhn mwet sahyac uh. Kuhtuh mwet eltahl kweok ke srihpen onglah ohiyac uh sikyak.—Riti Ecclesiastes 9:11.

AHKYOHKYE LUTLUT LOM

Lotwelah lah efuh tiac God pa srihpen ma kuluk ac mwe kweok ma sikyak fin facluh ke pacl inge, ac lah meac el puhla ke pacl kuht sun mwe kweok.

4. El suc srihpen mwe kweok lasr uh

Mwet pucspucs luhlahlfongi muh God pa kol facluh nohfohn. Yac pwacye ma inge? Liye VIDEO se.

VIDEO: Who Controls the World? (1:24)

Riti Job 34:12 ac 1 John 5:19, ac tohkohyang sramsramkihn kihsen siyuck se inge:

Yac God pa srihpen mwe kweok ac ma kuluk?

5. Nuhnkuh ke ma sikyak ke srihpen kolyuck lal Satan

Liye VIDEO se.

VIDEO: Why Does God Allow Suffering?—Excerpt (3:07)

Riti Genesis 3:1-6, ac tohkohyang sramsramkihn kihsen siyuck inge:

Kahs kikiacp fuhkah Satan el fahk?—Liye fuhs 4 ac 5.
Satan el oruh fuhkah in muh Jeova el sruhnga in sang ma wo nuh sin mwet uh?
In fal nuh sel Satan, yac mwet uh enenuh kolyuck luhn Jeova tuh elos in engan?

Riti Ecclesiastes 8:9, ac tohkohyang sramsramkihn kihsen siyuck se inge:

Ke srihpen tiac Jeova pa kol facluh ke pacl inge, ma fuhkah sikyak?

Adam ac Eve eltahl mwet suwohswohs ac muhta ke Pacruhtais. Tuhsruhktuh, eltahl porongel Satan ac seahkos Jeova
Ke srihpen seahkos lal Adam ac Eve, mwet uh oraclah ma kuluk, sun mwe kweok, ac misac
Jeova el ac fah ahkwacngihnyelah ma kuluk, mwe kweok ac misac. Mwet uh ac fah eklac suwohswohs ac elos ac fah muhta ke Pacruhtais

6. Jeova el liye mwe kweok lasr uh

Yac God el nuhnkuh ke mwe kweok lasr uh? Liye ma Tohkohsrah David ac mwet sap Peter suhmuhslah. Riti Psalm 31:7 ac 1 Peter 5:7, ac tohkohyang sramsramkihn kihsen siyuck se inge:

Meac kom puhla ke kom etwaclah ingena lah Jeova el liye ac nuhnkuh ke mwe kweok lasr uh?

7. God el ac fah ahkwacngihnyelah mwe kweok nuhkewa luhn mwet uh

Riti Isaiah 65:17 ac Fwackyuk 21:3, 4, ac tohkohyang sramsramkihn kihsen siyuck se inge:

Efuh kuh sie mwe ahkkweye na yohk in etuh lah Jeova el ac fah ahkwacngihnyelah ma kuluk ac mwe kweok ma mwet uh sun?

Yac kom etuh?

Ke pacl se ma Satan el fahk ke kahs kikiacp se meet, el kahskahs kuluk kacl Jeova. El ahkkulukye ine wowo luhn Jeova, ke el oruh mwet uh in nuhnkuh muh Jeova el tiac mwet kol wo ac kuhlwacng se. Ke pacl se Jeova el ac ahkwacngihnyelah mwe kweok luhn mwet uh ke pacl na fototo fahsruh, el ac fah ahkmuhtahlyacl sifacna. El ac fah ahkpwacyeye lah kolyuck lal uh pa wo emeet na pwacye. In ahkmuhtahlye inen Jeova pa ma yohk srihpac emeet inkuhsrao ac fin facluh.—Matthew 6:9, 10.

KUHTUH MWET UH FAHK: “Mwe kweok uh wi ke oakwuck luhn God nuh sesr.”

Meac kom ac fah fahk?

MA KUHT LOTWELAH

Satan suc Devil ac siacnyacn se meet pa srihpac pwacnacng oasr ma kuluk fin facluh. Jeova el liye mwe kweok lasr, ac ke srihpen el nuhnkuh kacsr, ke pacl na sa el ac fah ahkwacngihnyelah mwe kweok nuhkewa.