God el lwelah mwet yen nuhkewa in fototo nuh sel ke inkacnek luhn puhruhe. (Psalm 65:2) Tuhsruhktuh el tiac lohng puhruhe nuhkewa. Ke sie mwe puhpuhlyuck, puhruhe luhn sie mukul suc kuluk nuh sin muhtwacn kiacl tiac lohngyuck sin God. (Sie Peter 3:7) Oacyacpac, ke mwet Israel tahfwelah na ke ohiyac kuluk laltahl, God el sruhnga in lohng puhruhe laltahl. Tuhsruhktuh, God el kuh in lohng puhruhe luhn mwet kuluk se, el fin auliyak. Arlac kahlwem lah puhruhe uh sie ma kuht enenuh in ahksacohkye.—Riti Isaiah 1:15; 55:7.

Puhruhe uh ipin pacna alu lasr nuh sin God. Pwacnacng kuht enenuh in puhruhe nuh sin Jeova muhkwena. (Matthew 4:10; Luke 11:2) Oacyacpac, ke srihpen kuht nuhkewa sesuwohs, kuht enenuh in puhruhe ke inen Jesus mweyen el misac ke ma kuluk lasr uh. (John 14:6) Jeova el sruhnga kuht in kalweni puhruhe ma kuht esamyac kuh riti uh. El ke puhruhe lasr uh in tuhkuh ke insiacsr.—Riti Matthew 6:7; Philippi 4:6, 7.

El suc orekuhtlac el kuh in lohng puhruhe lasr finne wacngihn puhsra. (Sie Samuel 1:12, 13) El siyuck sesr in puhruhe nuh sel pacl nuhkewa, ke muhtwacwackiyac ac ke sahflahiyen lwen se, ke pacl in mongo, ac ke pacl kuht sun ma upac.—Riti Psalm 55:22; Matthew 15:36.

Tiac fihsracsr in fototo nuh sin God, mweyen kuht muhta inmahsrlon mwet suc tiac ahkos ma sap luhn God ac tiac luhlahlfongi wuhlelah lal ke sie facl mislac. (Luo Timothy 3:1, 4; Luo Peter 3:3, 13) Pwacnacng kuht enenuh mwe ahkkweye nuh sin sie sin sie ke kuht asruoki yurin mwet lili wiyacsr.—Riti Hebrew 10:24, 25.

 Orekma lasr in asruoki nuh sin mwet suc luhngse God ac fah kahsre kuht in fototo nuh sel. Toeni luhn Mwet Loh luhn Jeova use pacl wo lasr in eis mwe ahkkweye ke luhlahlfongi luhn mwet sahyac.—Riti Rome 1:11, 12.

Kom kuh in fototo nuh sin Jeova ke kom nuhnkuh yohk ke ma kom lotelah ke Kahs lal. Nuhnkuh ke ma kom lotelah ke orekma lal, kahs in kahsruh lal, ac wuhlelah lal. Kom kuh in kahlwem na pwacye ke luhpan luhngse ac lahlmwetmwet luhn God ke pacl kom puhruhe ac nuhnkuh yohk ke ma inge kewa.—Riti Joshua 1:8; Psalm 1:1-3.

Kom kuh in fototo nuh sin God muhkwena kom fin luhlahlfongel. Tuhsruhktuh luhlahlfongi luhn mwet se ac kuh in luhmweyucklac nuh ke sahk uh. In oacna ke sahk uh enenuh mwe ahkmongo pacl nuhkewa, luhlahlfongi lom enenuh pac mwe ahkkweye. Kom oruh ma inge ke kom tafwela na in lutlut ac nuhnkuh yohk ke Bible in ahkkweye luhlahlfongi lom.—Riti Matthew 4:4; Hebrew 11:1, 6.

Jeova el nuhnkuh ke mwet suc luhngse el uh. El kuh in karuhnguhnuhltahl liki kuhtwena ma suc kuh in kuhnauslah luhlahlfongi laltahl ac finsrak laltahl in moul ma pahtpaht. (Psalm 91:1, 2, 7-10) El use kahs in sensen nuh sesr kuht in fahsr liki kuhtwena ohiyac ma ac kuh in ahkkulukye mahnosr kuh eslah insewowo lasr uh. Jeova el luti kuht inkacnek ma wo emeet kuht in moulkihn ke moul lasr uh.—Riti Psalm 73:27, 28; James 4:4, 8.